Եթե Օնիկ Գասպարյանն էլ ասի՝ էս երկու օրը, ըստ դրա՝ կփակվեն բոլոր միջպետական ճանապարհները․ անհետ կորածի մայր

Քիչ առաջ Էջմիածնի զորամասում ավարտվեց Գլխավոր շտաբի լրատվականի պետ Սամվել Ասատրյանի եւ անհետ կորած զինծառայողների հարազատների փակ հանդիպումը։ Ասատրյանը տարածքից հեռացավ լրագրողների հարցերն անպատասխան թողնելով, նշելով, որ ինչ պետք է ծնողներին ասել է, իսկ ինֆորմացիան փակ է, արդյունքների մասին հետագայում կհայտարարվի։

Անահիտ Ադոյանը, ում որդին անհետ կորածների շարքում է, լրագրողներին ասաց, որ ոչ մի նորություն չի ասվել իրենց եւ կրկին պետք է սպասեն։ «2 օր փորձեցին մեզ լռեցնել ինչ-որ բան ասելու համար, ընդամենն ասացին՝ ընթացքի մեջ է։ Արդեն 50 օր է՝ հարց եմ բարձրացնում՝ ասեք՝ ե՞րբ, իրենք փաստացի չեն կարողանում ասել, որ երբեք, ամեն օր էսօր կամ վաղն են ասում։ Հարցս կրկին անպատասխան մնաց»,- ասաց նա՝ հավելելով, որ ՊՆ ներկայացուցիչներին ձեռնտու չէ, որ իրենք իրենց երեխաներից լուր ունենան։

«Օնիկ Գասպարյանը վերջին մարդն է, ում պիտի հանդիպենք, եթե ինքն էլ ասի՝ էս երկու օրը, ըստ դրա՝ կփակվեն բոլոր միջպետական ճանապարհները, ոչ մեկ ոչ մի գործողություն չի անի, մինչեւ մեր երեխեքին չգտնեն։ Մենք էլ պատրաստ չենք սպասել, մեր պետությունը սիրում է ջարդեն, ծեծեն, վառեն, էդ ժամանակ նոր մեր ձայները կհասնի, իսկ եթե սուսուփուս սպասում ենք, ասում են՝ էս ժողովուրդը համբերատար սպասում է, ու պարբերաբար մեզ կասեն՝ երկու օր սպասեք»,- նշեց Անահիտ Ադոյանը։