Վահագն Խաչատրյան. «Հայաստանի ներդրողների ակումբը դեռ գոյություն չունի». «Փաստ»

«Փաստ» օրաթերթը գրում է.

«Եթե Հայաստանի ներդրողների ակումբը լիներ, մինչ այժմ պիտի ներդրումներ լինեին, եթե ներդրումներ չկան, ուրեմն ակումբը չկա, գոյություն չունի»,– «Փաստի» հետ զրույցում անդրադառնալով վարչապետ Կարեն Կարապետյանի նախաձեռնած «Հայաստանի ներդրողների ակումբին», ասաց ՀԱԿ տնտեսագետ Վահագն Խաչատրյանը՝ հավելելով. «Եթե ինչ–որ մեկը լինի, որ ներդրում արած լինի, այդ ժամանակ կխոսենք»:

Նշենք, որ դեռ ձմռանը վարչապետ Կարեն Կարապետյանի և Ռուսաստանի Դաշնության հայկական սփյուռքի 3 տասնյակից ավելի գործարարների մասնակցությամբ տրվեց «Հայաստանի ներդրողների ակումբ» ոչ հրապարակային պայմանագրային ներդրումային ֆոնդի գործունեության մեկնարկը: Ըստ այդմ՝ հունվարի 25–ին ռուսաստանաբնակ հայազգի գործարար շրջանակների ներկայացուցիչները հայտարարություն էին տարածել՝ Հայաստանում խորը բարեփոխումներ անցկացնելու գործընթացին աջակցելու և ՀՀ կառավարության հետ համատեղ նախաձեռնություններին և բիզնես–ծրագրերին մասնակցելու վերաբերյալ։

«Իրականում այս ակումբը մեզ համար բեկումնային է լինելու ոչ միայն նրա համար, որ գալու են առողջ, երկարատև ներդրումներ, երկարատև բիզնես ծրագրեր, այլև մենք ունենալու ենք կորպորատիվ նոր մշակույթ: Մեր քաղաքացիների հետ հանդիպման ժամանակ ես բազմիցս ասել եմ. բազմաթիվ երկրներ, որոնք վերջին 20–30 տարում որակ են փոխել, կանգնած են եղել ոչ պակաս խնդիրների առջև, քան մենք ունենք: Բայց նրանց համարձակությունը, հավակնոտ ծրագրերը, պրագմատիկ և ռացիոնալ լինելը, կամքը, նպատակասլացությունը, որոշ դեպքերում՝ կոշտությունը բերել են նրան, որ իրենք երկիր են փոխել: Ինչո՞ւ մենք չենք կարող լավ երկիր ունենալ, ինչո՞ւ ուրիշները կարող են, մենք՝ ոչ»,– իր խոսքում ասել էր վարչապետը՝ հավելելով, որ «Հայաստանի ներդրողների ակումբի» յուրաքանչյուր անդամն իր պատմությամբ, իր օրինակով ստեղծել է բիզնես կայսրություն, և գալով Հայաստան՝ նրանք որակ են փոխելու:

Տնտեսագետ Վահագն Խաչատրյանը նկատում է, որ չնայած մեծ խոստումներին, ակումբի շրջանակներում ներդրումներ դեռևս չեն արվել. «Վարչապետը խոստացել է մոտ 3,5 մլրդ դոլարի ներդրում, որից 800–ից ավելին հիմա, սակայն այն ներդրումները, որ կան, պայմանավորված չեն գործող կառավարության գործունեությամբ, դրանք նախորդ տարիներին իրականացված ներդրումներն են, որոնց մի մասն այս տարի պետք է իրականացվի: Որևէ տեղ ներդրում դեռևս չի արվել»,– ասաց Խաչատրյանը:

Նախընտրական շրջանում վարչապետ Կարեն Կարապետյանն ու իր թիմը հայտարարում էին իրենց կառավարության պաշտոնավարած ամիսներին արձանագրած բարձր ցուցանիշների, տնտեսական աճի մասին, մինչդեռ տնտեսագետը էական փոփոխություն չի տեսնում անցյալ տարվա և այս տարվա ցուցանիշներում: «Հարկային մարմինների կողմից հրապարակված փաստաթղթում գերավճարների աճ է տեղի ունեցել: Ես կարող եմ ինձ թույլ տալ ասել, որ դա տեղի է ունեցել կանխավճարների հաշվին: Եվ այդ արատավոր երևույթի արդյունքում հարկային մարմինները հրապարակել են, որ ստվերը կրճատել են 16–17 տոկոսով, թե ոնց են կրճատել, որտեղից են կրճատել, դա արդեն իրենց հաշվարկներն են, ես իրենց հաշվարկներին չեմ հավատում, քանի որ Հայաստանում ստվերը դասական իմաստով գոյություն չունի, ստվերի մեծ մասը իշխանության հսկողության ու հովանավորության տակ է»:

Ըստ տնտեսագետի՝ առաջին անհրաժեշտության ապրանքների թանկացումները, այդ թվում՝ սննդամթերքի, ընտրությունների արդյունք են, քանի որ միջազգային շուկաներում գների էական փոփոխություններ տեղի չեն ունեցել:

Շարունակությունը` «Փաստ» օրաթերթի այսօրվա համարում