Սերգեյ Խաչատրյան. «Եթե մեկ սրսկումով հնարավոր լինի ազդել գենետիկայի վրա, կնշանակի գտել ենք մարդկության փրկության բանաձևը». «Փաստ»

«Փաստ» օրաթերթը գրում է.

ՀՀ Առողջապահության նախարարի տեղակալ Սերգեյ Խաչատրյանը ամփոփելով Առողջապահության համաշխարհային կազմակերպության կողմից՝ ապրիլի 24–ից 30–նն անցկացված «Իմունականխարգելման եվրոպական շաբաթը», որին մասնակցում էր նաև Հայաստանը, «Փաստի» հետ զրույցում խորհուրդ տվեց բոլոր ծնողներին առաջին հերթին ուշադրություն դարձնել մանկաբույժների կողմից նշանակված պատվաստումների ժամանակացույցին և երկրորդ՝ վստահել բժիշկներին:

Խոսելով պատվաստումներ անցնելու կարևորության մասին, նա նշեց, որ այն մերժողները շատ անգամ չեն էլ պատկերացնում, թե ինչու են խուսափում պատվաստում անցնելուց: Ինչ վերաբերում է պատվաստանյութերի որակին, պարզվում է, որ այն մշակվում է գիտական ուսումնասիրությունների հիման վրա:

«Այսօր իրականացվող պատվաստանյութերի ստացման ցանկացած մեթոդ նախապես անցնում է փորձարկման տարբեր փուլերով՝ քննվում է, հետազոտվում է, անցնում է բազմաթիվ բարդագույն փուլեր: Դրանք տեսանելի չեն շատերի և նույնիսկ մեզ համար, բայց դրա արդյունքում մենք ունենում ենք գիտականորեն ապացուցված փաստեր այն մասին, որ ստացված պատվաստանյութը կանխարգելում է տվյալ հիվանդությունը»,– ասաց Ս. Խաչատրյանը:

Ի դեպ, այս կամ այն վիրուսի դեմ մշակվող պատվաստանյութի արտադրությունը բիզնես–գործառույթ է, որը նաև շահույթ է հետապնդում: Ուստիև արտադրող ընկերությունների միջև իրականում սուր մրցակցություն կա: Եվ պատահական չէ, որ նրանցից յուրաքանչյուրն ամեն ինչ անում է առավել արդյունավետ պատվաստանյութ ստեղծելու համար: Պետք չէ շրջանցել նաև այն փաստը, որ պատվաստման միջոցով լուծվում է մեկ այլ կարևորագույն խնդիր: Դա արդեն ոչ միայն հանրային առողջապահական, այլև՝ ազգային անվտանգության խնդիր է, որը լուծվում է նաև այս եղանակով:

Փոխնախարարը կոչ արեց նաև հանրությանը վստահել համաշխարհային մակարդակով գիտականորեն ապացուցված և ապացուցողական բժշկագիտության բոլոր փուլերը «հաղթահարած» գիտական ուսումնասիրությունների արդյունքներին, ոչ թե սիրողական մակարդակով կատարված անհիմն հայտարարություններին:

«Միշտ էլ, բոլոր երկրներում էլ, ապացուցողական բժշկությունից բացի լինում են այլ տեսակետներ հայտնողներ: Եվ ես կարծում եմ, որ նման մարդիկ մշտապես լինելու են, ինչը լավ է, քանի որ եթե նրանք չլինեն և հակասություններ չլինեն, համակարգը չի զարգանա: Բայց ավելի կարևորն այն է, որ տարբեր միջոցառումների շնորհիվ մեզ հաջողվում է նման մոտեցումներ ունեցողներին ապացուցել հակառակը և հաղթահարել նմանօրինակ խնդիրները»,– ասաց Ս. Խաչատրյանը:

Նա նաև հերքեց հասարակության մեջ շրջանառվող այն տեսակետը նույնպես, թե միջազգային կազմակերպությունները Հայաստանը դիտարկելով որպես աղքատ երկիր նոր պատվաստանյութեր առաջարկելով փորձեր են կատարում նաև մեր ժողովրդի վրա:

«Ես շատ կցանկանայի, որ այն մարդիկ, ովքեր նման քարոզչություն են իրականացնում, նաև պատասխանատվություն կրեին իրենց ասածների համար: Շատ կցանկանայի նաև, որ մեր օրենքներում ամրագրված լիներ, որ եթե ինչ–որ մեկը խոչընդոտել է պատվաստմանը և դրա հետևանքով երեխան վնաս է կրել, պատասխանատվության ենթարկվի: Ես կարծում եմ, որ հիմա, երբ պատասխանատվության հարց չկա, այդ պատճառով էլ ինտուիտիվ կերպով, այստեղից, այնտեղից ինչ–որ բաներ լսելով, շատ մակերեսային գիտելիքներ ունենալով տվյալ հարցի մասին ինչ ուզում՝ ասում են»,– ասաց Ս.Խաչատրյանը:

Հասարակության շրջանում առկա մեկ այլ մտահոգության մասին էլ, թե՝ պատվաստանյութերը ազդում են նաև ազգերի գենոֆոնդի վրա, Առողջապահության փոխնախարարը խորհուրդ տվեց հետադարձ հայացք նետել անցյալ դարասկզբին, երբ «ծաղիկ» հիվանդությունն ամենատարածվածն էր ողջ մոլորակում: Նրա խոսքով, եթե այդ վիրուսի դեմ պատվաստանյութը չստեղծվեր, մոլորակի մարդկության կեսն այսօր չէր լինի:

«Այսօր այդ վիրուսը վերացել է մոլորակից պատվաստումների շնորհիվ և այսօր ոչ միայն մարդկանց թիվն է շատացել, այլև կյանքի որակն է բարելավվել: Այս ճանապարհով միլիոնավոր մարդկանց կյանքեր են փրկվել և փրկվում: Ինչ վերաբերում է գենետիկայի վրա պատվաստումների միջոցով ազդելուն, ապա նշեմ, որ եթե մենք իմանայինք մեկ սրսկումով գենետիկայի վրա ազդելու ձևը, ապա հավատացեք, որ բազմաթիվ վտանգավոր հիվանդություններ այլևս վտանգավոր չէին համարվի: Այսօր կան վարկածներ, որոնք մշակվում են, սակայն դրան հասնելու համար տասնյակ տարիներ են հարկավոր: Եվ եթե դա մի օր հնարավոր լինի, ապա կնշանակի, որ գտել ենք մարդկության փրկության բանաձևը»,– ասաց Ս. Խաչատրյանը:

Շարունակությունը` «Փաստ» օրաթերթի այսօրվա համարում