Հայկ Խանումյան. «Ի պաշտպանություն Սամվել Բաբայանի ակցիաներ պետք է կազմակերպվեն Երևանում, ոչ թե Արցախում». «Փաստ»

«Փաստ» օրաթերթը գրում է.

Արցախի Պաշտպանության բանակի նախկին հրամանատար Սամվել Բաբայանը, ով խորհրդարանական ընտրությունների նախաշեմին կալանավորվեց «Իգլայի» գործով, ինչպես հայտնի է, դատարանի որոշմամբ շարունակելու է մնալ կալանքի տակ: Նրա կալանքը ևս երկու ամսով երկարաձգվել է: Սամվել Բաբայանի պաշտպան Ավետիս Քալաշյանը մամուլում հերքել է տեղեկությունը, թե գործով նոր ապացույցներ են բերվել դատարան՝ հայտարարելով, որ որևէ նոր ապացույց չկա:

Անցյալ ամռանը, երբ Սամվել Բաբայանը նոր էր վերադարձել Հայաստան և Արցախ, նրա համախոհ, ԼՂՀ ԱԺ պատագամավոր, «Ազգային վերածնունդ» կուսակցության նախագահ Հայկ Խանումյանը բազմամարդ ակցիայով դիմավորեց նրան՝ ԼՂՀ նախագահից պահանջելով պաշտպանության նախարար նշանակել Սամվել Բաբայանին:

Ներկայացնում ենք «Փաստի» զրույցը ԼՂՀ ԱԺ պատգամավոր Հայկ Խանումյանի հետ:

– Պարոն Խանումյան, երբ Սամվել Բաբայանը նոր էր վերադարձել և այցելեց Ղարաբաղ, Դուք ակցիա կազմակերպեցիք և դիմավորեցիք նրան, ինչո՞ւ հիմա ակցիաներ չկան, երբ նա բանտարկվել է:

– Ակցիաներ թող Երևանում կազմակերպեն, Հայաստանի իշխանություններն են չէ՞ գործ սարքել նրա գլխին և կալանավորել: Հայաստանի հասարակությունն էլ, եթե մտահոգված է էդ հարցով... Այսինքն՝ Ստեփանակերտը չէ, էլի, այն վայրը, որտեղ ակցիա պիտի կազմակերպվի, այդ վայրը Երևանն է: Ընտրություններում Բաբայանի ներգրավվածությունը պետք է վերլուծել: Կարծում եմ, ՕՐՕ–ն մի շարք ստրատեգիական սխալներ թույլ տվեց:

– Կոնկրետ Սամվել Բաբայա՞նն էլ էր սխալներ թույլ տվել, որ հայտնվեց մեկուսարանում:

– Չէ, հայտնվել–չհայտնվելու մասին չի խոսքը: Խոսքը մարտավարության ընտրության, թիմի ձևավորման սկզբունքների ընտրության և նմանատիպ հարցերի մասին է և ոչ թե ընդհանրապես մասնակցության:

– Իսկ ՕՐՕ դաշինքի լռությունը Սամվել Բաբայանի կալանավորման հետ կապված ճի՞շտ եք համարում:

– Քանի որ իրենց հետ անձնական շփում չունեմ, դժվարանում եմ գնահատական տալ իրենց քայլերին կամ հայտարարություններին, որովհետև պետք է նաև մարդկանց քայլերի դրդապատճառները հասկանալ, կարծիքները լսել: Դրա համար զերծ կմնամ այդ հարցին պատասխանելուց:

– Այնուամենայնիվ, չե՞ք կարծում, որ ՕՐՕ դաշինքը պետք է ավելի ակտիվ պաշտպաներ Սամվել Բաբայանին, եթե նա իրոք անմեղ է:

– Ես վստահ եմ, որ ինքն անմեղ է, և էդ գործն ամբողջովին սարքված է, բայց չգիտեմ՝ ուղղակի նման պայմաններում ինչ կարելի է անել, որովհետև ամեն ինչ կատարվել է շատ ցինիկ ձևով, որևէ փաստի բացակայության պայմաններում և նպատակը եղել է այն, որ ցույց տան, որ ցանկացածին կարող են կալանավորել և պահել մեկուսարանում: Տվյալ պարագայում, երբ մի հոգի է երկրում որոշում ամեն ինչ, չկա հակակշիռների, հակազդեցության որևէ մեխանիզմ, ես անձամբ չգիտեմ, թե ինչ կարելի է անել: Հետևաբար կդժվարանամ նաև ՕՐՕ–ի արածներին կամ չարածներին գնահատական տալ: Ինչ վերաբերում է մեզ, մենք գնացել էինք դիմավորելու Բաբայանին և դժգոհություններ ունեինք պատշպանության ոլորտում վարվող քաղաքականությունից, փորձում էինք այդ հարցն օգտագործել նաև ճնշումներ գործադրելու թե՛ Ստեփանակերտի, թե՛ Երևանի իշխանությունների վրա՝ պաշտպանության ոլորտին ավելի մեծ ծախսեր, ավելի մեծ ուշադրություն հատկացնելու համար: Հետևաբար մեր նպատակներն ամբողջովին տարբերվում էին այսօրվա իրավիճակից:

– Պարոն Խանումյան, թեև նոր ապացույցներ, ըստ փաստաբանի, չկան, ընտրություններն էլ ավարտվեցին, կրկին երկարացվեց Սամվել Բաբայանի կալանքը: Ձեր կարծիքով, ի՞նչ պատճառով է Բաբայանը դեռ պահվում անազատության մեջ:

– Երևի գործը սարքողին պիտի էդ հարցը տալ, բայց երևի որոշ մարդիկ անցյալի ծանր հուշեր ունեն, դրա համար էլ չեն կարողանում սովորական գործ սարքողի մակարդակից բարձրանալ: Իմ կարծիքով, հիմնական պատճառը դա է:

– Արդեն տևական ժամանակ է՝ Արցախում նոր Սահմանադրությունը մտել է ուժի մեջ, ինչ է փոխվել կառավարման համակարգում, ինչ փոփոխություններ կան, և Դուք դա ինչպե՞ս եք գնահատում:

– Որոշ դրույթներ դեռ ուժի մեջ չեն մտել, այժմ տեղի է ունենում համապատասխանություն Սահմանադրությանը: Ինչ վերաբերում է կառավարման ոլորտի փոփոխություններին, ապա դրանք զգալի կլինեն նախագահ Սահակյանի պաշտոնավարման ավարտի ժամանակ՝ ԱԺ սեպտեմբերյան նիստում: Դրանից առաջ՝ հավանաբար հուլիսին, ԱԺ–ի կողմից կընտրվի Արցախի նոր նախագահ և կաբինետ: Կարծում եմ, կընտրվի Բակո Սահակյանը, քանի որ որքան տեսնում եմ, կառավարող ուժերը միայն նրան են տեսնում թեկնածու: Այդպիսով՝ տեղի է ունենալու մանիպուլյացիայի միջոցով մեկ անձի վերարտադրության իշխանություն, ինչը բերելու է բացասական հետևանքների: Նոր Սահմանադրությունը Բակո Սահակյանի վերատադրության հարցը լուծեց:

Շարունակությունը` «Փաստ» օրաթերթի այսօրվա համարում