Գեղեցիկը պետք է անուշ բույր ունենա․ «2A Milano»–ն ներկայացնում է հայկական բրենդի օծանելիք՝ արտադրված և շշալցված Իտալիայում

Գեղեցիկը պետք է հաճելի բույր ունենա․ հենց այս գաղափարից է ծնվել «2A Milano» հայկական բրենդը, որը ներկայացնում է հայկական օծանելիքներ՝ արտադրված և շշալցված Իտալիայի Միլան քաղաքում։

Ինչո՞ւ «2 A», որովհետև գաղափարի հեղինակները 2 աղջիկ են՝ 26-ամյա Անի Չիչոյանն ու 27-ամյա Անիտա Աբրամովան, իրենց անվան առաջին տառն են ընտրել, իսկ Միլանն օծանելիքի հայրենիքն է։

Երեկ կայացավ օծանելքի շնորհանդեսը, որին ներկա էին նորաձևության ոլորտի մի շարք ներկայացուցիչներ. լավ երաժշտության ներքո նրանք քննարկեցին բույրերն ու շնորհավորեցին աղջիկներին։ Tert.am Life–ը ներկայացնում է երեկոյի հետաքրքիր դրվագները։

«Առայժմ  ներկայացնում ենք 3 բույր՝ Davana, Cypress և Dark, սակայն մտադիր ենք ավելացնել բույրերը։ Ամեն անգամ ներկայացնելու ենք 3 նոր բույր։ Հետագայում ունենալու ենք նաև օծանելիքներ մազերի համար, բույրեր տան, բարձերի, մեքենաների համար»,– ասաց Անիտան, Անին էլ հավելեց, որ իր մոտ միտքը ծնվել էր տան համար բույրեր ստեղծելուց։

«Ես հագուստի մոդելավորող եմ, ունեմ նորաձևության իմ սրահը։ Միշտ երազել եմ ունենալ իմ խանութը, որտեղ մտնելիս հյուրերը ոչ միայն գեղեցիկ հագուստ կընտրեն, այլև կգերվեն բույրով։ Ուզում եմ իմ ստեղծած հագուստները բացի գեղեցիկ լինելը նաև անուշ բույր ունենան։ Ընկերական հավաքի ժամանակ բարձրաձայնեցի միտքս։ Պարզվեց՝ Անիտան ևս նման ցանկություն ունի։ Որոշեցինք միասին ստեղծել մոր բույրերը»,– պատմեց Անին։

Անին Երևանից է, Անիտան ապրում է Չեխիայում։ Աղջիկները մտադիր են բրենդը ներկայացնել նաև Չեխիայում և Եվրոպայի այլ երկրներում։ Առայժմ վաճառքն իրականացնում են օնլայն և ներկայացված են The house of SoHa-ում։

Աղջիկները հիշում են, որ օծանելիք ստեղծելու ընթացքը հեշտ չէր, հատկապես, քովիդի պայմաններում։ «Բոլոր բույրերը շատ հետաքրքիր են։ Ավելի քան 1 տարի աշխատել ենք այս բույրերը ստանալու համար։ Նախ՝ ընտրել ենք մեր ուզած բաղադրությունը։ Մասնագետն Իտալիայում ստանում էր բույրը, ուղարկում մեզ, ինչ–որ բաղադրիչներ ավելացնում կամ պակասեցնում էինք մինչև ստացանք վերջնական բույրերը։ Ամեն ինչ ավելի էր բարդանում, քանի որ քովիդով պայմանավորված սահմանափակումները երկարացնում էին աշխատանքը, սակայն մեզ համար կարևոր էր արտադրությունը Իտալիայում կազմակերպելը»,– ասաց Անին։

Անիտան էլ նկատեց, որ երկրի ընտրությունը պատահական չէր․ «Օծանելիքները տարբերվում են տոկոսային հարաբերությամբ։ Մենք ներկայացնում ենք  Extra de Parfum, որն օծանելիքի ամենաբարձր որակ ունեցող տեսակն է։ Այդ ամենն Իտալիայում ավելի որակյալ է ստացվում, քանի որ այնտեղ խորը մասնագիտացած են օծանելիք ստեղծելու հարցում»։

Երեկոյի ավարտին աղջիկները կազմակերպել էին նաև բարեգործական աճուրդ, որի հասույթը տրամադրվելու է «Հայ մայրեր» բարեգործական կազմակերպությանը։