Փաշինյանի վերընտրվելու դեպքում Տավուշում, Գեղարքունիքում, Արարատում, Սյունիքում նոր հողակտորներ ենք զիջելու, փաստաթղթերն արդեն ընթացքի մեջ են. Հրանտ Բագրատյան (տեսանյութ)

Հայ ժողովրդի փրկությունը Նիկոլ Փաշինյանի հեռացումն է, երեք տարի առաջ շատերը սխալվեցին՝ նրան ընտրելով, բայց երկրորդ անգամ սխալվելու՝ Փաշինյանին դարձյալ ընտրելու դեպքում մենք իրավունք ունենք այդ անձանց վիրավորելու. Փաշինյանն ստորագրել է չորս փաստաթուղթ, որոնցից երկուսն ի կատար են արված, ևս երկուսն ընթացքի մեջ են: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել «Ազատություն» կուսակցության նախագահ, ՀՀ նախկին վարչապետ Հրանտ Բագրատյանը:

«Տավուշում, Գեղարքունիքում, Արարատում, Սյունիքում մենք հողեր ենք զիջելու նոր փաստաթղթերով: Տիգրանաշենը դեռևս չի հանձնել, բայց նրա ընտրվելու դեպքում այլևս Վայոց ձոր չեք կարող գնալ: Ադրբեջանցիները մեզ ոչինչ չեն վերադարձնելու, Փաշինյանը կասի՝ Արծվաշենը դժգույն գյուղ է: Այս մասին գիտի նաև Արմեն Սարգսյանը: Գործընթացը կանգնեցնելու միակ ձևն այն է, որ իշխանության գա ոչ Նիկոլը, հունիսի 20-ին պետք է ընտրել ոչ Նիկոլին»,- ասել է քաղաքական գործիչը:         

Ըստ Բագրատյանի՝ Գեղարքունիքում թշնամին մեր թիկունքում խորացել է մինչև 18 կմ. «Այս վիժվածքից պրծնելու այլ ճար չունենք, պետք է ընտրությունների գնալ: Այս պատերազմում մենք հաղթում էինք, Փաշինյանը չթողեց, որ հաղթենք, 18 հազար ադրբեջանցու ենք ոչնչացրել: Մեր զոհերի թիվն առանց անհետ կորածների ավելի քան յոթ հազար է: Մեր սառնարաններում պահվող մարմինների մեջ ադրբեջանցիների դիակներ էլ կան: Այն մարդը, որը երկրորդ անգամ ընտրում է Փաշինյանին, հիմար է: Նրանք, ովքեր ծափահարում են իրեն, թող իմանան՝ շատ վատ է լինելու»:

Նախկին վարչապետի կարծիքով՝ Փաշինյանը հանձնել է Շուշին, կայացրել մի շարք անհաշվենկատ որոշումներ, օրինակ՝ Վարազաթումբը գրավելու գործողությունը, որի հետևանքով մոտ 700 զինծառայող է զոհվել. «Մեր զինծառայողները պաշտպանում էին Փաշինյանի տղային, որը 20 կմ թիկունքում էր՝ հատուկ պաշտպանության տակ: Այս արկածախնդրությունից հետո ջախջախվեց հարավային ճակատը: Ռուսներն առաջարկում էին Շուշին և Հադրութը թողնել մեզ, մենք չէինք պատկերացնում՝ ինչ խայտառակ վիճակ է հարավային ճակատում: Փաշինյանն Ալիևի հետ պայմանավորվել էր, որ նա Ջրականի ուղղությամբ գա, մյուս ուղղություններով մերոնք կռվեցին»:

Հրանտ Բագրատյանի պնդմամբ՝ հունիսի 20-ից հետո պետք է պատասխան տան գլխավոր դատախազը, իրավապահ համակարգի և Զինված ուժերի վերնախավը: «Արտակ Դավթյանը քանդեց մի շարք զորամասեր, Վաղարշակ Հարությունյանն օպտիմիզացնում է բանակը, Արշակ Կարապետյանը, որն ապրիլյանից հետո վռնդվեց բանակից, ղեկավար պաշտոնի է: Ձեր տղաները կոտորվել են, ամեն մեկիդ 5 մլն դրամ է տալիս, դա էլ երբեմն չի տալիս: Ընտանիքներ կան, որ չգիտեին՝ ինչ է 5 մլն-ը, դրա համար որոշ զոհերի հարազատներ պաշտպանում են Փաշինյանին: Փաշինյանն ուզում է տանել քաղաքացիական բախումների, եթե նա պարտվի, տանելու է դրան, ասում է՝ ընտրեք ինձ՝ հողերը կտամ, միջանցքները կբացվեն, չընտրեք՝ կտանեմ բախումների: Եթե հաղթի, պետությունը չի լինելու: Դարձել ենք Աբխազիա, ուզում էինք Արցախից պետություն դարձնել, այն կորցրինք, Հայաստանն էլ դառնում է Աբխազիա»,- ամփոփել է Հրանտ Բագրատյանը:
Աղբյուր
Ավելին․․․