Անժելա Խաչատրյան. «Կառավարության ծրագրում հասարակությանը հուզող բազմաթիվ խնդիրների հստակ լուծումներ չկային». «Փաստ»

«Փաստ» օրաթերթը գրում է.

«Փաստի» հյուրն է «Ազատ Դեմոկրատներ» կուսակցության փոխնախագահ Անժելա Խաչատրյանը

– «Ազատ Դեմոկրատներ» կուսակցությունից վերջին շրջանում ձայն–արձագանք չկա, կարծես թե ընդհատակ է անցել:

– Ընդհատակ չենք անցել: Կուսակցական գործունեության մեջ պարտադիր չէ, որ ամեն ինչ հրապարակային լինի և ամեն ինչի մասին խոսենք մամուլում: Այս պահին մենք մեր տարածքային կառույցների վերազինումն ենք իրականացնում, տեսնում՝ ինչ հնարավորություններ կան տարածքային կառույցներն ավելի ուժեղացնելու տեսանկյունից: Առաջիկայում պատրաստվում ենք նաև համագումար անցկացնել, իսկ համագումարից առաջ յուրաքանչյուր քաղաքական ուժ նման գործունեություն է իրականացնում:

– Հուսահատություն ու հոգնածություն կուսակցության անդամների մոտ չկա՞ն:

– Նման բան չկա: Եթե դու քաղաքական ուժ ես, որն ունի օրակարգ, հստակ ընդգծված գաղափարախոսություն և ամբողջ քաղաքական ներկապնակով անցել ես, ապա դու իրավունք չունես հուսահատվելու: Ընդհանրապես ընտրությունները անընդհատ ընթացող շրջափուլ են, գալիս–գնում են, և դրանով չպիտի պայմանավորված լինի քաղաքական կուսակցության և գործչի կյանքը:

Այսինքն՝ եթե ընտրություններում հաջողության չհասար, ի՞նչ է նշանակում, փակո՞ւմ ես կուսակցությունը: Եթե մարդիկ կան, ովքեր ունեն նման մոտեցումներ, տարիների ընթացքում նման գործունեություն են իրականացնում, դա այլ հարց է: Բայց «Ազատ դեմոկրատներ» կուսակցությունը նման խնդիր չունի, որևէ հուսահատություն կուսակցության ներսում, կուսակցության համակիրների շարքերում չկա: Մենք պարզապես ֆիքսել ենք թերությունները, ինչի մասին նաև հայտարարել ենք: Բնականաբար ընտրություններն անցել են կեղծիքների լայն ասպեկտի կիրառմամբ: Դա գիտեն բոլորը, և դրա մասին ես չէ որ պիտի խոսեմ:

Միջազգային հանրությունը ևս բազմիցս քննադատել է, ասել է՝ ինչ կեղծիքներ են արվել ու ինչ մեթոդներով է ձևավորվել ներկայի խորհրդարանը: Այն, որ մեր ներկայի խորհրդարանը մեր ժողովրդի հասարակական ու քաղաքական մոտեցումների ամբողջական արտացոլումը չէ, դա ևս ակնհայտ է:

Կառավարության ծրագիրը մեկուկես օրում է ընդունվում, այն դեպքում, որ նախկինում ես նման նախադեպ չեմ հիշում, որովհետև կառավարության ծրագիրը գոնե իր քաղաքական, տնտեսական ասպեկտներով մանրամասն քննարկվել է Ազգային Ժողովի նախորդ գումարումների ժամանակ: Իսկ այս գումարումը օրուկեսում կառավարության ծրագիրն ընդունեց: Եվ գլխավոր ու կարևոր հարցը կարծես թե մնաց միայն այն, թե վարչապետը ով է լինելու: Այն դեպքում, երբ մեր հասարակությանը հուզող շատուշատ խնդիրներ կային այս ծրագրում դրված: Այս ծրագրում դեկլարատիվ հայտարարություններ էին, բայց նրանում չկային հստակ լուծումներ այն խնդիրների, որոնք հապշտապ, շուտափույթ լուծում են պահանջում:

Այս ամեն ինչը հաշվի առնելով՝ կուսակցությունը պիտի իր գործունեությունը շարունակի: Իսկ հիասթափություն հասարակությունից, բնականաբար, չպետք է ունենալ: Պետք է ուղղակի հաշվի նստել առկա փաստերի հետ և շարունակել պայքարը, ինչն էլ՝ մենք անում ենք:

– Մի քանի ամիս է անցել նախորդ ընտրություններից, որում դուք ցածր արդյունքներ գրանցեցիք: Կուսակցության քաղաքականության փոփոխության վերաբերյալ քննարկումներ կուսակցության ներսում եղե՞լ են:

– Քաղաքականության օրակարգի փոփոխություն չի լինելու, որովհետև օրակարգն ու գաղափարախոսությունը կուսակցության դիմագիծն է: Եթե կուսակցությունները եղանակային պայմաններից ելնելով փոխում են իրենց օրակարգը կամ առհասարակ մոտեցումները՝ ապա այդ կուսակցությունների մասին ես չեմ ուզում խոսել: Ներքին կուսակցական գործունեության հետ կապված աշխատանքներ տարվում են՝ նույն տարածքային կառույցների, դրանց համալրման հետ կապված: Դիտարկումներ են արվում, թե ինչ սխալներ են եղել, ովքեր են դրանք արել:

«Ազատ դեմոկրատներն» այն կուսակցությունն է, որը ստեղծված օրվանից ևեթ թե՛ ներքին և թե՛ արտաքին քաղաքականության հետ կապված հստակ ասել է իր դիրքորոշումը և չի էլ վախեցել դրանից: Չի վախեցել լինել այնպիսի դիրքորոշման կողմնակիցը, որը գուցե մեծ զանգվածների աջակցությունը չստանա:

Շարունակությունը` «Փաստ» օրաթերթի այսօրվա համարում