Իրանի ԱԳՆ․ Վիեննայում Իրանի ժողովրդի իրավունքներին վերաբերող որեւէ զիջում չի լինի

Վիեննայում 2015թ․ միջուկային գործարքի վերականգնման շուրջ բանակցություններում Իրանի ժողովրդի իրավունքներին վերաբերող որեւէ զիջում չի լինի։ Այս մասին հայտարարել է Իրանի արտաքին գործերի նախարարության խոսնակ Սայիդ Խատիբզադեն, տեղեկացնում է Tasnim-ը։

Նրա խոսքով՝ Իրանի անքակտելի իրավունքներն ու միջուկային ձեռքբերումներն անշուշտ պաշտպանված կլինեն։ 

Խատիբզադեն նշել է, որ Թեհրանի եւ P4+1 խմբի միջեւ Վիեննայում կայացած բանակցությունները զգալի առաջընթաց են գրանցել Գործողությունների համատեղ համապարփակ ծրագրի (ԳՀՀԾ) հարցում:

Միաժամանակ, նա դատապարտել է Արեւմուտքին «բանակցությունների համար վճռորոշ քաղաքական որոշումներ կայացնելու հարցում վճռականության բացակայության համար»։

Իրանի ԱԳՆ խոսնակը հավելել է, որ բանակցություններում չլուծված հարցերը «ամենաբարդ, ռազմավարական եւ լուրջ խնդիրներն են, որոնք պետք է լուծվեն»։

Նրա խոսքով՝ «մենք դեռ սպասում ենք Եվրոպայի ու ԱՄՆ-ի որոշումների ընդունմանը», իսկ Թեհրանը դեռ չի տեսնում նման որոշումներ կայացնելու նրանց կամքի դրսեւորումը։

Մեկնաբանելով Իսրայելի վարչապետի հայտարարությունները, ով վերջերս հայտարարել է, որ Վիեննայում համաձայնագրի շուտափույթ կնքման հույս ունի, Խատիբզադեն ասել է, որ Իսրայելի առաջնորդների հայտարարությունները մշտապես ուղղված են Իրանի դեմ «հոգեբանական պատերազմ մղելուն»։