Երվանդ Բոզոյան. «Հին մարդկանց հանդեպ ժողովուրդը հակակրանք ունի և կապ չունի նա իշխանության մեջ է, թե ընդդիմության». «Փաստ»

«Փաստ» օրաթերթը գրում է.

Օրեր առաջ ՀՀ նախագահի հրամանագրերով իրենց պաշտոններում վերանշանակվեցին բոլոր նախարարները բացի Արփինե Հովհաննիսյանից, ում փոխարեն Արդարադատության նախարար նշանակվեց Դավիթ Հարությունյանը:

Կառավարության այս վերանշանակումների, նախարարների փոփոխության անհրաժեշտության հետ կապված «Փաստը» զրուցել է քաղաքագետ Երվանդ Բոզոյանի հետ:

Ըստ Բոզոյանի՝ սրանք մեծ հաշվով ֆորմալ նշանակումներն են և հանրությունը դրանում շատ մեծ հատաքրքություն չի ունենա: Հարցին, թե արդյո՞ք փոփոխության կարիք չկար և կամ կառավարումն արդյունավե՞տ էր, քաղաքագետը պատասխանեց, որ այս երկրում շատ բանի կարիք ունենք: Բայց վերջինս չի կարծում, որ հիմնական ուշադրությունը հենց այդ ուղղության վրա պիտի դարձնենք:

«Ի վերջո ցանկացած գործադիր իշխանություն ձևավորվում է ընտրությունների արդյունքում: Ընտրությունները եղել են ապրիլի 2–ին: Կարծում եմ, որ հասարակությունը պետք է հետևություններ անի: Ինչ ընտրություն նա կատարել է, այդպիսի գործադիր իշխանություն էլ պետք է ունենա: Ես չեմ ուզում ասել վատ է կամ լավ: Սա այսօրվա Հայաստանի օբյեկտիվ իրականությունն է: Այստեղ զարմանալ կամ տխրել պետք չէ: Միգուցե կան նախարարներ, որոնց հասարակությունը կցանկանար փոխել, բայց սրանք բոլորը երկրորդական խնդիրներ են և ես չեմ կարծում, որ հասարակությունը շատ հետաքրքրված է այդ խնդրով»,– ասաց նա:

Քաղաքագետի խոսքով հասարակության մեջ ինչ–որ սպասումներ կան, որը ցույց տվեցին ընտրությունները, քանի որ ի վերջո ընտրությունների հիմնական դեմքը իշխող ուժի կողմից վարչապետն էր: Վերջինս կարծում է, որ այդ սպասումը մասամբ կատարվել է:

«Իհարկե ընտրակաշառքի գործոնը շատ մեծ է եղել, բայց նաև հասարակությունը այլընտրանք չտեսավ այս ամենին: Այն, ինչ այսօր կատարվում է տեխնիկական խնդիրներ են ու լուծումներ, որոնցից հասարակությունը շատ մեծ սպասում չունի: Ասել, թե հասարակությունը ուզում էր, որ այս նախարարը նշանակվեր, բայց նա չնշանակվեց, սուտ կլինի: Իմ կարծիքով պարապ լինելու ժամանակ մարդիկ փորձում են ինչ–որ բաներ մոգոնել, որպեսզի հետաքրքիր դարձնեն կյանքը»,– նշեց Երվանդ Բոզոյանը:

Հարցին, թե այն թիմը, որ ունի Կարեն Կարապետյանը արդարացրե՞ց իրեն անցած 7 ամիսների ընթացքում և կամ այն քաղաքականությունը, որը որդեգրել էր նա, արդյո՞ք ճիշտ էր ընտրված, քաղաքագետը պատասխանեց, որ համենայն դեպս Կարեն Կարապետյանը իր թիմը բերեց և տնտեսական բլոկն առնվազն իր թիմն է:

«Ես գործարար չեմ, բայց շատ գործարար ընկերներ ունեմ, որոնց արձագանքը դրական է: Այսինքն` մարդիկ որոշակի սպասումներ ունեն: Իհարկե բազմաթիվ սպասումներ կան, որ չեն արդարացվել, բայց զգալի բաներ էլ արդարացվել էն, մասնավորապես՝ մաքսային համակարգի հետ կապված որոշակի բարելավումներ կան»,– նշեց նա:

Ըստ նրա՝ հասարակությունն այսօր հիասթափված և հոգնած վիճակում է, հոգնած հասարակությունն ունի հոգնած քաղաքական վերնախավ և այդպիսի մթնոլորտում լուրջ փոփոխություններ անելը շատ դժվար է՝ պրակտիկորեն անհնար: «Հասարակությունը պետք է վերելքի մեջ լինի, պետք է ապրի: Հասարակությունը պետք է հավատա իր ապագային, որպեսզի այս կամ այն գործիչից էլ սպասում ունենա և այդ գործիչն էլ ակտիվ քայլեր անի, որոնց հիման վրա էլ գնահատականներ տանք:

Երբ հասարակությունը այսօրվա դրությամբ հոգնած վիճակի մեջ է և սպասում չունի, քաղաքական վերնախավն էլ գոյություն չունի, իշխանությանը մարդիկ մեծամասամբ չեն վստահում: Ընդդիմությունն էլ ոչնչացված վիճակի մեջ է, որովհետև այն ինքնաոչնչացմամբ է զբաղվել, այսինքն՝ իրենք իրենց մանր ամբիցիաների արդյունքում կոլեկտիվ ինքնասպանություն կատարեցին, և այսօր հասարակության մեջ նոր քաղաքական վերնախավի պահանջ կա: Հին մարդկանց հանդեպ արդեն ժողովուրդը հակակրանք ունի և կապ չունի հին մարդը իշխանության մեջ է, թե ընդդիմության: Մարդիկ պահանջում են նոր մարդկանց, որպեսզի նոր մարդիկ ներկայացնեն իրենց թե՛ իշխանության մեջ, թե՛ ընդդիմության»,– ասաց Երվանդ Բոզոյանը:

Շարունակությունը` «Փաստ» օրաթերթի այսօրվա համարում