Թեհրանի ահաբեկչությանը նախորդել է Բիլդերբերգյան ակումբի նիստը. «Փաստ»

«Փաստ» օրաթերթը գրում է.

Մերձավոր արևելքը շարունակում է ընկղմվել քաոսի մեջ: Սաուդյան Արաբիայի, Բահրեյնի, ԱՄԷ–ի, Եգիպտոսի, Յեմենի ու Մալդիվյան Հանրապետության կողմից Քաթարի հետ դիվանագիտական հարաբերությունները խզելուն հաջորդեց ԻՊ–ի գրոհայինների կողմից Թեհրանում կրկնակի ահաբեկչություն իրականացնելը:

Ուշագրավ է, որ Մերձավոր արևելքում ճգնաժամի նոր փուլն սկսվեց Բիլդերբերգյան ակումբի 65–րդ նիստի ավարտից հետո: Ակումբի անդամները նիստ էին անցկացրել հունիսի 1–4–ը ԱՄՆ–ի Շանտիլի քաղաքի Westfields Marriott հյուրանոցում: Ակումբի պաշտոնական կայքի համաձայն՝ նիստի օրակարգում ընդգրկված են եղել հետևյալ թեմաները՝ «Թրամփի վարչակազմը՝ հաշվետվություն աշխատանքի մասին», «Տրանսատլանտյան հարաբերություններ՝ տարբերակներ և սցենարներ», «ԵՄ զարգացման ուղղություններ», «Ռուսաստանի դերը համաշխարհային կարգում», «Մերձավոր արևելք» և այլն:

Ակումբի նիստի երկրորդ օրը՝ հունիսի 2–ին, The New York Times թերթը, որի ղեկավարները մշտապես մասնակցում են ակումբի նիստերին, հաղորդել է, որ ԱՄՆ–ի ԿՀՎ–ում իրանական ուղղության գծով նոր ղեկավար է նշանակվել՝ Մայքլ դ’Անդրեան, ով հայտնի է որպես «այաթոլլա Մայք» և «գորշ կարդինալ»: 2011 թ. հենց դ’Անդրեան է ղեկավարել «Ալ Քաիդայի» ղեկավար Ուսամա բեն Լադենի վերացման գործողությունը: Այս նշանակումից իրանագետ Կիրիլ Ջավլախը եզրակացնում է, որ ԱՄՆ–ը մտադիր է գործուն կերպով միջամտել Իրանի ներքին գործերին:

Նա հիշեցնում է, որ ամերիկյան հատուկ ծառայությունները Իրանում պետական հեղաշրջում իրականացնելու փորձ ունեն: 1953 թ. բրիտանական Գաղտնի հետախուզական ծառայությունը և ամերիկյան ԿՀՎ–ն տապալեցին ժողովրդավար կերպով ընտրված կառավարությունը՝ վարչապետ Մոհամեդ Մոսադիկի գլխավորությամբ, քանի որ վերջինս փորձել էր ազգայնացնել նավթային արդյունաբերությունը: Օպերացիան ստացել էր «Այաքս» անվանումը:

Սակայն այս անգամ ԱՄՆ–ի համար դժվար է լինելու կարգավորել իր ռեզիդենտուրայի աշխատանքը Իրանում: Իսլամական պետության տարածքում ԱՄՆ–ը դեսպանատուն և բիզնես–ներկայացուցչություններ չունի: Ու եթե Սպիտակ տունն իսկապես որոշել է միջամտել Իրանի ներքին գործերին, ապա, ըստ իրանագետի, ստիպված է լինելու դաշնակցել Մեծ Բրիտանիայի հետ:

Բիլբերբերգյան ակումբի նիստի հաջորդ օրը՝ հունիսի 5–ին, արաբական մի խումբ պետություններ խզեցին դիվանագիտական հարաբերությունները Քաթարի հետ միանգամայն կասկածելի պատրվակներով: Այդ համաձայնեցված գործողությունները դժվար է անվանել սպոնտան, դրանք հիշեցնում էին հատուկ գործողությունների մշակված ծրագիր: Ըստ իրանագետի՝ այդ ծրագիրը բաղկացած է երեք մասից: Առաջին փուլը Քաթարի մեկուսացումն էր արաբական աշխարհից: Երկրորդը՝ Դոխայի ու Թեհրանի միջև ավելի սերտ հարաբերությունների հաստատումն է, ինչը հիմա տեսնում ենք: Իսկ վերջնական փուլում Քաթարը կարող է տրոյական ձիու դեր խաղալ Իրանում իսլամական ռեժիմը պայթեցնելու գործում:

Պարզաբանում. Բիլդերբերգյան ակումբը ամենամյա համաժողով է, որին մասնակցում են համաշխարհային առումով ազդեցություն ունեցող քաղաքական գործիչներ, գործարարներ, բանկիրներ, արևմտյան առաջատար ԶԼՄ–ների ներկայացուցիչներ: Համաժողովին մասնակցել հնարավոր է միայն անձնական հրավերի առկայության դեպքում: Ակումբի նիստերը փակ են, դրանց ընթացքն ու բովանդակությունը չի լուսաբանվում:

Այս տարի ակումբի նիստին մասնակցել է 131 պատվիրակ՝ 21 երկրից:

Ակումբն իր անվանումը ստացել է Նիդեռլանդներում գտնվող Bilderberg հյուրանոցի անունից, որտեղ 1954 թ. կայացել է առաջին համաժողովը: Ակումբի հիմնադրման պաշտոնական նպատակ էր սահմանվել Երկրորդ աշխարհամարտից հետո Հյուսիսային Ամերիկայի և Արևմտյան Եվրոպայի միջև փոխգործակցության ամրապնդումն ընդհանուր արժեքների տարածման համար, սակայն փորձագետները վստահ են, որ իրականում արևմտյան քաղաքական էլիտան միանգամայն այլ նպատակներ է հետապնդում: Իսկ ավելի կոնկրետ համարվում է, որ Բիլդերբերգյան ակումբը գաղտնի կերպով կառավարում է աշխարհը, ուղենշում և իրականացնում նրա զարգացման ուղիները:

Շարունակությունը` «Փաստ» օրաթերթի այսօրվա համարում