Շիրխանյանի ձերբակալության երկու վարկած. «Փաստ»

«Փաստ» օրաթերթը գրում է.

Խոչընդոտեցին Հայ սպաների միության ստեղծմա՞նը, թե կտրեցին Վատիկան–Մոսկվա «խողովակը»

Գրեթե երկու տարի է անցել Նորքի «զինված հանցախմբին» վնասազերծելուց: Հիշեցնենք` 2015–ի նոյեմբերի 25–ին ԱԱԾ–ն վնասազերծվել էր հանցախումբ, որը, ըստ ԱԱԾ–ի հաղորդագրության, պլանավորել էր Հայաստանի տարածքում իրականացնել մի շարք ծանր հանցագործություններ, այդ թվում` մահափորձ նախագահի դեմ: Մեկ ամիս անց նույն գործով ձերբակալվեց ՀՀ պաշտպանության նախարարի նախկին տեղակալ Վահան Շիրխանյանը:

Երկու տարի հետո էլ այդ գործի մասին գիտենք այնքան, որքան խմբի ձերբակալության օրը: Դրա հետևանքով շատերը, մեղմ ասած, այնքան էլ չեն հավատում պաշտոնական վարկածին: Ինչևէ, այսօր փորձելու ենք երկու նոր վարկած առաջադրել կոնկրետ Շիրխանյանի ձերբակալության մասով: Ստորև ներկայացնում ենք «Ղարաբաղ» կոմիտեի անդամ, ՀՀ նախագահի ազգային անվտանգության հարցերով նախկին խորհրդական Աշոտ Մանուչարյանի տեսակետը:

Մինչև ձերբակալությունը Վահան Շիրխանյանն զբաղված է եղել մի շատ կարևոր գործով, որի մասին տեղյակ է եղել նաև նախագահ Սերժ Սարգսյանը: Շիրխանյանը պատրաստվում էր ստեղծել Հայ սպաների միություն: Ամբողջ աշխարհի հայ սպաները պետք է միանային և ստեղծեին ամբողջական ռազմական հայկական համակարգ: Աշխարհում ընդունված հասկացություն կա` ռազմական մասնավոր կոմպանիա: Օրինակ, ամերիկացիները Իրաքում իրենց ռազմական գործողությունների 50–60%–ն իրականացրել են նման կոմպանիաների միջոցով: Նույնը` Աֆղանստանում: Ու Շիրխանյանի կազմակերպած միությունը պետք է լիներ նման մի կոմպանիա, բայց որը պետք է ունենար իր առանձնահատկությունները` ելնելով մեր, զուտ հայկական սպեցիֆիկայից:

Ըստ Ա. Մանուչարյանի, այդ կառույցի նպատակն ու գործառույթը լինելու էր հայության ռազմական հնարավորությունը մեկտեղելը, ինչի արդյունքում մեր ռազմական ամբողջ համակարգի արդյունավետությունը կտրուկ բարձրանալու էր: Ընդ որում, այդ միությունը գործելու էր պետության հետ համաձայնեցված: Շիրխանյանին «կցված» է եղել նախագահ Ս. Սարգսյանի ազգականը, ով ՊՆ–ի բարձրաստիճան պաշտոնյա է: Դա արվել էր նպատակով, որպեսզի նախագահը լիարժեք տիրապետի կառույցի գործողությունների նպատակներին ու ծրագրերին և չունենա կասկածներ կամ մտավախություն առ այն, թե այդ կառույցը մի օր կարող է շուռ գալ իր դեմ: Նախնական համաձայնությամբ, սակայն, հարկ եղած դեպքում կառույցը գործելու էր նաև որպես առանձին, անկախ միավոր` իր քայլերի պատասխանատվությունը պետության վրա չդնելու նպատակով (դա ևս համաձայնեցվելու էր պետության հետ):

Ծրագիրը պատրաստ էր` Շիրխանյանի ձերբակալությունից 3 օր հետո տեղի էր ունենալու դրա շնորհանդեսը: Իսկ երկու ամիս հետո Հայ սպաների միությունն սկսելու էր գործել:

Աշոտ Մանուչարյանը կապ է տեսնում Հայ սպաների միության ստեղծման և Շիրխանյանի ձերբակալության միջև: «Ես կասկածում եմ, որ Սերժ Սարգսյանին ստիպել են «հեռացնել» Շիրխանյանին, որպեսզի այդ կառույցի ստեղծումը տապալվի»,– կարծում է Ա. Մանուչարյանը: Իսկ «ստիպելը» եղել է նաև սխալ տեղեկատվություն տրամադրելով: «Մեր հատուկ ստորաբաժանումներում, ծառայություններում ներմուծված են հատուկ մարդիկ, ովքեր իրականացրել են այդ ստոր բանը: Եվ իմ զարմանքն է, որ այսքան տարիներ ղեկավար պաշտոններ զբաղեցրած լինելով` Ս. Սարգսյանը չի հասկանում մի տարրական բան` իրավապահ մարմիններում անվտանգության խնդիրների լուծում չկա: Առկա ձայնագրություններով առաջնորդվելն անհեթեթ է: Այսօր մոտեցիր ցանկացածի ու ասա, որ ուզում ես նախագահի նկատմամբ նման բան անել: Կասի` ապրես, կարգին տղա ես: Ուրեմն պետք է վիճակը փոխել, ոչ թե ոստիկաններին ուղարկել, որ բոլորին ձերբակալի: 4–ին բռնել ես, 44–ն էլ դրսում է: Հետո՞: Ո՞րին ես բռնելու»:

Բացի այս վարկածը, Աշոտ Մանուչարյանն առաջ է քաշում Շիրխանյանի ձերբակալության մեկ այլ տարբերակ ևս, որը, նրա խոսքով, այնքան էլ հավանական չէ, բայց և բացառել չի կարելի:

Շիրխանյանը վիթխարի ծառայություն է մատուցել Վատիկանին և Ռուսաստանին: Կատարել ոչ պաշտոնական «խողովակի» դեր: Վատիկանը վստահելի, բայց ոչ պաշտոնական խողովակներ է փնտրել Մոսկվայի հետ ինչ–ինչ հարցերում համաձայնության հասնելու նպատակով: «Դժվարանում եմ ասել, թե կոնկրետ ինչ հարցեր են եղել: Բայց կարծում եմ` կապված են եղել աշխարհի ներկա վիճակի, գուցե նաև Սիրիայում քրիստոնյաների ոչնչացման հետ: Այդ հարցերը լիազորված է եղել շոշափել Հայ կաթոլիկ եկեղեցու կաթողիկոս–պատրիարք Ներսես Պետրոս ԺԹ–ն: Շիրխանյանը Ջավախքից է, ֆրանկների` հայ կաթոլիկների գյուղից: Իսկ Շիրխանյանի ազգականը Հայ կաթոլիկ պատրիարքի մտերիմն է: Եվ լինում է զանգ, թե` կարո՞ղ ես գալ Մոսկվա. Ցեղասպանության 100–ամյակի հետ կապված Մոսկվայի կաթոլիկ տաճարում պետք է մատուցվի պատարագ: Ներկա լինելու է ամբողջ բոմոնդը, մարդկանց հետ էլ կհանդիպես: Շիրխանյանը գնում է: Եվ խնդիր է ներկայացվում` կա նման անհրաժեշտություն, մեզ պետք է այսպիսի–այսպիսի որակներով մարդ, բայց կոնտակտը պետք է լինի ոչ ֆորմալ: Եվ Շիրխանյանը օգնում է այդ հարցի կարգավորմանը: Գուցե փորձեցին «խողովակը» կոտրել, թեև Շիրխանյանն իր դերն արդեն կատարել էր: Բայց սա նրա ձերբակալության քիչ հավանական տարբերակն է»,– տեսակետ է հայտնում Աշոտ Մանուչարյանը:

Շարունակությունը` «Փաստ» օրաթերթի այսօրվա համարում: