«Խելացի» լուսացույցներ, մետրոպոլիտենի ընդլայնում և տրամվայների վերադարձ. «Փաստ»

«Փաստ» օրաթերթը գրում է.

Մայիսի 14–ին կայանալիք Երևանի ավագանու ընտրությունների հետ կապված արդեն իսկ հրապարակվել են թեկնածու քաղաքական ուժերի նախընտրական ծրագրերը: Քաղաքային տրանսպորտի զարգացման և բարելավման ի՞նչ առաջարկներ ունեն «Ելքը», ՀՀԿ–ն ու «Երկիր ծիրանին», փորձել է իր ընթերցողին ներկայացնել «Փաստը»:

Զարուհի Փոստանջյանի նորաստեղծ կուսակցությունը իր նախընտրական ծրագրում գրել է, որ անհրաժեշտ է հասարակական տրանսպորտի տեղաշարժի վերակազմակերպում` ճանապարհային կառուցվածքներ, երթուղիների տրամադրում, արտոնյալ կանաչ լույսի տրամադրում: «Երկիր ծիրանիի» թեկնածուները կարծում են, որ պետք է վերադառնալ վերգետնյա հանրային տրանսպորտի, և առաջին հերթին` մագիստրալ երթուղիների կենտրոնացված կառավարման համակարգին: «Մայրաքաղաքում պետք է ավելացնել կանգառների թիվը, բարելավել դրանց վիճակը և զերծ պահել ոչ իր նշանակության փոխադրամիջոցների կայանումից, որոնք հաճախ խցանման պատճառ են դառնում»,– կարդում ենք նախագծի մեջ:

Վերջինները նաև գտնում են, որ քաղաքային տրանսպորտի զարգացման կարևորագույն պայմաններից է Երիտասարդական կայարանի 2–րդ մուտքի կառուցումը և տրամվայները Երևանում կրկին շահագործելը:

ՀՀԿ–ի նախընտրական ծրագրում տրանսպորտի զարգացման հետևյալ տեսլականն է դրվել՝ Երևան քաղաքի հասարակական տրանսպորտի նոր և արդյունավետ երթուղային ցանցի մշակում և կիրառում, միկրոավտոբուսների հնարավորինս բացառման սկզբունքով մեծ և միջին տեղատարողությամբ նոր ավտոբուսների ձեռքբերում, ինչպես նաև էլեկտրոնային և միասնական տոմսային նորագույն համակարգի ներդնում՝ սոցիալական խմբերի համար հստակ զեղչերի կիրառմամբ։

Երևանյան ներկայի իշխանությունը նաև նախատեսում է կանգառասրահները համապատասխան կահավորանքով արդիականացնել, նոր տրոլեյբուսներ ձեռք բերել և տրոլեյբուսային ցանցը ընդհանուր տրանսպորտային ցանցին ինտեգրել:

«Ելք» դաշինքը պատրաստվում է ձևավորել ավտոբուսային միջանցք, որի շնորհիվ պողոտաների երթևեկելի գծերից մեկը պիկ ժամերին կհատկացվի բացառապես ավտոբուսների և տրոլեյբուսների երթևեկությանը: Նրանք նաև ցանկանում են գործարկել «Զվարթնոց» օդանավակայանը Երևանի կենտրոնին կապող ավտոբուսային շուրջօրյա երթուղին:

Խստագույն միջոցներ կձեռնարկվեն քաղաքային տրանսպորտից օգտվող քաղաքացիների սպառողական իրավունքները պաշտպանելու համար՝ վարորդների արտաքին տեսքի, պահվածքի, տրանսպորտային միջոցների մաքրության և տեխնիկական պատշաճ վիճակի, դրանցում հնչող երաժշտության հարցերը կլինեն վերահսկողության ներքո:

Նրանք նաև մտադիր են ներդնել «խելացի» լուսացույցներ, որոնք երթևեկությունը կկարգավորեն ըստ ծանրաբեռնվածության: Մինչև դրանց տեղադրումը բոլոր խոշոր խաչմերուկներում կգործեն ենթակարգավարներ: Դե, իսկ Երևանի մետրոպոլիտենի կառուցումը կդառնա շարունակական պրոցես և մինչև 2022 թ. կգործարկվի մետրոպոլիտենի առնվազն մեկ նոր կայարան: Կվերացվի Երևանում կայանատեղիների սպասարկման մենաշնորհը և կայանատեղիների կազմակերպումը կվստահվի այնպիսի ընկերությունների, որոնք կապահովեն նվազագույն գին և առավելագույն որակ:

Շարունակությունը` «Փաստ» օրաթերթի այսօրվա համարում