Ադրբեջանական TAP գազամուղի շինարարությունը կրկին վտանգված է. «Փաստ»

«Փաստ» օրաթերթը գրում է.

Անցած գիշեր իտալական Սալենտո մարզում կրքերը կրկին թեժացել են: No TAP նախաձեռնության անդամները հարձակվել են այն պահպանվող տարածքի վրա, որտեղ պետք է իրականացվի Տրանսադրիատիկ խողովակաշարի (TAP) շինարարությունը:

Գազամուղի շինարարությունն իրականացնող ընկերության տեղեկության համաձայն` հարձակվողները վիրավորել և քարեր են նետել պահակների ուղղությամբ: Տուժածներ չկան, սակայն վնասվել են այդ տարածքում կայանված ավտոմեքենաները:

TAP–ի ղեկավարությունը խիստ դատապարտել է No TAP–ի անդամներին և կոչ արել պահպանել օրենքը:

Հիշեցնենք, որ արդեն տևական ժամանակ է` Սալենտոյում կրքերը չեն հանդարտվում: Ուստիև Տրանսադրիատիկ խողովակաշարի (TAP) շինարարության իրականացման ժամկետները շարունակվում են ձգձգվել:

Իսկ խնդիրը հետևյալն է: TAP խողովակաշարի շինարարության համար, որը Հարավային գազային միջանցքի բաղկացուցիչ մասն է և որով նախատեսվում է ադրբեջանական գազն առաքել Եվրոպա, անհրաժեշտություն էր առաջացել Սալենտո մարզում տեղափոխել և վերատնկել բազմամյա ձիթենու ծառեր: Սրան դեմ էր հանդես եկել No TAP նախաձեռնությունը, որի ղեկավարը իտալացի ընդդիմադիր գործիչ, դերասան ու երգիծաբան Բեպե Գրլիոն է: Տեղական իշխանությունները հավանության էին արժանացրել No TAP–ի բողոքը:

TAP–ի ղեկավարությունը փորձում էր խնդիրը կարգավորել մինչև ապրիլի վերջ, քանի որ հակառակ պարագայում խողովակաշարի շինարարությունը պետք է հետաձգվի առնվազն կես տարով` ապրիլից հետո ծառերի վերատնկումն արգելված է: Փաստորեն երեկվա իրենց ակցիայով No TAP–ի անդամները կրկին վերահաստատել են իրենց մտադրությունների լրջությունը: Ուստի ենթադրելի է, որ խողովակաշարի շինարարությունը կհետաձգվի առնվազն այն պատճառով, որ դեռ հարկ կլինի հետաքննություն անցկացնել և պարզել նախորդ գիշերվա եղելությունը: Իսկ այդ գործընթացը դժվար թե կարճ տևի: Առավել ևս, որ մարզի ղեկավարությունն էլ խողովակաշարի շինարարությամբ այնքան էլ ոգևորված չէ:

Հարավային գազային միջանցքի լիարժեք շահագործումով, որը ներառում է գործող` Հարավկովկասյան գազամուղը, Բաքու–Թբիլիսի–Էրզրումը, և դեռևս կառուցվող Տրանսանատոլիական (TANAP) և Տրանսադրիատիկ (TAP) խողովակաշարերը, Ադրբեջանը հավակնում է դառնալ Եվրոպայի էներգետիկ անվտանգության երաշխավորը: Բայց, չգիտես ինչու, Եվրոպան դեռևս չի շտապում ֆինանսավորել ծրագիրը` անհրաժեշտ 40 մլրդ դոլարից Ադրբեջանին վարկի տեսքով հատկացվել է ընդամենը 400 մլն դոլար, այն էլ` միայն TANAP–ի կառուցումն ավարտին հասցնելու համար:

Պատահական չէ, որ ինչպես պնդում է Նավթային հետազոտությունների կենտրոնի ղեկավար Իլհամ Շաբանը, «պաշտոնական Բրյուսելն անում է, թվում է, հնչեղ հայտարարություններ այն մասին, որ ցանկանում է հնարավորինս արագ ստանալ ադրբեջանական գազը, բայց ռեալ քայլեր չեն ձեռնարկվում»: Ուստի Ադրբեջանում առաջանում է իրավիճակը քաղաքականացնելու գայթակղություն` կասկածներ են հայտնվում, թե Ռուսաստանը փորձում է օգտագործել Իտալիայի իրադարձությունները` առաջ մղելու Հարավային գազային միջանցքի հետ մրցող «Թուրքական հոսքը»:

Միևնույն ժամանակ շրջանառվում է վարկած, որի համաձայն` «Գազպրոմը» կարող է օգտագործել TAP–ի լրացուցիչ հզորությունները «Թուրքական հոսքի» շրջանակներում իր գազը Եվրոպա մատակարարելու համար: Իսկ դա ընդհանրապես կզրոյացնի Ադրբեջանի նշանակությունը որպես էներգետիկ ծանրակշիռ խաղացող:

Ինչևէ, առայժմ Սալենտոյում իրավիճակը «վերահսկում» է Գրիլոն` ցույց տալով, որ չնայած ստորագրված համաձայնություններին ու նախնական ներդրումներին, ոչինչ անվիճելի ու կանխորոշված լինել չի կարող:

Շարունակությունը` «Փաստ» օրաթերթի այսօրվա համարում