Պետության հաշվին ՀՀԿ–ի խրախուսական նվերը Բազմասեր Առաքելյանին. «Փաստ»

«Փաստ» օրաթերթը գրում է.

Արմավիրի մարզում խորհրդարանի ընտրություններում ռեյտինգային ընտրակարգով ՀՀԿ–ից առաջադրված նախկին ԲՀԿ–ական պատգամավոր Բազմասեր Առաքելյանը 50 տարի անհատույց օգտագործման իրավունքով մարզադպրոց ու հողամաս է ստացել կառավարությունից:

Կառավարության երեկվա նիստում հավանության բավական հետաքրքրիր «ստեղծագործական մոտեցում» է արձանագրվել. Կառավարությունը որոշել է Աշտարակ քաղաքի Երևանյան փողոց թիվ 2/1 հասցեում գտնվող 1 մլրդ 276 մլն 120 հազար դրամ գնահատված արժեքով 4556,07 քառ. մետր մակերեսով կիսակառույց մարզադպրոցի շենք, շինությունները և դրանց զբաղեցրած, օգտագործման ու սպասարկման համար անհրաժեշտ 0,782 հա հողամասը 50 տարի ժամկետով անհատույց օգտագործման իրավունքով հանձնել «Սևան» մարզական հասարակական կազմակերպությանը:

Ընդ որում՝ պետգույքի կառավարման վարչությունը նախ որոշել է նվեր տալ դպրոցը, ինչպես խնդրել է Բազմասեր Առաքելյանը, սակայն ֆիննախի առարկությունից հետո այն 50 տարով է տրվել Առաքելյանին անհատույց օգտագործման: «Նվիրաբերության ժամանակ պետական գույքի սեփականության նկատմամբ իրավունքն օտարվում է մասնավորին, իսկ անհատույց օգտագործման իրավունքով տրամադրման ժամանակ պետական գույքի սեփականության նկատմամբ իրավունքը պահպանվում է և փոխանցվում է միայն օգտագործման իրավունքը»,– առարկել է ֆիննախը՝ հավելելով. «Սակայն նախագիծը հիմնավորող տեղեկանքում չեն ներկայացվել պետական գույքի կառավարման տեսանկյունից նախագծով առաջարկված գույքի կառավարման ձևի (նվիրաբերության) ընտրության արդյունավետության վերաբերյալ և այլ ձևերի, օրինակ անհատույց օգտագործման իրավունքով տրամադրման ձևի, անարդյունավետության վերաբերյալ համապատասխան հիմնավորումներ»:

«Սևան» մարզական ՀԿ–ի խորհրդի նախագահը Բազմասեր Առաքելյանն է: Կազմակերպությունը գտնվում է Բազմասեր Առաքելյանի հայրենի Փարպի գյուղում: Հենց այս գյուղում խորհրդարանի վերջին ընտրությունների արդյունքները չեղյալ համարվեցին: Փարպիում նախընտրական շրջանում տեղի ունեցավ միջադեպ, երբ, մամուլի տեղեկություններով, Բազմասեր Առաքելյանի տուն էին հրավիրել Փարպի գյուղի բնակիչներից մեկին և իմանալով, որ քվեարկելու է ՀՅԴ կուսակցության օգտին՝ դաժան ծեծի ենթարկել նրան, սակայն Փարպի գյուղի բնակչին ծեծելու փաստը չհաստատվեց ու քրեական գործ չհարուցվեց: Ճի՞շտ էր այս պատմությունը, թե սուտ՝ չպարզվեց:

Ինչ վերաբերում է կառավարությունից մարզադպրոցը 50 տարով նվեր ստացած «Սևան» ՀԿ–ին, կազմակերպությունը պարտավոր է մինչև 2021 թվականը յուրաքանչյուր տարի կատարել 3 մլն դրամի ներդրում: Իսկ ստանձնած պարտավորությունները չկատարելու կամ ոչ պատշաճ կատարելու դեպքում կնքված պայմանագիրը ենթակա է լուծման:

Ըստ հիմնավորման՝ «Սևան» մարզական հասարակական կազմակերպությունը իր գործունեության ծրագրում ամրագրել և ներկայում իրականացնում է մատաղ սերնդի ուսումնա–սպորտային աշխատանքներ տարբեր մարզաձևերում ներգրավելով շուրջ 2019՝ մասնավորապես Աշտարակ քաղաքում 400, պատանի մարզիկների, ինչպես նաև ազգաբնակչության շրջանում կազմակերպում է մարզական մասսայական միջոցառումներ` ներգրավելով մարզի բոլոր բնակավայրերի հավաքական թիմերին. ըմբշամարտի, վոլեյբոլի, բասկետբոլի, շախմատի, ֆուտբոլի, ծանրամարտի և աթլետիկայի մարզական միջոցառումներին, որը նպաստում է առողջ ապրելակերպին և մարտունակ սերնդի դաստիարակմանը:

Կազմակերպության ծրագրով գործող մանկապատանեկան մարզադպրոցը յուրաքանչյուր տարի իրականացնում է մոտ 90–120 պատանիների ընդունելություն և ավագ սերնդի հետ շարունակում մարզական միջոցառումների կազմակերպում:

Շարունակությունը` «Փաստ» օրաթերթի այսօրվա համարում