Երիտասարդ եղեք ձեր ամբողջ կյանքի ընթացքում. Արմեն Սարգսյանի ուղերձը՝ երիտասարդներին

ՀՀ չորրորդ նախագահ Արմեն Սարգսյանն ուղերձ է հղել երիտասարդներին՝ հորդորելով նրանց երիտասարդ լինել ամբողջ կյանքում։

«Շատ աշխատեք, ավելի շատ սովորեք, երիտասարդ եղեք ձեր ամբողջ կյանքի ընթացքում: Երիտասարդ լինել նշանակում է ամեն օր նոր բան սովորել: Կարող ես 90 տարեկան լինել, սակայն եթե ամեն օր խանդավառությամբ նոր բան ես սովորում, ապա երիտասարդ ես: Կարող ես լինել 20 տարեկան, սակայն եթե հետաքրքրություն չցուցաբերես քո շուրջը կատարվողի նկատմամբ, պատրաստ չլինես սովորել, ապա երիտասարդ չես լինի:

Մշտապես մնացեք երիտասարդ: Ամեն օր նոր բան սովորեք և եղեք ազատ: Երբեք ամեն ինչ մի ընդունեք այնպես, ինչպես կա, մշտապես հարցեր տվեք և գտեք ձեր պատասխանները: Միշտ հիշեք, որ թեև բոլոր լուծումները տեխնոլոգիաների, գիտության միջոցով են, սակայն հիմնական գործիքն ուղեղն է: Ինչպե՞ս ստացվեց, որ ավելի քան 100 տարի առաջ հանճարեղ գիտնականները կարողացան լուծել տարրական մասնիկների վարքագծի հետ կապված խնդիրները: Սկզբում բոլորը շփոթված էին: Նյուտոնի տեսությունը չէր աշխատում էլեկտրոնների և պրոտոնների դեպքում:

Այն լուծելու համար նրանք նույն խնդիրը դիտարկեցին բոլորովին այլ տեսանկյունից, փոխեցին իրենց դատողությունը, տրամաբանությունը և մոտեցումները: Երբեմն դուք պետք է փոխեք ձեր դատողությունը, տրամաբանության սկզբունքները, և այդ դեպքում հնարավոր է ինչ-որ բանի հասնել:
Եղեք ազատ, մի վախեցեք դիմագրավել մարտահրավերներին և փոփոխություններին»,- նշված է ուղերձում։