Կադիրովը քննադատել է ՀԱՊԿ ղեկավարներին

Չեչնիայի ղեկավար Ռամզան Կադիրովը սուր քննադատության է ենթարկել Հավաքական անվտանգության պայմանագրի կազմակերպության (ՀԱՊԿ) անդամ երկրների ղեկավարներին՝ ուկրաինական իրադարձությունների վերաբերյալ նրանց դիրքորոշման պատճառով։ Նա տեսաուղերձ է հրապարակել Telegram-ի իր ալիքում։

Ըստ նրա՝ ՀԱՊԿ-ը ոչ մի օգուտ չի տալիս Ռուսաստանին, մինչդեռ Մոսկվան օգնում է բոլորին. «Եվրոպացի առաջնորդները գալիս են Պուտինի մոտ, հեռախոսով բանակցում են, պաշտպանում են Ուկրաինայի շահերը, իսկ մեր ՀԱՊԿ-ականներ, դուք ինչո՞ւ եք լռում։ Ինչո՞ւ չեք խոսում ձեր հարեւանների մասին, ինչո՞ւ չեք փորձում վերջ տալ պատերազմին։ Ինչո՞ւ դիրքորոշում չունեք նացիստների, բանդերովցիների և նացիստների դեմ, ովքեր սպանել են մեր նախնիներին։ Եվ հիմա, կարծես ոչինչ չի եղել, վախենալով պատժամիջոցներից, բոլորը լռում են»,- քննադատել է Կադիրովը։

Տարածաշրջանի ղեկավարը հիշեցրել է, որ ինքը գտնվում է ԱՄՆ պատժամիջոցների տակ, սակայն չի վախենում իր նկատմամբ կիրառվող սահմանափակումներից։ Ըստ Կադիրովի` Ռուսաստանը փրկել է Ղազախստանը, Բելառուսը և առանցքային դեր է խաղացել Հայաստանի և Ադրբեջանի միջև հակամարտության կարգավորման գործում։ «Երբ Ղազախստանը սկսեց կորցնել ինքնիշխանությունը, ո՞վ օգնեց։ Ռուսաստանը` չվախենալով պատժամիջոցներից: Եվ եթե պետք է ճանաչել պետությունը, չանաչե՛ք, չեք ճանաչում` դա մեզ շատ չի հետաքրքրում»,- ասել է Չեչնիայի ղեկավարը և հավելել, որ Ռուսաստանը շուտով լավ արդյունքներ ցույց կտա Դոնբասում։