Փաշինյանի փոխշահավետ առաջարկը Հայաստանի շահերի ոտնահարում է, նահանջ և Հայաստան պետության գոյությունը հարցականի տակ դնելու հստակ քայլ. Ռուբեն Մելքոնյան

Այն, ինչ առաջարկում է Փաշինյանը, ըստ էության, Հայաստանի շահերի ոտնահարում ու նահանջ է և ընդհանրապես Հայաստան պետության գոյությունը հարցականի տակ դնելու հստակ քայլ է: Այս մասին այսօր Tert.am-ի հետ զրույցում ասաց թուրքագետ, «Հայաստան» դաշինքի ներկայացուցիչ Ռուբեն Մելքոնյանը՝ խոսելով ԱԽ նիստում Նիկոլ Փաշինյանի՝ Ադրբեջանին ու միջազգային հանրությանն արած առաջարկի մասին, որը վերջինիս գնահատմամբ՝ փոխշահավետ է:

Ըստ Փաշինյանի առաջարկի՝ Հայաստանի և Ադրբեջանի զինվորական ստորաբաժանումները հեռանում են Սոթք-Խոզնավար սահմանային հատվածից, դրա փոխարեն սահմանագծի երկայնքով տեղակայվում են միջազգային դիտորդներ, դրանից հետո տեղի են ունենում սահմանային կետերի ճշգրտման աշխատանքներ:

«Փաշինյանը չունի պետական մտածողություն, նա որևէ կերպ մոտ չէ անգամ պետական պաշտոնյայի կերպարին, չունի ազգային ընկալում, հայրենիքի ընկալում և նույն ապազգային մտածողությունն է նաև նրա թիմի մոտ, սրանից է բխում նրանց գործելաոճն ու չակերտավոր փոխշահավետ առաջարկները: Այս քայլերն ուղղակի տանում են Հայաստան պետության կործանման և դա ներկայացնել որպես փոխշահավետ քայլեր կամ վառ երևակայություն պետք է ունենալ, կամ՝ հիվանդ հոգեբանություն: Կարծում եմ՝ երկսուն էլ Փաշինյանի մոտ առկա է»,-ասաց Մելքոնյանը:

Մելքոնյանը հիշեցրեց, որ Փաշինյանը հայտարարում էր այն մասին, թե Ադրբեջանը պատրաստ է ինչ-որ փաստաթուղթ ստորագրել, որը 100 տոկոսով բխելու է ՀՀ շահերից: Վերջինիս խոսքով՝ որևէ մեկը չի կարող հավատալ նրան, որ Ադրբեջանը երբևէ հայանպաստ փաստաթուղթ կստորագրի: «Այդ թիմը, որը տարիներ շարունակ ինքնիշխանության մասին էր բարբաջում, այսօր հայկական պետականությունը պաշտպանող սահմաններն առաջարկում է դնել միջազգային դիրտորդների, խաղաղապահների և այլ կառույցների վերահսկողության ներքո: Եթե այդ սահմաններն էլ պետք է այլ մարդիկ պահեն, ապա ինչպե՞ս է այս երկիրը կոչվելու անկախ պետություն, սա արդեն այլ անվանում կարող  է ունենալ»,- ասաց Մելքոնյանը:

«Ուղղակի ողբերգություն է, որ հասարակության մեջ դեռ հատվածներ կան, որ հավատում են Փաշինյանին և նրա խոսքերի մեջ փորձում են տրամաբանություն գտնել: Այդ մարդն ու այդ թիմը հակահայ է, հակահայկական քայլեր են անում: Փաշինյանն աշխատում է Հայաստան պետության դեմ և նրա ու Ադրբեջանի քայլերը հավասարազոր քայլեր են, երկուսն էլ Հայաստանի դեմ են, ուստի նրանք, ովքեր պաշտպանում են ու ուզում են քվեարկել այս մարդու օգտին, կարող են գնալ ու քվեարկել Ալիևի, Էրդողանի ու նրանց գլխավորած կուսակցությունների օգտին»,-ասաց նա:

Ավելին․․․