Ինչու՞ են ծռերը խոսում Սերժ Սարգսյանի մահվան մասին

Սասնա ծռեր խմբավորման ընդհատակյա թևի ղեկավար Գարեգին Չուգասզյանը ԳԱԼԱ-ին տված հարցազրույցում նշել էր ՝ եթե «նախագահը» պատահաբար մահանա մինչև 2018 թ., ապա նշանակվելու են նոր ընտրություններ:

Չուգասզյանի այս հայտարարությունը տեղավորվում է այն խոսակցությունների կոնտեքստում, որ պետք է տապալել Սարգսյանի հնարավոր վարչապետացումն ու 2018-ին նրա վերարտադրությունը: Չուգասզյանը հղում անելով սահմանադրությանը նշում է, որ Սերժ Սարգսյանի մահվան դեպքում նշանակվելու են նոր նախագահական ընտրություններ և 5 տարով ընտրվելու է նոր նախագահ: Սա փաստացի նշանակում է, որ կառավարման պառլամենտական սցենարը կարող է ձախողվել, ըստ Չուգասզյանի իհարկե:

Չուգասզյանը անուղղակիորեն պատասխանում և պատրաստի սցենար է առաջարկում այն ուժերին, ովքեր վերջին շրջանում խոսում են Սարգսյանի վերարտադրությունը թույլ չտալու մասին: Իսկ այդ մասին խոսել են շատերը ընդդիմադիր դաշտից, մասնավորապես Նիկոլ Փաշինյանը, Րաֆֆի Հովհաննիսյանը: Իսկ Վարուժան Ավետիսյանն էլ դատարանում կոչ արեց զենք վերցնել ու ազատվել «Սերժի բանդայից»:

Չուգասզյանի ու ծռերի դեպքում նմանատիպ սցենարները հասկանալի են: Նրանք ընտրել են գործունեության այնպիսի ոճ, որ ենթադրելու է նմանատիպ արմատական քայլեր ու խոսքեր: Առավել հետաքրքրական է ընդդիմադիր դաշտի դիրքորոշումը: Չուգասզյանի այս հայտարարությանը դեռ ոչ ոք չի արձագանքել: Դժվար թե որևէ մեկն արտաքուստ համաձայնվի այդ սցենարին:

Բայց ուժեր, որոնք որևէ կերպ չեն կարողացել Սարգսյանի նախաձեռնած սահմանադրական փոփոխությունները, այսինքն վերջինիս վերարտադրության պլանը ձախողել, հանկարծ հասկացել են, որ պիտի դա անեն հիմա: Նրանք բնականաբար այդ ձախողումը կազմակերպելու գործիք են նախանշել փողոցային ընդվզումն ու հանրության դժգոհությունը: Առավել հետաքրքրական է, որ հանկարծահաս այդ ձախողումը մտահղացած անձիք փորձում են որպես կռվան ներքաշել նաև Կարեն Կարապետյանին ՝ վերջինիս հորդորելով վա-բանկ գնալ, օգտագործել հանրային համակրանքը: Նմանատիպ հայտարարություններով արդեն հասցրել են հանդես գալ Փաշինյանը, Րաֆֆին, Լյուդմիլա Սարգսյանը:

Ընդդիմության կցկտուր ու ինտրիգային խաղերի անորոշության ֆոնին էլ պետք է դիտարկել Չուգասզյանի հայտարարությունը: Նա անորոշներին տալիս է գործողությունների կոնկրետ սցենար, դնում է երկընտրանքի առջև: Կգնա՞ն արդյոք ընդդիմադիր ուժերն այդ սցենարով կամ կմիանա՞ն այդ սցենարի աջակցմանը դրա հնարավոր իրագործումից հետո: Սրանք անպատասխան հարցեր են: Բայց մենք տեսել ենք, թե ինչպես էին մեր ընդդիմադիրները փորձում որսալ ծռերի գործողությունների երկրորդ ալիքն ու իրենց համար ընդդիմադիր էլեկտորատ նախապատրաստել:

Այս իմաստով, Չուգասզյանի, այսինքն ծռերի դիրքորոշումն անընդունելի, բայց իրենց վարքագծի հետ համատեղելի ու ներդաշնակ դիրքորոշում է: Առավել փափուկ ընդդիմադիրները, սակայն, փորձում են հեղափոխական սցենարին հասնել ոչ իրենց ձեռամբ, խաղի մեջ ներքաշելով ծռերին, վարչապետին, հանրությանը: Բոլորը բոլորի վրայից գցում են պատասխանատվությունն ու խոսում Սերժ Սարգսյանին գահընկեց անելու մասին: Բոլորին միավորում է մեկ բան ՝ Սերժ Սարգսյանին գահընկեց անելու նպատակը, բայց տարբերություններն այդ բոլորի մեջ ավելի շատ են: Իսկ մենք տեսել ենք, թե ինչ է լինում, երբ տարբեր դիրքորոշումներ ու գաղափարախոսություններ, տարբեր մարտավարություններ ու մոտեցումներ ուժերը միավորվում են առաջին հայացքից մեկ մեծ նպատակի շուրջ, որ պիտի առաջին հայացքից ծածկի մարտավարական տարբերությունները համախմբան ներսում:

Լևոն Մարգարյան, Lraber.info