Խաչիկ Ասրյան. Փաշինյան Նիկո՛լ, Արցախի և «Զանգեզուրի միջանցք»-ի հաշվին թուրքերի հետ խաղաղության պայմանագիր երբեք չկնքես…

Ադրբեջանի սուլթան Իլհամ Ալիևը ՄԱԿ-ի հեռավար ամբիոնից հերթական անգամ հայտարարեց, որ Հայաստանից պահանջում է ճանաչել հորինված Ադրբեջանի տարածքային ամբողջականությունը, ինչը հայերիս համար նշանակում է.

● Հրաժարվել Արցախից,

● Ականատեսը լինել Ադրբեջանում Հայերի դեմ իրականացված ցեղասպանության շարունակությանը,

● Ադրբեջանից Նախիջևան միջանցքի բացում:

Այսինքն՝ լուռ հետևել Հայաստանի Հանրապետության տարածքային ամբողջականության և ինքնիշխանության դեմ իրականացվող բարբարոսությանը:

Հերթական անգամ նշելով, որ «Հայոց Արծիվներ. Միասնական Հայաստան» կուսակցությունը մերժո՛ւմ է Ադրբեջանի և Թուրքիայի հետ հաշտեցման որևէ օրակարգ, քանի դեռ չի վերականգնվել պատմական արդարությունը, այն է՝ Հայաստանը չի վերականգնել իր ինքնիշխանությունը մեր պատմական Հայրենիքի կորսված տարածքների նկատմամբ, պահանջո՛ւմ ենք, որ Հայաստանի իշխանությունը ոչ միայն հրաժարվի հաշտության և խաղաղության պայմանագիր կոչված օրակարգից, այլ հստակ պահանջներ ներկայացնի Ադրբեջանին: Հայաստանի կողմից այս պահին Ադրբեջանին պետք է ներկայացվեն հետևյալ պահանջները.

● Հայաստանի ինքնիշխան տարածք ներխուժած ադրբեջանական հրոսակներին անհապաղ դուրս հանել Հայաստանի տարածքից,

● 44-օրյա պատերազմի պատճառով Ադրբեջանում գտնվող բոլոր Հայ գերիներին անհապաղ ազատել և վերադարձնել Հայաստան,

● Արցախի հայության ինքնորոշման և Արցախում ապրելու ու արարելու իրավունքն անհապաղ ճանաչել,

● Ադրբեջանը, որպես 44-օրա պատերազմի սադրիչ, պատերազմի հետևանքների համար և պատերազմում զոհված հայորդիների ընտանիքներին պետք է հատկացնի փոխհատուցում և Արցախին հետ վերադարձնի 44-օրյա պատերազմի ժամանակ գրաված Արցախի տարածքները:

Հայաստանի իշխանությունը պարտավոր է սպասարկել բացառապես Հայաստանի և Հայ ազգի ազգային պետական շահը, այլ, ոչ թե հանուն սեփական իշխանության պահպանման, ստանձնի ադրբեջանաթուրքական պետությանը ծառայելու հպատակի իր գործառույթները:

Հայաստանի իշխանության կողմից ցանկացած զիջում Ադրբեջանին՝ ընկալելու ենք որպես կապիտուլյացիոն քաղաքականության և թուրքական օրակարգին աջակցելու ու առաջ մղելու դավաճանական գործողություն:

44-օրյա պատերազմի պարտության ծանր հետևանքները թոթափող Հայ ժողովուրդը շատ շուտով ցույց է տալու իր իրական կարողություններն ու հնարավորություններն ինչպես արտաքին ուժերին, այնպես էլ Հայաստանի իշխանությունը բռնազավթած թրքահպատակներին:

Փաշինյան Նիկո՛լ, Արցախի և «Զանգեզուրի միջանցք»-ի հաշվին թուրքերի հետ խաղաղության պայմանագիր երբեք չկնքես…

 

«Հայոց Արծիվներ. Միասնական Հայաստան»

կուսակցության Առաջնորդ,

«Մարտական Խաչ» 1-ին աստիճանի շքանշանակիր,

«Հայոց Արծիվներ» կամավորական ջոկատի

հրամանատար, գնդապետ՝ Խաչիկ Ասրյան