Աբրահամյանների ընտանիքի տուրքը՝ ապրիլյան պատերազմի զոհերի հիշատակին. լուսանկարներ

Այսօր Հայ Առաքելական եկեղեցու Արարատյան Հայրապետական թեմի առաջնորդական փոխանորդ Նավասարդ արքեպիսկոպոս Կճոյանի ձեռամբ օծվեց ապրիլյան պատերազմի զոհերի հիշատակին նվիրված խաչքարը, որ տեղադրված էր Արարատյան թեմի Արտաշատ քաղաքի Սուրբ Հովհաննես Ավետարանիչ եկեղեցու բակում:

«Այս քարեղեն սուրբ նշանը անմեռ կյանքի խորհրդանիշն է՝ հարության ու երանական փառքի վկայությունը: Անցյալ տարի հայ ժողովուրդը կրկին վերապրեց կորստի ու տառապանքի ցավը: Մեր խիզախ հայորդիները արյան գնով պաշտպանեցին հայրենյաց սահմանները:

Հարյուրից ավելի քաջամարտիկներ իրենց մարմինը նվիրաբերեցին հանուն հայրենիքի ու հանուն ազգային ամենաբարձր արժեքների, ամենաթանկ զգացողության, հանուն ազատության ու արժանապատվության: Յուրաքանչյուրի քաջարումը նվիրական է մեր պատմության հերոսապատման տարեգրության մեջ:

Քառօրյա պատերազմում նրանք՝ մեր նահատակ զինվորները, անմահության գիրկն անցան, մահը փոխվեց անմահության. ինչպես աներկբա վկայություն պատմությունը մեզ ուսուցանում է, գիտակցված մահը անմահություն է: Մենք այստեղ մեր աղոթքներն ենք վեր առաքում առ Աստված եւ հայցում Տիրոջը` մեր քաջամարտիկ նահատակների հոգիների մշտնջենական հանգստության համար:

Թող այս նորաօծ խաչքարի ներկայությունը մեր քաջամարտիկներին նվիրված հիշատակարան լինի` դառնալով ներշնչանքի, հայրենասիրության ու հավատքի անսպառ աղբյուր: Թող մեր զորավոր Տերն անխախտ պահի մեր հայրենիքի սահմանները եւ անկոտրուն` հայրենիքի սիրով տոգորված մեր զինվորներին: Թող սուրբ խաչը սպառազեն լինի նրանց նվիրական ծառայության մեջ»,- օծման արարողությունից հետո իր խոսքում ասաց Նավասարդ Կճոյանը:

Նշենք, որ խաչքարի բարերարները Աբրահամյան ընտանիքն է, որի անդամները՝ Հովիկ Աբրահամյանը, Արգամ Աբրահամյանը եւ նրանց հարազատները, ինչպես նաեւ տեղի բնակիչները, ներկա գտնվելով արարողությանը, հարգանքի տուրք մատուցեցին անմահ հերոսներին` ծաղիկներ խոնարհեցին ու վառվող մոմեր դրեցին խաչաքրի առաջ:

Օծման արարողության ավարտից հետո զոհված զինվորների ընտանիքների անդամների ներկայությամբ եկեղեցում կատարվեց հոգեհանգստյան արարողություն` նվիրված զոհվածների հիշատակին:

Սոսե Չանդոյան