«Հեսա կտեսնես՝ մի ձվանին ով ա». Երիտասարդը երկու կրակոց է արձակել ընկերուհու մոտ իրեն «մի ձվանի» անվանած ծանոթի վրա

1in.am\ Մալաթիա-Սեբաստիա վարչական շրջանի ընդհանուր իրավասության դատարանում Կարեն Ֆարխոյանի նախագահությամբ ավարտվել է Ռազմիկ Ա.-ի (անունը փոխված է) գործի դատական քննությունը:

1991 թվականին ծնված Ռազմիկին սկզբում մեղադրանք էր առաջադրվել սպանության փորձի համար՝ ՀՀ քրեական օրենսգրքի 34-104 հոդվածի 1-ին մասով:

Դատաքննության ընթացքում մեղադրող դատախազը փոխել է մեղադրանքը, Ռազմիկ Ա.-ին մեղադրանք է առաջադրել տուժողի առողջությանը դիտավորությամբ ծանր վնաս պատճառելու, ինչպես նաև ապօրինի զենք ձեռք բերելու, պահելու համար՝ ՀՀ քրեական օրենսգրքի 112 հոդվածի 1-ին և 235 հոդվածի 1-ին մասերով:

Ռազմիկը կալանքի տակ է 2016 թվականի հունիսի 29-ից:

Դատաքննությամբ պարզվել է, որ Ռազմիկ Ա.-ն 2016 թվականի մայիսի 16-ին ընկերուհու՝ Մաշայի (անունը փոխված է) հետ հեռախոսով խոսելու ընթացքում իմացել է, որ իր ծանոթ Սուրեն Մ.-ն (անունը փոխված է), ում հետ Մաշան նախկինում ընկերություն էր արել, իր վերաբերյալ անձնական գաղտնի տեղեկություն է հայտնել՝ ցանկանալով արատավորել իրեն:

Ռազմիկը զայրացել ու որոշել է մարմնական վնասվածք պատճառել Սուրենին:

2016 թվականի մայիսի 17-ին, ժամը 18-ի սահմաններում նա «ԲՄՎ» մեքենայով գնացել է Երևանի Դանիել Վարուժան և Իսրայել Օրի փողոցների խաչմերուկ, որտեղ տեսնելով Սուրենին՝ իր մոտ ապօրինի պահվող ատրճանակով երկու կրակոց է արձակել Սուրենի ուղղությամբ՝ նրան պատճառել է ձախ ստորին վերջույթի միջանցիկ վնասվածք, ներքին արյունահոսությամբ զուգորդված՝ բարակ աղիների միջանցիկ, սիգմանաձև աղու միջընդերքի, աջ զստային երակի վնասումներով, որովայնի խոռոչ թափանցող միջանցիկ հրազենային վնասվածք:

Կրակոցներից հետո Ռազմիկը մեքենայով հեռացել է դեպքի վայրից: Այնտեղ հավաքված մարդիկ Սուրեն Մ.-ին տեղափոխել են հիվանդանոց, որտեղ նա ենթարկվել է վիրահատության:

Տուժողի առողջությանը դիտավորությամբ ծանր վնաս հասցնելու և ապօրինի հրազեն ձեռք բերելու, պահելու համար ամբաստանյալ Ռազմիկ Ա.-ն իրեն մեղավոր է ճանաչել:

Նա հայտնել է, որ ինքնակամ ներկայացել է ոստիկանություն, խնդրել է իր հորը, որպեսզի նա հոգա տուժողի բուժման հետ կապված ծախսերը:

Ռազմիկը հայտնել է, որ արարքը կատարել է պահի ազդեցության տակ, առանց խոր մտածելու հետևանքների մասին, քանի որ հարցը վերաբերել է իր առողջական խնդրին, որի վերաբերյալ ընկերուհուն հայտնել է Սուրենը:

Նախաքննական ցուցմունքներում ամբաստանյալը հայտնել է, որ տուժող Սուրենին ճանաչել է, իմացել է, որ նա նախկինում ընկերություն է արել իր ընկերուհու՝ Մաշայի հետ: Ինքն իմացել է, որ Մաշան ու Սուրենն այլևս ընկերություն չեն անում, Մաշայի հետ խորացրել է ընկերությունը, իրենք որոշել են նշանվել և ամուսնանալ:

2016 թվականի մայիսի 16-ին ինքը հեռախոսով խոսել է Մաշայի հետ՝ քննարկել են իրենց նշանդրեքի հարցերը:

Մաշան ասել է, թե իրեն շատ կարևոր հարց ունի տալու: Նա հարցրել է՝ ճի՞շտ է, որ ինքը սեռական օրգանների հետ կապված խնդիր ունի:

Մաշայի հարցից ինքը, բնականաբար, միանգամից բորբոքվել է, քանի որ իրականում մի ամորձին բացակայում է, ինչի պատճառով ինքը ծանր ապրումներ է ունեցել, չի ցանկացել, որ Մաշան մինչև ամուսնությունն իմանա այդ մասին:

Ինքը պահանջել է, որ Մաշան ասի՝ ումից է իմացել: Մաշան չի ասել: Իրենք վիճել են:

Ամբողջ գիշեր ինքը եղել է լարված ու նյարդայնացած: Չի քնել: Հաջորդ օրը նորից զանգել է Մաշային ու պահանջել է ասել՝ ումից է իմացել: Մաշան չի ասել: Ինքը պայման է դրել՝ եթե նա չասի, իրենք կբաժանվեն:

Դրանից հետո Մաշան ասել է, որ Սուրենից է իմացել…

Մաշան պատմել է, որ փողոցում պատահական տեսել է Սուրենին, նա հարցրել է՝ շարունակո՞ւմ է Ռազմիկի հետ ընկերություն անել: Մաշան ասել է, որ պատրաստվում է նշանվել և ամուսնանալ Ռազմիկի հետ:

Սուրենը քմծիծաղ է տվել ու ասել է. «Էդ մի ձվանու հետ ի՞նչ գործ ունես…»:

Ինքը Մաշայի ասածից հետո ծայրահեղ բորբոքված վիճակում նստել է մեքենա, արագ գնացել է Սուրենի տան մոտ, որ նրան տեսնի, բայց չի տեսել:

Հետդարձին խաչմերուկում պատահական տեսել է նրան, չի կարողացել իրեն տիրապետել: Մեքենայի բեռնախցիկից վերցրել է ատրճանակը ու որոշել է Սուրենին պատժել՝ ցանկացել է կրակել նրա ամորձիներին, որ նա էլ նույն խնդիրն ունենա, ապրի առանց ամորձիների…

Զենքը ձեռքին մոտեցել է Սուրենին, երկու-երեք մետր հեռավորությունից զենքը պահել է նրա ամորձիների ուղղությամբ ու ասել է. «Հեսա կտեսնես՝ մի ձվանին ով ա»:

Կրակել է, կրակոցը դիպել է Սուրենի ոտքին: Նա ընկել է գետնին: Ինքը մի անգամ էլ է զենքն ուղղել Սուրենի ամորձիների շրջանին ու կրակել է: Սուրենը ցավից գոռացել է՝ բռնելով որովայնի ներքևի հատվածը:

Ինքը մտածել է, թե նպատակակետին է դիպել, այլևս չի կրակել, նստել է մեքենա ու հեռացել է: Հեռանալուց առաջ նկատել է, որ մարդիկ են հավաքվում, իմացել է, որ Սուրենին հիվանդանոց կհասցնեն:

Ռազմիկը նշել է, որ չի ցանկացել սպանել Սուրենին, եթե այդպիսի նպատակ ունենար, նշան կբռներ նրա գլխին կամ սրտին՝ կրակել է բավական մոտ տարածությունից, ոչ մի խանգարող բան չկար, որ սպաներ: Բայց ինքը ցանկացել է, որ նա չմահանա, այլ վնասված օրգանով ապրի: Հետո իմացել է, որ Սուրենի ամորձիները կրակոցների հետևանքով չեն վնասվել, նա վնասվածքներ է ստացել ոտքի ու որովայնի շրջաններում՝ վնասվել են աղիները…

Տուժողը ամբաստանյալի նկատմամբ բողոք, պահանջ չի ներկայացրել, նշել է, որ նրա հարազատները հատուցել են իր բուժման ծախսերը:

Դատարանը հաշվի է առել, որ ամբաստանյալը վատառողջ է: Բացի այդ՝ հանցագործությունը պայմանավորված է եղել տուժողի հակաբարոյական վարքագծով:

Ամբաստանյալը մեղավոր է ճանաչվել մեղսագրված արարքների համար ու վերջին հաշվով դատապարտվել է 4 տարի ազատազրկման: