Դավիթ Գալստյանի պաշտպանները համոզված են, որ ինչ-ինչ շրջանակներին անհրաժեշտ է նրան կալանքի տակ պահել

Royalsys Engineering ընկերության տնօրեն Դավիթ Գալստյանը, որը զենք զինամթերք է մատակարարել Հայաստանին և ներկայումս գտնվում է կալանքի տակ, վերջին շրջանում հանդես է եկել մի շարք հայտարարություններով: Տարածված հայտարարություններից, ըստ էության, պարզ է դառնում, որ կալանքի մասին որոշում կայացնելու ժամանակ դատարանը հաշվի չի առել պաշտպանական կողմի ներկայացրած որևէ փաստարկ: Բացի այդ, չի հետազոտել զենքի առք ու վաճառքի ամբողջ շղթան և, փաստորեն, տրվել է իշխանությունների մանիպուլյացիաներին:

Դ.Գալստյանի պաշտպան Արմեն Հարությունյանը Orer.am-ի հետ զրույցում պատասխանելով հարցին, թե ինչը կարող էր լինել դրա պատճառը, նշեց որ պատճառների մասին այս պահին չի կարող որևէ բան ասել, քանի որ Գալստյանի տարածված հայտարարությունների մեջ այդ ամենին անդրադարձ կատարվել է, բայց իր կարծիքով առաջին ատյանի դատարանը ամբողջությամբ անհիմն և ապօրինի որոշում է կայացրել՝ առանց հաշվի առնելու որևէ հանգամանք և, փաստորեն, զոհ է գնացել մանիպուլյացիաներին:

«Ըստ էության Դավիթ Գալստյանն իր հայտարարության մեջ հստակ նշել է, թե փաստերը վերլուծելով ինչ եզրահանգումների է հանգել: Ուստի այս պահի դրությամբ ոչինչ ավելացնել չեմ կարող, բայց հույս ունենք, որ այս դատական ատյանում գոնե գործն օբյեկտիվ քննության կարժանանա: Մենք ակնկալում ենք, որ մեր բողոքը կբավարարվի, քանի որ ոչ միայն Դավիթ Գալստյանին են ազատությունից ապօրինաբար զրկել, այլ ընդհանրապես քրեական հետապնդումն է անհիմն, քանի որ որևէ հանցակազմ չկա, որով այս պահին քննչական մարմինը մեղադրում է Դավիթ Գալստյանին: Այսինքն, հանցակազմը բացակայում է»,- ասաց Ա. Հարությունյանը:

Նշենք նաև, որ Դ. Գալստյանի կողմից հրապարակվել են մի քանի հայտարարություններ, որոնց համաձայն անդրադարձ է կատարվել այն հանագամանքներին, որոնց համաձայն նրա դեմ հարուցված քրեական գործը որևէ փաստական հիմք չունի:

«Այդ տեղեկությունները, որոնք տարածվել են Դ. Գալստյանի կողմից ենթադրյալ պաշտոններ զբաղեցնելու և այլ երևույթների մասին, ուղղորդված, կեղծ տեղեկություններ են, որոնց նպատակը Գալստյանին Պաշտպանության նախարարության հետ կապելն է: Այսինքն՝ փորձ էր արվում հանրության մեջ ստեղծել այնպիսի տպավորություն, թե՝ հանդիսանալով պաշտոնատար անձ իր ընկերությունների միջոցով անորակ մատակարարումներ է իրականացրել: Այս ամենը, իհարկե, հերյուրանքներ են, որոնք հերքվում են փաստաթղթերով»,- ասաց Ա. Հարությունյանը:

Դ. Գալստյանի մյուս պաշտպան Արմեն Անդրիկյանը Orer.am-ի հետ զրույցում նշեց, որ դատաքննության ընթացքում իրենց կողմից ներկայացվել են բազմաթիվ անհերքելի փաստեր, որոնք ամբողջությամբ հերքում են իրենց պաշտպանյալի առնչությունը իրեն մեղսագրվող հնարավոր արարքի հետ:

«Մեր կողմից ներկայացված ապացույցներից պարզ է դառնում, որ մատակարարումն իրականացվել է պատշաճ քանակի և որակի համապատասխան: Այսինքն՝ այս պայմաններում անգամ Դ. Գալստյանը դեռևս շարունակում է մնալ կալանքի տակ, որը մեզ մոտ ողջամիտ կասկած է առաջանում այն մասին, որ այս գործը իրավական պրոցեսի հետ կապ չունի և պրոցեսից ելնելով կամ ինչ-ինչ անձանց շրջանակներին անհրաժեշտ է, որ Դ. Գալստյանը այս պահին գտնվի կալանքի տակ: Պաշտպանական կողմը արձանագրում է հետևյալ փաստը, որ բացակայում է Դավիթ Գալստյանի մեղքը, առավել ևս, որ մեր կողմից ներկայացվել են բազմաթիվ անհերքելի ապացույցներ, որոնցով հաստատվում է, որ Դ. Գալստյանի ընկերությունը մատակարարել է պահանջված որակի համապատասխան ապրանքը: Եվ այս պայմաններում, փաստորեն, նա շարունակում է մնալ կալանքի տակ, որը ամբողջությամբ անհիմն է և չի տեղավորվում իրավական գործընթացների մեջ»,- ասաց Ա. Հարությունյանը:

Արմինե Գրիգորյան

Orer.am