Երկու ամսից հնարավոր չի լինի նույն մեքենայով սկզբում միս, հետո հաց, հետո, ասենք, կարտոֆիլ տեղափոխել. «Փաստ»

«Փաստ» օրաթերթը գրում է.

Սեպտեմբերի 1–ից պետական գնումով, ինչպես նաև Երևանի հանրային սննդի, հյուրանոցային տնտեսությունների, նախադպրոցական և երեխաների խնամքի հաստատությունների, ամառային ճամբարների, առողջարանների, հանգստյան տների, մարզաառողջարանային կազմակերպությունների, ծերանոցների, հանրակրթական և մասնագիտական հաստատությունների համար գնվող հացը պետք է տեղափոխվի սննդամթերքի տեղափոխման արտոնագիր ստացած փոխադրամիջոցներով, իսկ պետական գնումներով ձեռք բերվող միսը, ոչ միայն պետք է կրկին հատուկ կահավորում ունեցող մեքենաներով տեղափոխվի, այլև սպանդանոցային ծագում ունենա:

Նման մեքենաները պետք է հատուկ անձնագիր ստանան, իսկ այն ստանալու համար պետք է մեքենան պահանջվող ստանդարտներին համապատասխան կահավորում ունենա:

Կարճ ասած սեպտեմբերի 1–ից «ժիգուլիի» բեռնախցիկը եթե պատշաճ պայմաններում հաց կամ միս տեղափոխելու համար հարմարեցված չլինի, ապա կարգելվի դրանցով նշված սննդամթերքներ տեղափոխելը:

Նոյեմբերին 1–ից էլ, որոշումը կտարածվի նաև Երևանի առևտրի օբյեկտների և մսամթերքի արտադրությամբ զբաղվող ընկերությունների կողմից ձեռք բերվող հացի ու մսի տեղափոխմանը:

Սա անշուշտ շատ լավ է և, անկեղծ ասած, երկար սպասված: Բայց ինչպես դառը իրականությունն է փաստում, շատ է պատահում, որ նման «անցումային» ժամանակներում խառնաշփոթ է սկսվում, և մարդիկ մինչև հասկանում են,թե որ դուռը որից հետո պետք է թակեն, բավականին երկար ժամանակ, նյարդեր ու գումար են ծախսում:

Եվ որպեսզի այս անգամ առաքիչներին օգնենք զերծ մնալ նման ցնցումներից, որոշեցինք ուսումնասիրել սննդամթերք տեղափոխող փոխադրամիջոցներին սանիտարական անձնագրերի տրամադրելու կարգը: Պարզվեց, որ յուրաքանչյուր փոխադրամիջոց իր անձնագիրը պետք է ունենա, քանի որ հնարավոր չէ նույն մեքենայով սկզբում միս, հետո հաց, հետո, ասենք, կարտոֆիլ տեղափոխել:

«Եթե գործարանային արտադրության մեքենան ի սկզբանե արտադրված է եղել հաց կամ միս կամ այլ սննդամթերք տեղափոխելու համար, ապա կարող է այդ անձնագիրը ստանալ: Բայց եթե ֆիզիկական կամ իրավաբանական անձը իր սովորական «Ժիգուլիով», «Մերսեդեսով» կամ «բուդկա–մոսկվիչով», ուզում է առավոտյան բանանի տուփերով մատնաքաշ տեղափոխել, հետո նույն մերսեդեսով գնալ աշխատանքի, ապա չի կարողանա: Նա եթե ուզում է նման գործունեություն ծավալել, ապա պետք է իր մեքենան ձևափոխի ու դարձնի սննդամթերք տեղափոխող տրանսպորտային միջոց»,– ասաց ՍԱՊԾ իրավաբանական բաժնի պետ Արմեն Հակոբյանը:

Նույն մեքենայով անգամ տարբեր ջերմաստիճաններում պահվող սննդամթերքը չեն կարողանա տեղափոխել, քանի որ ապրանքների տեղափոխման պայմանները նույնպես պետք է համապատասխանեն սահմանված տեխնիկական կանոնակարգերին:

«Այսօր պրակտիկայում կան մեքենաներ, որոնք արդեն կահավորված են հացի տեղափոխման համար հարմարեցված դարակներով, ներսից վերանորոգում և հարմարեցնում են պահանջվող չափանիշներին: Մենք երկու տարբերակ ենք առաջարկում: Ասում ենք կամ ունեցիր մինչև երեք տարվա արտադրության հատուկ տվյալ գործառույթն իրականացնելու համար նախատեսված ավտոմեքենա, կամ վերակահավորիր փոխադրամիջոցը, ստացիր համապատասխան փորձագիտական եզրակացություն, դրա հիման և մնացած այլ փաստաթղթերի առկայության դեպքում ՍԱՊԾ–ն նրանց կտրամադրի սննդամթերքի տեղափոխմամբ զբաղվելու թույլտվություն»,– ասաց իրավաբանական բաժնի պետը:

Ի դեպ, փոխադրողին այդ անձնագիրը տրամադրվում է անվճար, մեկ տարի ժամկետով: Եվ եթե ՍԱՊԾ մասնագետները մեքենաները կահավորելուց հետո անգամ որոշ թերություններ հայտնաբերեն, ապա պարտավոր են ուղղորդել, թե ինչը ինչպես պետք է փոխել, որպեսզի մեքենայատերերն էլ կարողանան ապահովել պահանջվող բոլոր նորմերը:

«Որոշման կիրարկման ընթացքում, եթե բացեր հայտնաբերենք կփորձենք շատ օպերատիվ այդ բացերը լրացնել: Փուլ առ փուլ փորձելու ենք կանոնակարգել դաշտը: Մենք վստահ ենք, որ լավ բան ենք անում»,– ասաց ՍԱՊԾ իրավաբանական բաժնի պետ Արմեն Հակոբյանը:

 Շարունակությունը` «Փաստ» օրաթերթի այսօրվա համարում