Հերիք չի՞ էս ժողովրդին խաբեք ու դնեք թուրքական դանակի տակ. Արտակ Զաքարյան

Աշխարհի պատերազմական թոհուբոհի մեջ, “խաղաղության դարաշրջան” բացողները` Հայոց Բանակն արյունաքամ անելուց, բարոյալքելուց ու հերոսներին նսեմացելուց հետո, այդպես էլ չկարողացան խաղաղություն կառուցել: Թուրքի ուզած արցախյան տարածքները հանձնելուց, Հայաստանի սահմաններն ու սահմանամերձ գոտիները օկուպացնելուց, Հայաստանի գյուղամերձ հանդերն ու արոտները թուրքի վերահոսկողությանը թողնելուց, միջպետական ռազմավարական ճանապարհը նվիրաբերելուց հետո՝ քպ-ականները արդեն պատրաստ են ախպերության:

Պատկերացնում եք չէ՞, սովորական խաղաղություն չեն կարողանում հաստատել, բայց ախպերության մասին հավեսով խոսում են:

 

Շատ լավ, ասենք թե բոլորս պատրաստ ենք թուրքի հետ ախպերություն անենք, որպեսզի որոշ օլիգարխներ ավելի շատ փող աշխատեն: Նույնիսկ ավելին ասեմ՝ ենթադրենք նույնիսկ պատրաստ ենք հանուն խաղաղության, թուրքի հետ քիրվայություն անելուն: Միայն ենթադրենք:

 

Հիմա քպ-ականների թուրք ախպերների մասին: Զաքիր Հասանով “ախպերը” այսօր Բաքվում ռազմական խորհրդակցություն է արել և հանձնարարել հետևյալը. “...Պահպանել զորամասերի պատրաստականության բարձր մակարդակը, մշտապես կատարելագործել ծառայողական-մարտական գործունեությունը, բարձրացնել զգոնության մակարդակը: Անցկացնել ինտենսիվ մարզումներ և գործնական պարապմունքներ իրական մարտական պայմաններով, պատրաստ լինել մարտական առաջադրանքների հստակ և ժամանակին կատարմանը”: Զինվորականները գիտեն, որ նման հաղորդագրությունները հենց այնպես չեն լինում:

 

Այն ինչ կատարվել և կատարվում է Արցախում, այն ինչ հիմա կատարվում է Հայաստանի շուրջ, այն ինչ ասում է քպ-ի ախպեր Զաքիրը՝ խաղաղության ժանրի՞ց է, թե՞ ախպերության: Հերիք չի՞ էս ժողովրդին խաբեք ու դնեք թուրքական դանակի տակ: Երկիր ու ժողովուրդ պահել չգիտեք, գոնե թասի՛բ ունեցեք, գոնե մարդկային պարզ բանականությո՛ւն ունեցեք, գոնե ձեր սերունդների մասին մտածեք:

 

Ի՞նչ է ասում քպ-ական քարոզչությունը: Ասում է “Քվեդ տուր Նիկոլին, տունդ տուր թուրքին ու դարձիր թրքահպատակ ախպեր”:

 

Ձեր վարած ստորաքարշ արտաքին քաղաքականությունը ցույց է տալիս, որ դուք ժողովուրդների հետ բարեկամություն անել չգիտեք, պարոնայք քպ-ականներ: Դուք նույնիսկ ձեր ժողովրդի հետ բարեկամություն անել չգիտեք: Որովհետև բարեկամությունը՝ ազնվություն, համախմբվածություն, փոխադարձ հարգանք է պահանջում: Իսկ ձերը՝ թշնամություն, անեծք, խաբկանք, մահ ու կեղծիք սերմանելն է: Ձեր տեսակի հետ, նույնիսկ սատանան բարեկամություն չի անի: