Չի կարելի թույլ տալ այս դավաճան իշխանություններին իրենց պլանները կատարել․Վանեցյանն ու մյուսները շարժվում են Փակ շուկա

Վարչապետ Նիկոլ Փաշինյանի հրաժարականը պահանջող քաղաքացիները «Հայրենիք» կուսակցության նախագահ Արթուր Վանեցյանի հետ Ֆրանսիայի հրապարակից երթով շարժվում են դեպի Փակ շուկա, ապա այլ հատվածներ եւ մարդկանց կոչ անում միանալ իրենց, որպեսզի օր առաջ հեռացնեն Նիկոլ Փաշինյանին։

«Այսօր այդ հարցի վերջը պիտի տանք, բոլորս իրար հետ վճռական ցույց ենք տալիս, որ այլեւս Նիկոլ Փաշինյանը այս երկրում իշխանության չունի»,- հայտարարեց Վանեցյանը։

Նշենք, որ ավելի վաղ երթի ընթացքում ոստիկանները բերման ենթարկեցին ՀՅԴ ԳՄ անդամ Իշխան Սաղաթելյանին։ Լրագրողների հարցին, թե ինչպե՞ս է գնահատում ոստիկանության գործողությունները, Վանեցյանն ասաց․ «Ոստիկանության գործողություններն ապօրինի է, բայց ես չեմ մեղադրում նրանց։ Ոստիկանները մոլորված են եւ կատարում են դավաճանի հրամանները։ Դա ժամանակավոր բնույթ  է կրում եւ ես համոզված եմ, որ ՀՀ ոստիկաններն ունեն այնքան արժանապատվություն, պատիվ, եւ թասիբ,  որ ի վերջո միանալու են ՀՀ քաղաքաիցների պահանջին, մեր պահանջը մեկն է՝ փրկել մեր հայրենիքն այս դավաճան իշխանություններից։ Ժողովուրդ, երկիրը կործանման եզրին է, մենք հասել ենք մի կետի, որտեղից այլեւս հետադարձ ճանապարհ չկա, վտանգված է բոլորիս տները, ընտանիքները, մեր ինքնությունը, հայ ազգը գնում է կործանման, չի կարելի թույլ տալ, որ այս դավաճան իշխանություններն իրենց պլանները կատարեն»։

Արթուր Վանեցյանը դիմելով երթի մասնակիցներին կոչ արեց չհուսահատվել, որովհետեւ պայքարելու են մինչեւ վերջ։ «Առանց Նիկոլ Հայաստան» վանկարկումներով երթի մասնակիցները գնում շարժվում են Մաշտոցի պողոտայով։