Մահաբեր ամառ կամ ես խմած ավելի լավ եմ քշում

Նորից եկավ ամառն ու հանգստյան օրերին մահվան ելքով ավտովթարների մասին լուրերը դարձան լրահոսի գերակշիռ մասը: Հանգստյան օրերի ընթացքում գրեթե 10 խոշոր ավտովթար, վիրավորներ ու զոհեր:

Ամռանը ծանր վթարների թվի աճը ունի մի քանի պատճառ: Նախ եղանակային պայմանները: Շոգը բնականաբար ավելի է բթացնում սթափությունը:
Մյուս պատճառը ՝ շատ են արձակուրդ կամ քաղաքից դուրս մեկնողները: Քաղաքից դուրս հանգստի կազմակերպման անբաժան մաս է կազմում ալկոհոլն ու ոչ սթափ վիճակում վարելը, ինչն էլ հանդիսանում է վթարների մեծ մասի պատճառ:

Մյուս պատճառը ժամանակի զգացողության փոփոխությունն է: Ամառային երկար օրերը, ոչ սովորական ժամանակային կազմակերպումը, աշխատանքային պրոցեսի նվազեցումը կամ դադարեցումը բերում են մի վիճակի, երբ վարորդներից շատերը կամ չեն շտապում ու դանդաղ են վարում էլ մտածելով, որ երթևեկությունը խիտ չէ ավելի արագ են վարում:
Սրան կարող ենք ավելացնել նաև Հայաստանի ճանապարների ոչ բարվոք վիճակը, ճանապարհատրանսպորտային նշանների փնթիությունն ու մեքենաների մեծ մասի բավական հին լինելը:

Խնդիր է նաև այն, որ Հայաստանում վարորդական իրավունք են ստանում մեծամասամբ կաշառքով, առանց քննություններ հանձնելու: Իսկ մեքենաների տեխզնման սիմվոլիկ բնույթի մասին գիտենք բոլորս: Այս բոլոր հանգամանքները միասին ամառային հանգիստը դարձնում են մահաբեր: Արագաչափերն ու տեսախցիկները խնդիրը չեն կարգավորում:

Խնդիրը չի կարգավորվում նաև ինքնստինքյան: Այսինքն, մարդիկ ամեն դեպքում վարում են ալկոհոլի տակ կամ բավական արագ:

Հայաստանի դեպքում ճանապարհատրանսպորտային վրահսկողությունն ավելի շատ հարկային մարմնի դեր է կատարում, քան վթարների կանխարգելման:
Իսկ ամառը նոր է սկսվել: Դեռևս երկու ամիս կա ու ցավոք մեր լրահոսում դեռ անընդհատ կարդալու ենք մահվան ելքով վթարների մասին, որովհետև վերոնշյալ խնդիրները մեկ ամսում չեն լուծվելու:

Արտակ Ասլանյան, Lraber.info