Մենք մի ազգ ենք, իշխանությունը չպետք է տանի բախումների. Արտակ Թովմասյան

Երբ սկսել ենք գործել Հայաստանի Հանրապետությունում, առաջին օրվանից աջակցել ենք Հայոց բանակի տարբեր միջոցառումներ։ Այս մասին այսօր՝ մարտի 1-ին, Խաչերի օրհնության եւ զորակոչիկներին հանձնելու հանդիսավոր արարողությունից հետո լրագրողների հետ զրույցում ասաց «Թովմասյան» հիմնադրամի ղեկավար Արտակ Թովմասյանը:

«Մեր երկրում տիրող իրավիճակում ինձ համար մեծ պատիվ էր բանակի կողքին լինելը»,- նշեց նա։

Թովմասյանն ասաց, որ արարողությանը ներկա էին ինչպես զորակոչիկներ, այնպես էլ սպաներ։

Անդրադառնալով երկրում ստեղծված ներքաղաքական վիճակին՝ Թովմասյանն ասաց. «Գոյություն ունի իշխանություն եւ գոյություն ունի պետականություն։ Ես միշտ կանգնած եմ եղել պետության, ազգի, պետականության համար։ Իշխանությունները գալիս ու գնում են, բայց պետությունը եւ մեր ազգը մնում է։ Եկեղեցին հիմնասյուներից հիմնականն է։ Մեր հիմնական կողմնացույց պետք է լինի եկեղեցին եւ բանակը։ Այսօր ինքներս տեսնում ենք, թե ինչ է կատարվում։ Ես կանգնած եմ թե բանակի, թե եկեղեցու կողքը։ Նույնը խորհուրդ կտամ մեր համախոհներին, մեր ժողովրդին, որ կանգնեն բանակի ու եկեղեցու կողքը։ Իշխանությունը ժամանակավոր է. շփոթվել են, խառնվել են չեն կարողանում հասկանալ, բայց դա հիմնական ուղեցույցներից մեկն է, որով մենք պիտի ուղղորդվենք։ Մեր ազգի հիմնական տանողը եկեղեցին է։ Եթե թշնամին ուզել է մեզ ոչնչացնել կամ թուլացնել, նա հարձակվել է եկեղեցու վրա»։

Լրագրողի հարցին, որ թե ընդդիմությունը, թե իշխանությունն այսօր հանրահավաք է անցկացնելու, քաղաքական առումով ի՞նչ մարտի 1 ենք ունենալու, Թովմասյանն ասաց. «Մարտի 1-ը շատ սիմվոլիկ օր է՝ գարնան առաջին օրն է։ Գարնան գալու հետ մեծ հույսեր ենք կապում բոլորս։ Ինչպես շատերը հիշում են 13 տարի առաջ կատարված դեպքերը, այդ օրվա դեպքերը հիմնականում կապված են նույնությամբ փողոց դուրս եկած մարդկանց հետ, որոնք դուրս էին եկել ազատության, պատվի համար։ Նույնն այսօր պետք է լինի՝ պատվի, ազատության հետ կապված տրամադրության օր։ Չպետք է գնանք ոչ մի բախման, մենք մի ազգ ենք, պետք է լինենք միասնական, կարող են լինել տարբեր կարծիքներ, բայց մենք մի ազգ ենք, չպիտի իշխանությունը տանի բախումների»։