Գործադիրն արհամարհում է դատական ակտը. հաղորդում կուղարկենք դատախազություն՝ քրգործ հարուցելու. Օնիկ Գասպարյանի փաստաբան

Փաստացի գործադիրն արհամարհում է դատական ակտը եւ անտեսելով այն, որ դատարանն ասում է Օնիկ Գասպարյանը պաշտոնից չի ազատվել, վարչապետը նոր հայտարարություն է անում, թե իրավունքի ուժով այլ անձ է նշանակվել ԶՈՒ ԳՇ պետի պաշտոնում։ Այս մասին NEWS.am-ի հետ զրույցում ասաց Օնիկ Գասպարյանի փաստաբան Արթուր Հովհաննիսյանն՝ անդրադառնալով ավելի վաղ տարածված  վարչապետի հայտարարությանը, որտեղ նշվում է, որ Արտակ Դավթյանն իրավունքի ուժով ՀՀ ԶՈՒ գլխավոր շտաբի պետի պաշտոնին նշանակված է համարվում:

«Բնականաբար, սրանով ամեն կերպ խոչընդոտում են պարոն Գասպարյանին, որպեսզի դատական ակտի հիման վրա իր լիազորությունները իրականացնի եւ մենք կարծում ենք, որ այստեղ կան շահադիտական դրդումներ, դրա համար էլ մեր հաղորդումներն այսօր կամ վաղը կուղարկենք Գլխավոր դատախազություն՝ քրեական գործ հարուցելու, իսկ Վարչական դատարանում էլ կշարունակեք պարոն Գասպարյանի պաշտպանությունը, անհրաժեշտ շտկումնեը կանենք վերջին իրադրությամբ պայմանավորված եւ հետագայում երեւի նոր անակնկալներ կունենանք»,– ընդգծեց Արթուր Հովհաննիսյանը։

Հիշեցնենք, որ փետրվարի 25–ին ԶՈՒ ԳՇ–ն հայտարարությամբ հանդես եկավ, որտեղ բարձրաստիճան սպայակազմը պահանջեց վարչապետի եւ Կառավարության հրաժարականը։ Վարչապետը դա համարեց ռազմական հեղաշրջման փորձ։ Նա նույն օրը առաջարկություն ուղարկեց ՀՀ նախագահին Օնիկ Գասպարյաին ԳՇ պետի պաշտոնից ազատելու վերաբերյալ։ Նախագահ Արմեն Սարգսյանը չստորագրեց Օնիկ Գասպարյաին ԳՇ պետի պաշտոնից ազատելու վերաբերյալ վարչապետի առաջարկությունը եւ առաջնորդվելով Սահմանադրության 169-րդ հոդվածի 1-ին մասի 4-րդ կետով, դիմեց Սահմանադրական դատարան «Զինվորական ծառայության եւ զինծառայողի կարգավիճակի մասին» 2017թ. նոյեմբերի 15-ի օրենքի՝ Սահմանադրությանը համապատասխանելու հարցը որոշելու խնդրանքով:

«Դիմումի ներկայացումը պայմանավորված է նաեւ նշված օրենքի իրավակիրառ պրակտիկայում առկա խնդիրներով, որոնք առավել ակնհայտ դարձան Հայաստանի Հանրապետության զինված ուժերի գլխավոր շտաբի պետ Օնիկ Գասպարյանին պաշտոնից ազատելու վարչապետի նախաձեռնության եւ դրան հաջորդած սահմանադրական իրավական գործընթացների արդյունքում»,– ասվում էր նախագահի հայտարարության մեջ։

Մարտի 10–ին, վարչապետ Նիկոլ Փաշինյանը հայտարարեց, որ  ԶՈՒ գլխավոր շտաբի պետ Օնիկ Գասպարյանն իրավունքի ուժով համարվում է ազատված զբաղեցրած պաշտոնից: Այդ օրը Նիկոլ Փաշինյանը  Հանրապետության նախագահին էր ներկայացրել առաջարկություն՝ Արտակ Դավթյանին ՀՀ ԶՈՒ գլխավոր շտաբի պետ նշանակելու վերաբերյալ միջնորդություն։ «Զինվորական ծառայության եւ զինծառայողի կարգավիճակի մասին» ՀՀ օրենքի 35.1-ին հոդվածի 3-րդ մասով սահմանված ժամկետներում Հանրապետության նախագահը չէր ստորագրել Արտակ Դավթյանին ԶՈՒ ԳՇ պետի պաշտոնում նշանակելու վարչապետի կողմից ներկայացված նախագիծը եւ չէր դիմել Սահմանադրական դատարան։

Նախագահը մարտի 11-ին առարկություններ էր ներկայացրել  վերոնշյալ նախագծի վերաբերյալ, սակայն այդ առարկությունները վարչապետի կողմից չէին ընդունվել, եւ հիմնավորումներով հետ էր ուղարկվել նախագահին։

Իր հերթին Օնիկ Գասպարյանն ուղերձով հանդես եկավ, որտեղ ասում էր, որ դիրքորոշումն անփոփոխ է․ ինչպես հրապարակված հայտարարությունը, այնպես էլ պաշտոնից ազատման ողջ գործընթացը հակասահմանադրական են։ Նա դիմել էր  ՀՀ վարչական դատարան։ Դատարանը մարտի 17–ին,  բավարարել Էր պաշտպանական կողմի միջնորդությունը հայցի ապահովման միջոց կիրառելու մասին։ Սակայն, վարչապետի աշխատակազմը պարզաբանում էր տարածել, թե Օնիկ Գասպարյանն ազատված է ՀՀ ԶՈՒ ԳՇ պետի պաշտոնից։ Նրա փաստաբանը դատարանի որոշումից հետո հայտարարարել էր, Օնիկ Գասպարյանը շարունակում է կատարել ՀՀ զինված ուժերի Գլխավոր շտաբի պետի պարտականությունները, առավոտյան գնացել է աշխատանքի։

Արտակ Դավթյանն իրավունքի ուժով ՀՀ ԶՈՒ գլխավոր շտաբի պետի պաշտոնին նշանակված է համարվում․ վարչապետի հայտարարությունը