Հետո՞ ինչ, բերման են ենթարկել, մի քանի ժամից բաց կթողնեն. Կարին Տոնոյան

Բաղրամյան պողոտայում ուսապարկերով ակցիայի ժամանակ բերման ենթարկեցին Համախմբման անդամներ Մենուա Սողոմոնյանին, Էդգար Ղազարյանին, Ավետիք Չալաբյանին, Կարինե Յարմալոյանին և ակցիայի այլ մասնակիցների։ Նրանց նախ թույլ չտվեցին իրականացնել իրենց ակցիան` պարզաբանելով, որ տարածքը աղտոտում են, հասարակակական կարգ են խախտում։ 

Մասնակիցները ԱԺ-ի Քաղաքացիական պայմանագիր կուսակցության պատգամավորների նկարներով ուսապարկեր էին պատրաստել և պատրաստվում էին դնել ԱԺ-ի դիմաց։ Ոստիկանությունը նախ թույլ չտվեց փողոցն անցնել, քանի որ փողոցի անթույլատրելի մասով էին անցնում, ապա տարածքը աղտոտելու համար բերման ենթարկեց նրանց Արաբկիրի բաժին` ոմանց քաշքշելով բարձրացրին ավտոբուս։ 

«5165 շարժման» առաջնորդ Կարին Տոնոյանի խոսքով՝ պայքարի ընթացքում ամեն բան էլ կարող է պատահել, նորմալ է.

«Ես իրենց հետ չեմ եղել, ակցիան մեր երիտասարդական թևն է արել: Հետո՞ ինչ, պետք է բերման էլ ենթարկեն, բերման են ենթարկել, մի քանի ժամից բաց կթողնեն: Մենք գիտենք, թե պայքարի ընթացքում ինչերի միջով պետք է անցնենք և պատրաստ ենք այդ ամենին, միայն թե հասնենք մեր նպատակին»,- 1or.am-ի հետ զրույցում ասաց Տոնոյանը:

Անդրադառնալով այլևս հրապարակ չգնալու մասին իր հայտարարությանը՝ Տոնոյանը նշեց.

«Հրապարակ օրաթերթը սխալ ինֆորմացիա է տարածել: Ես ոչ թե ասել եմ, որ այլևս չեմ գնալու հրապարակ, այլ ասել եմ, որ գիշերները չեմ գնում այնտեղ և, կարծում եմ, դա նորմալ է»:

Մարիամ Նալբանդյան