Պատկան մարմինների ուժը կպատի՞ ագրեսիվ ուսուցչուհուն պատժելու համար. «Փաստ»

«Փաստ» օրաթերթը գրում է.

Արագածոտնի մարզի Արագածավան համայնքի թիվ 1 դպրոցում ուսուցիչների միջև ընդհարում է եղել: Դեպքը տեղի է ունեցել դասամիջոցի ժամանակ, երբ դպրոցի աստիճանների վրա երկու ուսուցչուհի, դեմ հանդիման են դուրս եկել: «Փաստի» տվյալներով ուսուցչուհիներից մեկը ճանապարհ չտալով մյուսին, այնպես է նրան հրել, որ մյուս ուսուցչուհին աստիճաններից գլորվելով գահավիժել է ներքև և վնասվածքներով տեղափոխվել հիվանդանոց: Տուժած ուսուցչուհուն տրվել է նաև դատաբժշկական փորձագիտական եզրակացություն, որտեղ նշված է, թե աստիճաններից ցած գլորվելու հետևանքով ստացված վնասվածքներն ինչ բնույթի ու ծանրության են:

Այս ամենին ականատես են եղել ուսուցչական կազմի որոշ անդամներ և աշակերտներ, սակայն դպրոցի տնօրինության և ոստիկանության հետ գործ չունենալու համար բոլորն էլ խուսափում են այդ մասին խոսել:

Դեպքի առթիվ ոստիկանությունում քրեական գործ է հարուցվել: Այս պահին հետաքննություն է իրականացվում, բայց մեր տվյալներով դպրոցի ողջ ուսուցչական կազմը բաժանվել է երկու մասի: Մի մասը փորձում է մանրամասները պարտակել և հոգեբանական ճնշում գործադրել տուժած ուսուցչուհու վրա: Ուսուցչական կազմի մյուս մասը, ովքեր վատամարդ չդառնալու համար համեմատաբար չեզոք դիրք են գրավել, կարծում են, որ ագրեսիվ ուսուցչուհուն այնուամենայնիվ պետք է իր տեղը ցույց տալ և նաև հիշեցնել, թե իրականում մանկավարժի կոչում ունեցող անձն ինչպես պետք է իրեն պահի կրթական հաստատությունում, առավել ևս աշակերտների ներկայությամբ:

Ուսուցչական կազմի պասիվ ու ակտիվ դիրք գրաված անդամների միջև սկսված այս «բազարն» ինչով կավարտվի՝ ժամանակը ցույց կտա, բայց հետաքրքիր է, որ ազգի զավակներից՝ աշակերտներից ազգի հերոսներ կերտելու փոխարեն Արագածավանի թիվ 1 դպրոցում ուսուցիչների թեթև ձեռքով հնարավոր է՝սուտասաններ ու կեղծարարներ դաստիարակվեն: Ու թեև երեխաները դեռ փոքր են և շատ բան չեն էլ կարող հասկանալ, թե իրականում ինչ խորքային պատճառով է իրենց դպրոցում մի ուսուցչուհին մյուսին հրել և աստիճաններից վայր գցել, բայց որ ագրեսիվ այդ դրսևորումը, ճշմարտության պարտակումն ու առավել ևս մեղավոր ուսուցչուհուն չպատժելը կարող է օրինակ դառնալ այդ փոքրիկների ողջ կյանքի համար, միանշանակ է:

Մեղավորներին գտնելու և պատժելու գործը թողնելով պատկան մարմիններին, այս պահին մեր հարցն ուղղում ենք ՀՀ կրթության և գիտության նախարարությանը, թե արդյոք տեղյակ են այս դեպքի մասին և ինչ քայլեր են ձեռնարկվել այս հարցի արդարացի լուծմանն օժանդակելու համար: Ասվածին հավելենք նաև, որ հարցի մասին ահազանգ հնչեցնելուց բացի ուշի ուշով հետևելու ենք և հասարակությանը ներկայացնելու ենք, թե ինչ հանգուցալուծում ստացավ ուսուցիչների այս «գործը» և արդյոք ոստիկանությանը հաջողվե՞ց «գտնել» իրական մեղավորին:

Շարունակությունը` «Փաստ» օրաթերթի այսօրվա համարում