Որևէ մասնագետ չի ցանկացել իր անունը կապել պետական դավաճանության հետ, նախընտրել են մեկին, ում համար «հայրենիք» հասկացողություն չկա․ Ղազինյանը՝ Գրիգորյանի՝ ԱԳ նախարարի պաշտոնում հնարավոր նշանակման մասին

«Մեկ Հայաստան» կուսակցության նախագահ, «Հայաստան» դաշինքի անդամ Արթուր Ղազինյանի խոսքով՝ ակնհայտ է, որ իշխող քաղաքական ուժն ունի կադրային շատ լուրջ դեֆիցիտ, չունի մասնագիտացված, բարձր պրոֆեսոինալիզմով կադրային բանկ, որովհետև մասնագետները հրաժարվում են ուղղակի աշխատել այս նրանց հետ՝ ունենալով արժանապատվություն և հայրենասիրություն։

Նա Tert.am-ի հետ զրույցում նման դիտարկում արեց՝ անդրադառնալով Անվտանգության խորհրդի արդեն նախկին քարտուղար Արմեն Գրիգորյանի՝ արտաքին գործերի նախարարի առաջին տեղակալի պաշտոնում նշանակվելուն և խոսակցություններին, որ նա հավակնում է զբաղեցնել նաև արտգործնախարարի պաշտոնը։

«Պետք է նախ գնահատել տվյալ անձի վերջին 3 տարիների ծավալած գործունեության աշխատանքային ունակությունները և գաղափարական հենքը։ Լինելով Հայաստանի անվտանգային քաղաքականության մշակման համար պատասխանատու և լիազորված միակ և բացառիկ մարմնի ղեկավար կազմում՝ ամբողջությամբ տապալել է Հայաստանի անվտանգային քաղաքականությունը բոլոր ոլորտներում՝ սկսած ռազմականից, վերջացրած դեմոգրաֆիականով, տնտեսականով և իրավականով։ Նա կատարելապես ձախողված քաղաքական գործիչ է և որևէ հաջողության իր կյանքում չի հասել»,- ասաց նա։

Հիշեցնենք, որ վարչապետի պաշտոնակատար Նիկոլ Փաշինյանի որոշմամբ՝ Արմեն Գրիգորյանն ազատվել էր Անվտանգության խորհրդի քարտուղարի պաշտոնից և նշանակվել արտաքին գործերի նախարարի առաջին տեղակալ։

Նշենք նաև, որ ArmLur.am-ը գրել էր, որ իշխանությունները վերջնական որոշում են կայացրել, և կառավարության ձևավորումից հետո արտաքին գործերի նախարարի պաշտոնում նշանակվելու է Արմեն Գրիգորյանը, չնայած նրան, որ հիմնական թեկնածուներից էր ՀՀ փոխվարչապետ Մհեր Գրիգորյանը:

Հավելենք նաև, որ որ Արմեն Գրիգորյանը ՀՀ Անվտանգության խորհրդի քարտուղար էր նշանակվել 2018 թվականի մայիսի 17-ին։

Արթուր Ղազինյանի մատնանշմամբ՝ եթե սրանից 3 տարի առաջ ենք գնանք, կնկատենք, որ Արմեն Գրիգորյանը զբաղվել է միջազգային ֆինանսավորմամբ կազմակերպությունում հակակոռուպցիոն ծրագրերով, չունի ոչ մի մասնագիտական պրոֆիլավորում անվտանգության և հատկապես արտաքին քաղաքականության ոլորտում։

«Եզրակացությունն այստեղ պետք է անել երկու դաշտում՝ առաջինը քաղաքական, որ Հայաստանը վերցնում է այն ուղղությունը, որի մասին երկար ժամանակ ահազանգում, տագնապ էի հնչեցնում․ տեղի է ունենում Հայաստանի անջատում հայ-ռուսական հարաբերությունների տիրույթից և առավել սերտ ինտեգրում թուրքական, ադրեբեջանական ընդհանրության մեջ։ Երկրորդը այն է, որ այդ սուբյեկտը համաձայնվել է իր վրա վերցնել ապագայում սպասվող զգայուն, բարդ հարցերի լուծման դիվանագիտական ճակատի ամբողջ պատասխանատվությունը»,-ասաց նա։

Նրա համոզմամբ՝ մենք այս դեպքում գործ ունենք բացառապես քաղաքական նշանակման հետ՝ Հայաստանի համար ցավոտ, բարդ խնդիրների լուծման մանդատի հետ։   

«Որևէ մասնագետ, պրոֆեսիոնալ չի ցանկացել իր անունը կապել այս պետական դավաճանության մասշտաբային ծրագրի հետ, հետևաբար նախընտրել են մեկին, ում համար հայրենիք հասկացողություն գոյություն չունի, ում համար ազգային արժանապատվություն գոյություն չունի։ Նա պատրաստ է կատարել ցանկացած քայլ, որն իրենից կպահանջի այս իշխանությունը»,- ասաց նա։

Արմեն Գրիգորյանի նշանակմամբ, ըստ Արթուր Ղազինյանի, ՀՀ ներկայիս իշխանությունները չեն վախենում խնդիրներ ստեղծել Ռուսաստանի հետ հարաբերություններում, քանի որ, ինչպես ինքն է վստահ՝ նրանք հետևողական կատարում են իրենց՝ Հայաստանը Ռուսաստանից անջատելու ծրագիրը։

«Այսինքն՝ նրանք ընտրել են թուրքական վեկտորը, որովհետև ես բազմիցս եմ նշել, որ Հայաստանի համար արտաքին քաղաքական վեկտորի Ռուսաստանին այլընտրանքը Թուրքիան է․ չկա՛ Եվրամիություն, չկա Միացյալ Նահանգները։ Այդ բոլորը կեղծ են, մենք պետք է ընտրություն կատարենք Ռուսաստանի և Թուրքիայի միջև։ Ցանկացած քայլ՝ ուղղված Ռուսաստանի հետ Հայաստանի բարեկամության դեմ, պետք է որակվի որպես թուրքական ուղղվածության գործողություն»,- ասաց նա։

Ավելին․․․

Աղբյուր