Ս. Լավրով. «Համանախագահ երկրները տարբեր կերպ են պատկերացնում ծրագրի բաղադրիչների կենսագործման հաջորդականությունը». «Փաստ»

«Փաստ» օրաթերթը գրում է.

Երեկ ադրբեջանական APA գործակալությանը հարցազրույց է տվել ՌԴ արտգործնախարար Սերգեյ Լավրովը և հիմնականում անդրադարձել ԼՂ հակամարտության կարգավորմանը, խոսել ապրիլյան պատերազմից: Իր խոսքում Լավրովը ևս մեկ անգամ ընդգծել է, որ Մինսկի խումբն է այն ձևաչափը, որը հանդիսանում է ԼՂ հակամարտության կարգավորմանն ուղղված բանակցային գործընթացի հիմնական հարթակը: Բարձր գնահատելով համանախագահների ջանքերը` Լավրովն ընդգծել է, որ «եռյակը» դրսևորում է թիմային մոտեցում, բանակցություններում հանդես գալիս միասնական դիրքորոշմամբ:

«Այսօր քննարկվող գաղափարների հիմքում ընկած են դրույթներ, որոնք միասնաբար մշակվել են համանախագահ երեք երկրների կողմից: Ավելի կոնկրետ, խոսքն այն դրույթների մասին է, որոնք հնչեցվել են Ռուսաստանի, Ֆրանսիայի և ԱՄՆ նախագահների կողմից ԼՂ հակամարտության կարգավորման վերաբերյալ համատեղ հայտարարություններում: Դրանք քաջ հայտնի են»,– ասել է Լավրովը: Այնուհանդերձ, ՌԴ արտգործնախարարը մի կարևոր հանգամանք է բացահայտել: «Ընդհանուր առմամբ չմերժելով այդ հիմքը` կողմերը տարբեր կերպ են պատկերացնում դրա բաղադրիչների կենսագործման հաջորդականությունը»,– ասել է նա:

Բացի այդ, ՌԴ արտգործնախարարը ևս մեկ անգամ վերահաստատել է` «Լավրովի պլան» գոյություն չունի: Հիշեցնենք, որ նման պլանի մասին առաջինը բարձրաձայնել է ադրբեջանական կողմը: Ապրիլյան իրադարձություններից հետո տեղի ունեցած Վիեննայի ու Սանկտ–Պետերբուրգի հանդիպումներում ձեռք բերված համաձայնությունների տակ Ադրբեջանը հրաժարվեց ստորագրել: Ուստի փորձեց փոխել բանակցային օրակարգը` իր համար անընդունելի կետերը, մասնավորապես հետաքննող մեխանիզմների տեղակայման ու դիտորդական առաքելության ընդլայնման հարցերից խուսափելու նպատակով: Ավելին, ադրբեջանական մամուլում սկսվեցին հայտնվել, այսպես կոչված, «Լավրովի պլանի» մասին դատողություններ ու եզրակացություններ, որոնք, ըստ այդմ, տարբերվում էին Մինսկի խմբի առաջարկություններից:

Ուստիև այս առումով Լավրովի ևս մեկ վերահաստատումը կարևոր էր: Թեև հարկ է նշել, որ մի քանի օր առաջ Երևանում կայացած ասուլիսի ընթացքում «Լավրովի պլանի» չգոյության մասին հայտարարել էր նաև ամերիկացի համանախագահ Հոգլանդը: Նա բացահայտել էր, որ բանակցային սեղանին դրված է երեք մասից բաղկացած ծրագիր, որը ոչ ամերիկյան կողմի ներկայացրածն է, ոչ էլ «Լավրովի պլանն է», այն արտահայտում է Մինսկի խմբի ընդհանուր դիրքորոշումը:

Բացի այդ, Լավրովը ևս մեկ անգամ նշել է, որ «շատ հարցեր արդեն համաձայնեցվել են: Մնացել է մի քանի հարց»: «Բայց դրանք ամենաբարդն են: Առայժմ չի հաջողվել գալ համաձայնության: Այնուամենայնիվ, աշխատանքները շարունակվում են»,– ասել է նա` ընդգծելով, որ ելնելով խնդրի` բավականին դելիկատ լինելու հանգամանքից` բանակցային մանրամասները կրում են «կոնֆիդենցիալ բնույթ»:

Հարկ է նշել, որ Լավրովի նշած աշխատանքների շարունակությունը կարող է լինել նախագահների հնարավոր հանդիպումը: Այն, որ նախապատրաստվում է նման հանդիպում, հայտարարել էր Հոգլանդը: Երեկ հայկական որոշ լրատվամիջոցներ նշել էին, որ այդ հանդիպումը նախաձեռնում է ամերիկյան կողմը: Հոգլանդից մեկ օր առաջ էլ նման հանդիպում կազմակերպելու պատրաստակամության մասին հայտարարել էր Ֆրանսիայի արտգործնախարարը:

Թե երբ և որտեղ կլինի նախագահների հանդիպում, առայժմ դժվար է ասել: Վաղը Հայաստանում խորհրդարանական ընտրություններ են: Ու թե հետընտրական ինչ զարգացումներ կլինեն, դրանք որքան կտևեն, հետևաբար ինչ իշխանություն կձևավորվի, պարզ կլինի առաջիկայում: Եթե ավելի հեռուն գնանք, մյուս տարվա աշնանն էլ Ադրբեջանում են սպասվում նախագահի ընտրություններ: Հետընտրական ու նախընտրական տուրբուլենտ գոտում գտնվող երկրների իշխանությունները դժվար թե լուրջ քայլերի գնան, թեև նախագահների հանդիպումը այդ լուրջ քայլերի մեջ թերևս չի մտնում:

Շարունակությունը` «Փաստ» օրաթերթի այսօրվա համարում: