Գերմանացիներն առաջարկում են Իսրայելի վարչապետին անվանել Վլադիմիր Թայիփ Նեթանյահու. «Փաստ»

«Փաստ» օրաթերթը գրում է.

Գերմանիայի ու Իսրայելի միջև քաղաքական սկանդալ է: Շաբաթվա սկզբին Գերմանիայի արտգործնախարար Զիգմար Գաբրիելն իր առաջին այցն է կատարել Իսրայել` մասնակցելու Հոլոքոստի զոհերի հիշատակին նվիրված միջոցառումներին: Բայց Իսրայելի վարչապետ Նեթանյահուն հրաժարվել է հանդիպել Գաբրիելի հետ: Իսկ պատճառը եղել է Գերմանիայի արտգործնախարարի ծրագրված հանդիպումը իսրայելական իրավապաշտպան երկու կազմակերպությունների հետ, որոնք խիստ քննադատում են երկրի կառավարությանը` բացահայտումներ ներկայացնելով Գազայի հատվածում և Լիբիայի հարավում իսրայելցի զինվորների վայրագությունների մասին, նաև դեմ են հանդես գալիս գրավված պաղեստինյան տարածքներում հրեական թաղամասեր կառուցելու Իսրայելի ծրագրերին:

Հանդիպումից առաջ Նեթանյահուն հարցազրույց է տվել իսրայելական հեռուտատեսություններից մեկին և փաստացի երկընտրանքի առաջ կանգնեցրել Գերմանիայի արտագործնախարարին` նա կամ հանդիպում է իրավապաշտպան ընկերությունների, կամ իր հետ:

Գերմանիայի արտգործնախարարը նախընտրել է հանդիպումը իրավապաշտպանների հետ: «Կառավարությանը քննադատողների հետ հանդիպումը միանգամայն նորմալ պրակտիկա է, իսկ Նեթանյահուի հետ հանդիպման չեղարկումը աղետ չէ»,– ասել է Գերմանիայի արտգործնախարարը:

Հանդիպման չեղարկումից հետո Նեթանյահուն փորձել է հեռախոսակապ հաստատել Զ. Գաբրիելի հետ, բացատրել, թե ինչու է գնացել այդ քայլին, բայց այս անգամ էլ գերմանացի դիվանագետը չի ցանկացել խոսել նրա հետ և մերժել է պատասխանել հեռախոսազանգին: Ուստի իր բացատրությունը Նեթանյահուն տվել է գերմանական Bild–ին. «Հստակ կանոն ունեմ` ես չեմ հանդիպում օտարերկրացի այն դիվանագետների հետ, ովքեր Իսրայել այցելելիս հանդիպում են կազմակերպությունների հետ, որոնք մեր զինվորներին հանցագործներ են անվանում»:

Գերմանիայի արտգործնախարարությունը հակադարձել է Իսրայելի վարչապետին: Զ.Գաբրիելի շրջապատին մոտ կանգնած աղբյուրները Bild–ին փոխանցել են, որ հանդիպումը չեղարկելուց առաջ է Նեթանյահուն առաջարկել հեռախոսազրույց ունենալ, բայց առաջ է քաշել երկու նախապայման` Գաբրիելը չպետք է մասնակցի կառավարությանը քննադատող կազմակերպությունների հետ, փոխարենը կարող է ուղարկել իր ներկայացուցչին, նաև` պաղեստինյան տարածքներում կառուցվող հրեական թաղամասերից պաշտոնական ներկայացուցիչը պետք է նույնպես մասնակցի այդ հանդիպմանը և ուղեկցի Գերմանիայի ներկայացուցչին: Նեթանյահուի այս առաջարկը մերժվել է: Գերմանիան անօրինական է համարում պաղեստինյան տարածքներում հրեական թաղամասերի կառուցումը:

Գերմանիայի քաղաքական և փորձագիտական շրջաններն իրենց աջակցությունն են հայտնել Զ. Գաբրիելին: «Իսրայելի կողքին լինելը չի նշանակում ենթարկվել Նեթանյահուի ցանկություններին,– գրել է Berliner Zeitung–ը:– Գաբրիելը չխոնարհվեց, նրա դիրքորոշումը արժանի է հարգանքի»:

Իսկ ազդեցիկ Suddeutsche Zeitung–ն առաջարկում է երախտապարտ լինել Գաբրիելին, ով Իսրայել իր առաջին այցի ընթացքում ցուցաբերել է «ավելի մեծ տղամարդկություն, քան իր նախորդները»: Ըստ թերթի, այժմ հնարավորություն է ընձեռվել ավելի մեծ ազնվություն մտցնել գերմանա–իսրայելական հարաբերություններում:

Ավելին, թերթն առաջարկում է Իսրայելի վարչապետին անվանել «Վլադիմիր Թայիփ Նեթանյահու»: «Ինչպես Պուտինը Ռուսաստանում, Էրդողանը Թուրքիայում, այնպես էլ նա վտանգում է ժողովրդավարությունը, ոչնչացնում է նախկին արժեքները»:

Թե Գերմանիա–Իսրայել հարաբերություններում այս լարվածությունը որքան կտևի, կերևա առաջիկայում: Մոտ 10 օրից Իսրայել իր առաջին այցն է կատարելու Գերմանիայի նախագահ Ֆրանկ–Վալտեր Շտայնմայերը:

 Շարունակությունը` «Փաստ» օրաթերթի այսօրվա համարում