Շվեդիայում կարճվել է ոստիկանությունում մահացած հայ տուրիստի գործով նախաքննությունը, ընտանիքը կբողոքարկի որոշումը. «Փաստ»

«Փաստ» օրաթերթը գրում է.

Դրսում Հայաստանի քաղաքացու կյանքի հանդեպ ոտնգձության դեպքում ՀՀ իշխանության վերաբերմունքը ակնհայտ դարձավ փետրվարի 6–ին Շվեդիայի Օրեբրո քաղաքի ոստիկանությունում ոստիկանների անուշադրության արդյունքում մահացած ՀՀ քաղաքացի Դավիթ Բարսեղյանի մահվան հետաքննության դեպքով:

Շվեդիայում ոստիկանների անտարբերությունից մահացած ՀՀ 32–ամյա քաղաքացի Դավիթ Բարսեղյանի եղբորից՝ Լյուդվիգ Բարսեղյանից «Փաստը» տեղեկացավ, որ Շվեդիայի դատախազությունը հանցակազմի բացակայության հիմքով կարճել է Դավիթ Բարսեղյանի մահվան փաստով քրեական գործի նախաքննությունը, ինչն էլ ավելի է խորացրել նրա ընտանիքի վիրավորանքն ու զայրույթը:

«Ինձ թվում է՝ կոծկել են գործը, քանի որ հիմնական վկաներին, եղբորս ընկերներին, ովքեր իր հետ են եղել, չեն հարցաքննել»,–«Փաստի» հետ զրույցում ասաց մահացած Դավիթի եղբայրը՝ հավելելով. «Անպայման բողոքարկելու ենք այդ որոշումը, թեև փաստաբանն ասում է, որ վերջին 10 տարում Շվեդիայի ոստիկանությունում 45 նման դեպք է եղել, ու ոչ մի ոստիկան չի պատժվել»:

Նշենք, որ փորձաքննությունը պարզել է, որ ոստիկանությունում մահացած ՀՀ քաղաքացի Դավիթ Բարսեղյանի մահը վրա է հասել ոչ թե ինսուլտի, ինչպես նախապես պնդում էին ոստիկանությունում, այլ ավելի անփութության պատճառով: «Իրեն ինսուլտ է խփել, սակայն փորձաքննության եզրակացության մեջ գրված է, որ մահվան մեջ մեծ նշանակություն ունի խեղդվելը, եղբայրս ինսուլտի ժամանակ փսխել է ու խեղդվել: Տարել, դրել են խուցում ու բժիշկ չեն կանչել, արդյունքում անուշադրության պատճառով գիտակցության չգալով մահացել է»,–պատմեց եղբայրը:

Ընտանիքը վիրավորված է նաև դեպքի առթիվ ՀՀ իշխանության պահվածքից. «Ակնհայտ է, որ ՀՀ քաղաքացու հանդեպ ոտնձգություն է եղել, որը հասցրել է մահվան, գոնե պետությունը այս տեսանկյունից պետք է հարցը բարձրացնի, բայց իրենք նույնիսկ չեն ցավակցել մեր ընտանիքին, միայն եղբորս մարմինը տեղափոխելու փաստաթղթային հարցերում են աջակցել»,– ասաց մահացածի եղբայրը:

Իսկ Դավիթի հայրը՝ Մանվել Բարսեղյանը, «Փաստի» հետ զրույցում ասել էր, որ ՀՀ իշխանությունները չեն աջակցում շվեդ ոստիկանների անմարդկային վերաբերմունքի բացահայտմանը, և որ իրենք միայնակ են իրենց ցավի հետ:

«Հայաստանի իշխանությունը ոչ մի բանով չի աջակցում տղայիս դեմ շվեդ ոստիկանների անմարդկային վերաբերմունքի բացահայտմանը»,– ասել է նա՝ հավելելով. «Մենք կառավարություն չունենք, որ մեր քաղաքացու իրավունքները դրսում պաշտպանի: Տղաս Շվեդիայի ոստիկանությունում վատ է զգացել, ընկերները մեքենայով արագ հասցնելուց են եղել հիվանդանոց, ոստիկանները կանգնեցրել են, էդ պահին տղաս հետ է տվել ու ընկել է գետնին, որ ընկել է, մի կին ոստիկան եկել ոտքով խփել է, ասել է՝ բարձրացիր, դերասանություն մի արա, դուք էմիգրանտներ եք, մեր կյանքը կերել եք: Տղաս ասել է՝ մի բաժակ ջուր տվեք, վատ եմ զգում, ջուր էլ չեն տվել, որից հետո նա մահացել է ոստիկանությունում:

Ընտանիքի փաստաբանը նաև քաղհայցով է դիմել դատարան՝ ընդդեմ Շվեդիայի ոստիկանության, սակայն այդ առթիվ դեռ վճիռ չկա:

Շարունակությունը` «Փաստ» օրաթերթի այսօրվա համարում