Նույնիսկ վարդագույն ակնոցներով հնարավոր չէ «հենվել» պաշտոնական վիճակագրությանը. «Փաստ»

«Փաստ» օրաթերթը գրում է.

Թեև օրեր առաջ ՀՀ ԳՆ սննդամթերքի անվտանգության պետական ծառայությունը պաշտոնապես հայտարարեց, որ ՍԱՊԾ սահմանային հսկիչ կետերի տվյալներով՝ Թուրքիայից Հայաստան այս տարվա ընթացքում լոլիկ չի ներկրվել, սակայն մինչ օրս պետական կառույցների կողմից այդպես էլ որևէ հոդաբաշխ պարզաբանում չներկայացվեց այն մասին, որ եթե տվյալ գյուղմթերքը պաշտոնապես չի ներկրվել, ապա ինչպես է ողողել ողջ հայկական շուկան:

ՍԱՊԾ պետի մամուլի քարտուղար Ն. Առաքելյանն այս մասին նշեց, որ իրենք կարող են տեղեկություն տալ միայն ՍԱՊԾ բազայում առկա տվյալների շրջանակներում, իսկ այլ տեղեկատվության չեն տիրապետում: Ուստիև չեն կարող պատասխանել հարցին, թե եթե պաշտոնապես չի ներկրվել Հայաստան, ապա ինչպես է հայտնվել հայկական շուկայում:

Խոսելով Թուրքիայից և Ադրբեջանից ներկրվող սննդամթերքի և գյուղմթերքի ծավալների մասին, նա նշեց նաև, որ կրկին պաշտոնական տվյալների համաձայն Կառավարության որոշմամբ մինչև 2013 թ. թուրքական և ադրբեջանական ծագում ունեցող կենդանական և բուսական հումքի ու մթերքի ներկրումն արգելված է եղել: Այստեղ կրկին հիշեցնենք, որ ոչ վաղ անցյալում՝ մինչև 2013 թվականը նույնպես հայաստանյան սուպերմարկետներում և մեծածախ ու մանրածախ շուկաներում թուրքական գյուղմթերքի պակաս ընդհանրապես չի եղել:

ՍԱՊԾ պետի մամուլի քարտուղարը ներկայացնելով կրկին ռիսկային երկիր համարվող Պակիստանից Հայաստան ներմուծվող սննդամթերքի մասին, նշեց, որ այս տարի Պակիստանից Հայաստան է ներկրվել բրինձ, մանդարին, պղպեղ, քունջութի սերմ, որոնք բոլորն էլ լաբորատոր փորձաքննության են ենթարկվել:

Այս ամենից բացի դեռևս բաց է մնում այն հարցը, թե իրականում ովքեր են ռիսկային համարվող երկրներից սննդամթերք ներկրելու փորձեր անում և արդյոք նրանք չեն գիտակցում, որ իրենց պատճառով հասարակության շրջանում ավելորդ լարվածություն է առաջանում: Բացի այդ, նման ճանապարհով գումար աշխատելը նույնպես ինչ–որ տեղ խոսում է ազգային արժանապատվության բացակայության մասին, իսկ մեզ մնում է մեկ անգամ ևս ահազանգել սպառողներին, որ սննդամթերք ձեռք բերելուց առաջ իրազեկվեն, թե ինչ են գնում և նոր միայն կատարեն անհրաժեշտ գնումը, քանի որ չի բացառվում, որ հայկական շուկայում լինեն նաև այնպիսի սննդամթերքներ, որոնք կրկին պաշտոնական վիճակագրությունից ու ստուգումներից դուրս մնացածների ցանկում եղած լինեն:

Շարունակությունը` «Փաստ» օրաթերթի այսօրվա համարում