«Մենք չպետք է կանգ առնենք ոչնչի առաջ մեր ինքնիշխանությունն ու անկախությունը պաշտպանելիս». Լուկաշենկոն սպառնացել է դադարեցնել գազի տարանցիկ փոխադրումը Եվրոպա

Բելառուսի նախագահ Ալեքսանդր Լուկաշենկոն սպառնացել է Եվրամիությանը պատժամիջոցների ընդլայնման դեպքում դադարեցնել գազի տրանզիտը Եվրոպա, որն անցնում է Յամալ-Եվրոպա գազատարով:

«Մենք տաքացնում ենք Եվրոպան, նրանք դեռ սպառնում են մեզ, որ կփակեն սահմանը: Իսկ եթե մենք փակե՞նք այնտեղ գնացող բնական գազը: Այդ իսկ պատճառով Լեհաստանի ղեկավարությանը, լիտվացիներին և մյուս անգլուխներին խորհուրդ կտայի մտածել խոսելուց առաջ: Սակայն դա նրանց գործն է: Կփակեն, թող փակեն: Սակայն ԱԳՆ-ն պետք է նախազգուշացնի բոլորին Եվրոպայում. եթե նրանք մեր նկատմամբ հավելյալ պատժամիջոցներ սահմանեն, մեզ համար «անմարսելի» և «անթույլատրելի», մենք պետք է կպատասխանենք: Ինչպես պատասխանենք, մենք ձեզ հետ պայմանավորվել ենք կես տարի առաջ»,- «Կոմերսանտ»-ի փոխանցմամբ՝ ասել է Լուկաշենկոն երկրի կառավարության հետ խորհրդակցության ժամանակ:

«Իսկ եթե մենք փակե՞նք տրանզիտը Բելառուսի տարածքով: Ուկրաինայի տարածքով չի անցնի. այնտեղ ռուսական սահմանը փակ է, Մերձբալթիկայով ճանապարհ չկա: Եթե մենք փակենք լեհերի համար և օրինակ գերմանցիների համար, ի՞նչ կլինի այդ ժամանակ: Մենք չպետք է կանգ առնենք ոչնչի առաջ մեր ինքնիշխանությունն ու անկախությունը պաշտպանելիս», - հավելել է Լուկաշենկոն:

Նախօրեին Եվրահանձնաժողովի նախագահ Ուրսուլա ֆոն դեր Լյայենը ԱՄՆ նախագահ Ջո Բայդեն հետ հանդիպումից հետո հայտարարել է, որ Եվրամիությունը հաջորդ շաբաթ կընդլայնի պատժամիջոցները Բելառուսի դեմ: Նրա խոսքով՝ ԱՄՆ-ն նույնպես պատժամիջոցներ է պատրաստել Բելառուսի դեմ:

Հիշեցնենք, որ ԵՄ-ն Բելառուսին մեղադրում է Լեհաստանի հետ սահմանին ստեղծված ճգնաժամը հրահրելու համար, քանի որ Բելառուսի տարածքով հազարավոր ներգաղթյալներ փորձում են անցնել ԵՄ տարածք: