«Հայկական վերածնունդը» պարտվեց քաղաքական պոտենցիալ չունենալու պատճառով. «Փաստ»

«Փաստ» օրաթերթը գրում է.

Նախընտրական շրջանում գրեթե բոլոր քաղաքագետները փորձում էին կանխատեսել, թե 6–րդ գումարման խորհրդարանում քաղաքական որ ուժերն ու դաշինքները ներկայացված կլինեն: Ընտրություններից հետո ժամանակն է ի մի բերել և տեսնել, թե ում կանխատեսումը որքանով է իրականություն դարձել:

Ու չնայած խորհրդարան անցնելու հավանական ցանկը տարբեր քաղաքագետների կանխատեսումներով տարբեր էր, սակայն հիմնականում բոլորն էլ նշում էին, որ հաջորդ խորհրդարանում ներկայացված կլինեն 4 կամ 5 քաղաքական ուժ:

Քաղաքագետ Հայկ Սուքիասյանը «Փաստի» հետ զրույցում նշեց, որ իր կանխատեսումներով անցողիկ շեմը պետք է հաղթահարեին 4–ը, սակայն ներկա դասավորությունը նրա համար փոքր–ինչ անակնկալ էր:

«Իմ կարծիքով պետք է խորհրդարան անցնեին հետևյալ դասավորությամբ՝ «Ծառուկյան» դաշինք, ՀՀԿ, «ՕՐՕ» դաշինք և չորրորդը՝ «Ելք»: Բայց, այդպես չստացվեց: Դրա պատճառները շատ տարբեր են և մեկնաբանություններն էլ կարող են տարբեր լինել: Միգուցե «ՕՐՕ»–ին չհաջողվեց ժողովրդին համոզել, որ ինքը իրական ընդդիմություն է: Եվ այդ պատճառով նրանք տապալվեցին: Բայց մի դաշինքում, որտեղ երկու նախկին արտգործնախարար և գեներալ կար, չպետք է դժվարանային անցողիկ շեմը հաղթահարելու հարցում»,– ասաց Հ. Սուքիասյանը:

«Ելք»–ի մասով նրա կանխատեսումները թեև իրականություն են դարձել, բայց քաղաքագետի կարծիքով կարևոր է, որ «ՀԱԿ–ՀԺԿ» դաշինքի ներկայացրած ծրագրին տրված քվեների քանակով հստակեցվել է ժողովրդի մոտեցումը նրանց ներկայացրած ծրագրին:

Խոսելով խորհրդարան անցած չորրորդ ուժի՝ ՀՅԴ–ի մասին, նա նշեց, որ իր հաշվարկներով կուսակցությունը խորհրդարան չպետք է անցներ, քանի որ ավելի վաղ՝ քաղաքագիտական առումով սխալ էր թույլ տվել:

«ՀՅԴ–ն լինելով բանվորագյուղացիական և աղքատ մարդկանց շահերը պաշտպանող կուսակցություն, «ամուսնացել» էր «օլիգարխի» հետ և այդ պատճառով, իմ կարծիքով իր ընտրազանգվածին պետք է որ կորցրած լիներ: Բայց ՀՅԴ–ն ամենայն հավանականությամբ խորհրդարան է անցել ՀՀԿ–ի օգնությամբ և այն պայմանով, որ կոալիցիա կազմի ՀՀԿ–ի հետ: Հակառակ դեպքում մեծ էր հավանականությունը, որ այդ կուսակցությունը չէր հաղթահարի անցողիկ շեմը»,– ասաց Հ. Սուքիասյանը:

Քաղաքագիտական սխալն ուղղելու համար նա խորհուրդ է տալիս ՀՅԴ–ին, կոալիցիա չկազմել ՀՀԿ–ի հետ: Ինչ վերաբերում է հետընտրական պրոցեսներին, ապա այն տեղի չի ունենա, քանի որ տպավորությունն այնպիսին է, որ գրեթե բոլորը համաձայն են ներկայացված արդյունքների հետ:

Հետաքրքիր է, որ ՀՎԿ–ի անցողիկ շեմը չհաղթահարելու փաստը նույնպես կանխատեսելի է եղել քաղաքագետի համար, քանի որ այն խորհրդարան անցնելու որևէ քաղաքական պոտենցիալ չուներ:

«Ուզում են ռեբրենդինգ անեն, ուզում է նոր փաթեթավորում անեն, ուզում են հագուստները փոխեն, ոչինչ էլ չէր փոխվելու, քանի որ քաղաքական պոտենցիալ ՀՎԿ–ն չուներ: Ինչ վերաբերում է «Ելք»–ին, ապա կարծում եմ, որ դաշինքը բավականին լավ էր պատրաստվել: Բացի այդ, բակերում, մարդկանց հետ անմիջական շփվելով բավականին լուրջ աշխատանք կատարեցին: Կարևոր էր նաև, որ կարողացան երիտասարդներին իրենց կողմը գրավել»,– ասաց Հ. Սուքիասյանը:

Շարունակությունը` «Փաստ» օրաթերթի այսօրվա համարում: