Սուրբ Գրիգոր Լուսավորիչ եկեղեցում տեղի ունեցավ քահանայական ձեռնադրություն

Նոյեմբերի 21-ին, Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի օրհնությամբ, Երևանի Սուրբ Գրիգոր Լուսավորիչ մայր եկեղեցում կատարվեց քահանայական ձեռնադրություն: Հընթացս Սուրբ և Անմահ Պատարագի, ձեռամբ ԵՊՀ Աստվածաբանության ֆակուլտետի դեկան ու Երևանի Սուրբ Գրիգոր Լուսավորիչ մայր եկեղեցու հոգևոր տեսուչ Գերաշնորհ Տ. Անուշավան եպիսկոպոս Ժամկոչյանի, քահանայական ձեռնադրության և օծման արժանացան թվով 11 սարկավագներ:

Պատարագի սրբազան արարողության ընթացքում Անուշավան Սրբազանը քահանայության կոչեց նորընծաներին` Սրբալույս Մյուռոնով օծելով քահանանների ճակատներն ու ձեռքերը և շնորհելով նրանց նոր հոգևոր անուններ: Իշխան սարկավագ Գևորգյանը վերակոչվեց Տ. Տրդատ քահանա, Ավետիք սարկավագ Նահապետյանը՝ Տ. Տիրան քահանա, Սասուն սարկավագ Աշուղբաբյանը՝ Տ. Ներսես քահանա, Վաչագան սարկավագ Դոխոլյանը՝ Տ. Հուսիկ քահանա, Հմայակ սարկավագ Կարապետյանը՝ Տ. Արամ քահանա, Տիգրան սարկավագ Սիմոնյանը՝ Տ. Արտավազդ քահանա, Նարեկ սարկավագ Հակոբյանը՝ Տ. Սեպուհ քահանա, Սևակ սարկավագ Հակոբյանը՝ Տ. Տիգրան քահանա, Գևորգ սարկավագ Գևորգյանը՝ Տ. Մաղաքիա քահանա, Արշակ սարկավագ Հակոբյանը՝ Տ. Արտաշես քահանա և Բենիկ սարկավագ Հովհաննիսյանը՝ Տ. Հովհան քահանա:

Ձեռնադրության ավարտին նորաօծ քահանաներն իրենց անդրանիկ օրհնությունը փոխանցեցին ներկաներին: Այնուհետև ձեռնադրող Սրբազան Հայրը, իր քարոզում անդրադառնալով քահանայության կարևորությանը, մասնավորաբար ասաց. ««Կոշիկներդ հանի՛ր քո ոտքերից, որովհետև այն վայրը, ուր կանգնած ես, սուրբ է» (Ելք Գ 5): Աստվածային այս կանչն է, որ մեզ բոլորիս, իրարից տարբեր ժամանակներում բերել է այս սրբազան վայրը: Դարեր առաջ աստվածային այս բառերը լսեց Մովսես մարգարեն, ով փորձում էր մոտենալ անկեզ մորենուն: Այս խոսքերն այսօր աստվածադիր Սուրբ Սեղանից և նրա վրա ճառագող Լուսավորչի կանթեղից Ձեզ է ուղղված: Նայեցեք այդ լույսին հովվի աչքերով, ինչպես Մովսեսն էր նայում անկեզ մորենուն և այնտեղից կլսեք այդ ձայնը.

«Հանեցեք ձեր կոշիկները ձեր ոտքերից, որ մինչև այսօր քայլել են այս աշխարհի փոշիների մեջ, մաքրվեք այս աշխարհի տիղմից, որովհետև այն տեղը, որտեղ դուք կանգնած եք, որտեղ ուխտել եք հավատարմություն և խոնարհություն, որտեղից մխիթարություն և սուրբ հաղորդություն պիտի բաշխեք մեր հավատավոր ժողովրդին. Սուրբ երկիր է, սուրբ հող է»»:

Անդարադառնալով քահանայական պատասխանատու առաքելությանը՝ Անուշավան եպիսկոպոսն ընդգծեց. «Աստվածային խոսքի մշակներ լինելը լոկ խոսքով չի սահմանափակվում: Այն իր մեջ որքան ուրախություն ու քաղցրություն, այնքան էլ դառնություն և դժվարություն ունի: Քրիստոսի առաքյալ դառնալը միայն այս պահի կատարվածով և օծում ստանալով չի սահմանափակվում: Դուք ձեր ողջ կյանքի ծառայության ընթացքում պետք է ձգտեք դառնալ նվիրյալ քարոզիչն ու մշակը, խոնարհ սպասավորը մեր Եկեղեցու և արժանանանք՝ արտաքին և ներքին ընդվզումներից վշտացած ու մոլորված ժողովրդի իրական առաքյալի կոչմանը»։

Այնուհետև, դիմելով նորաօծ քահանա հայրերին, Սրբազանն իր բարեմաղթանքները փոխանցեց նրանց. «Սիրելի քահանա հայրեր, ցանկանում եմ, որ լինեք միշտ կանաչ, եղեք միշտ ջրառատ և այնպես եղեք, որ երբ մարդիկ ձեզ նայեն, ձեր խոսքերի միջից ձե՛զ չտեսնեն, այլ տեսնեն Քրիստոսին, տեսնեն Լուսավորիչին, տեսնեն Մեսրոպ Մաշտոցին, տեսնեն այն սուրբերին և հերոսներին, ովքեր իրենց կյանքը մատաղ արեցին, որպեսզի ազգի կյանքը միշտ փառավոր մնա, և դուք լինեք «մշակներ առանց ամոթի», լինեք տաճար Աստուծո և ունենաք այնպիսի ծառայություն, որ մեր Մայր Աթոռը իր հոգևոր ճառագայթումը առավել ուժեղացնի մեր ողջ ժողովրդի կյանքում հավիտյանս»։

Վերջում Սրբազան Հայրը ևս մեկ անգամ աղոթք վերառաքեց առ Աստված՝ խնդրելով երկնավոր Տիրոջից, որ յոթնարփյան շնորհներով լցնի նորաօծ մյուռոնաբույր քահանա հայրերին, մայր Եկեղեցին և Հայրենիքը։

Ապա Մայր Աթոռի միաբանները և ներկա հոգևորականաց դասը բարձրացան Սուրբ Խորան, շնորհավորեցին քահանաներին և համբուրեցին վերջիններիս մյուռոնաբույր ճակատներն ու ձեռքերը` ստանալով անդրանիկ «Ողջույն»-ը:

Նորաօծ 11 քահանաները Մայր Աթոռ Սուրբ Էջմիածնում կանցկացնեն քառասնօրյա պատրաստության և աղոթքի շրջան, որից հետո ծառայության կկոչվեն Հայ Եկեղեցու տարբեր կառույցներում և թեմերում: