«Իրատես». Արշակ Սադոյանը գոռգոռացել է Փաշինյանի վրա, Գագիկ Գինոսյանն առաջարկել է մասնակցել Բաքվի զորահանդեսին

Վարչապետ Նիկոլ Փաշինյանի եւ Հանրային խորհրդի անդամների՝ օրերս կայացած հանդիպումը բավական բուռն է անցել: Հանդիպմանը Հանրային խորհրդի 44 անդամներից մասնակցել է 14-ը, ներկաների հիմնական մասը խոսել է կառավարության ձախողումների եւ Նիկոլ Փաշինյանի հրաժարականի անհրաժեշտության մասին:

«Իրատեսի» տեղեկություններով՝ հանդիպման ժամանակ Փաշինյանին ամենասուրը Հանրային խորհրդի անդամ, «Կարին» ավանդական երգի-պարի համույթի հիմնադիր եւ գեղարվեստական ղեկավար Գագիկ Գինոսյանն է քննադատել, ելույթ ունենալուց հետո էլ հայտարարել, որ դուրս է գալիս խորհրդի կազմից: «Գինոսյանը ելույթը սկսել է Փաշինյանին ու նրա՝ ամեն ինչից «բեխաբար» թիմը դավաճան անվանելով: Վրդովված ու արհամարհական տոնով նշել է, որ իշխանության ամենաճիշտ որոշումը կամ փրկագինն այն կլինի, որ դեկտեմբերի 10-ին՝ Ադրբեջանում անցկացվելիք զորահանդեսի օրը, Փաշինյանն ԱԺ «Իմ քայլը» խմբակցության հետ հանդիսավոր կերպով փոխանակում իրականացնի՝ իրենք մնան, ռազմագերիները հետ գան: Նա ելույթը եզրափակել է հետեւյալ խոսքով. «Ինչ լավ է, որ ձեր պիղծ ձեռքով Լեոնիդ Ազգալդյանին հերոսի կոչում չեք շնորհել»,- պատմեց մեր զրուցակիցը:

Նա նաեւ փոխանցեց, որ բավական հախուռն պահվածք է դրսեւորել Հանրային խորհրդի մեկ այլ անդամ՝ հասարակական, քաղաքական գործիչ Արշակ Սադոյանը: Ըստ մեր աղբյուրի՝ Սադոյանը, Փաշինյանին տեսնելով, սկսել է գոռգոռալ, թե՝ մինչեւ հիմա ի՞նչ եք անում այդ աթոռին նստած: «Պարոն Սադոյանը ձենը գլուխն էր գցել, թե՝ ա՛յ տղա, ի՞նչ ես կառչել աթոռից, թող գնա: Պարտվել ես, գնա, էլի՝ անվերջ գոռում էր նա: Անվտանգության աշխատողներն էին անգամ անհանգստացել, մի պահ փորձում էին առաջ գալ՝ փորձելով կանխել Սադոյանի հավանական «հարձակումը»: Հանրային խորհրդի մյուս անդամնեը, տեսնելով, որ չի հանդարտվում, Սադոյանին խնդրել, հորդորել, համոզել են դուրս գալ»:

Առավել մանրամասն՝ թերթի այսօրվա համարում