Արցախի հողերը հանձնած դավաճան Նիկոլ Փաշինյանը փորձում է կեղտոտ մանիպուլացիաների միջոցով պատասխանատվությունն այլոց վրա բարդել

Երեկ «Երկիր Մեդիա» հեռուստաընկերության եթերից ԲՀԿ ղեկավար Գագիկ Ծառուկյանի հայտարարությունն առ այն, որ հողերի հանձնման պայմանավորվածությունը դավաճանություն է, կարծես թե չափազանց ցավոտ է եղել Նիկոլ Փաշինյանի համար: Իրականությունն այո երբեմն ցավոտ է լինում:

Գագիկ Ծառուկյանն ասաց նաև, որ սեպտեմբերի 28-ին, այսինքն պատերազմի հենց հաջորդ օրը, ՌԴ-ից առաջարկ է եղել կանգնեցնել այդ արհավիրքը՝ ռուս խաղաղապահ զորքերի տեղակայման պայմանով, որն այսօր, արդեն 45 օր դաժան պատերազմից հետո, նոր իրագործվել է, քանի որ դավաճան «վարչապետն» այն ժամանակ մերժել էր այդ առաջարկը: Վարչապետի մամուլի խոսնակը, ավելորդ շտապողականություն դրսևորելով, «փնթի» արդարացում մտածեց և աղավաղելով Գագիկ Ծառուկյանի խոսքը, թե իբր Ծառուկյանը ասել է հոկտեմբերի 28, ներկայացրեց երկու փաստ, որ Նիկոլ Փաշինյանը, դեռևս հոկտեմբերի 22-ի իր հարցազրույցներից մեկում արդեն իսկ համաձայնություն է տվել ռուս խաղաղապահների տեղակայմանը և ըստ այդմ էլ հոկտեմբերի 28-ին չէր կարող մերժած լիներ: Վարչապետի մամուլի խոսնակն ակնհայտորեն ստում է կրկնում ենք, Ծառուկյանը սեպտեմեբրի 28-ի մասին էր խոսում, պատերազմի հենց հաջորդ օրվա, սա հասկացանք, բայց որ այդ էժան սուտը փորձում է նաև ծաղկեցնել երկրի թիվ 1 դավաճան Նիկոլ Փաշինյանը, որին արդեն վարչապետ անվանելը ճոխություն կլինի, դա ևս սպասելի էր, քանզի թերթի խմբագրի մակարդակից այդպես էլ երկրի ղեկավար չդարձած ձախողակը, մանիպուլացիայի ու մարդկանց ապակողմնորոշելու վարպետ է: Բայց այս անգամ չի ստացվելու...

Նիկոլ Փաշինայնը քիչ առաջ իր լայվում կասկածի տակ դրեց այն փաստը, որ Գագիկ Ծառուկյանը կամավորական ջոկատներ է կազմել և ուղարկել առաջնագիծ, կասկածի տակ դրեց Գագիկ Ծառուկյանի նյութական աջակցությունը բանակին և այլն:

Կից գրառմանը ներկայացնում եմ մի քանի լուսանկար, որտեղ ԲՀԿ կամավորական ջոկատները կազմավորվել են, անցել համապատասխան զորավարժանքներ և մեկնել առաջնագիծ: Ի դեպ, այդ ամենից քաջ տեղյակ է նաև ՀՀ ԶՈՒ ԳՇ պետ Օնիկ Գասպարյանը և եթե կասկածներ ունի Նիկոլ Փաշինյանը, կարող է զանգել և հարցնել, թե ԲՀԿ կամավորականների ջոկատներն ինչ հաճախականությամբ և կոնկրետ որ մարտական դիրքերում են իրականացրել մարտական ծառայություն:

Բացի դա, պատերազմի հենց առաջին իսկ օրվանից, առաջնագծի ամենաթեժ կետերում են եղել նաև ԲՀԿ պատգամավորներ Հրանտ Մադաթյանն ու Արայիկ Աղաբաբյանը, ովքեր իրենց ջոկատների հետ, լեգենդար «Սև Հովազ» ջոկատի հրամանատար լուսահոգի Ռուստամ Գասպարյանի հետ միասին պաշտպանել են հայրենիքը: ԲՀԿ-ական պատգամավոր Էդուարդ Բաբայանը, ով կամավորական ջոկատի հետ միասին մեկնել էր առաջնագիծ:

Սա կոնկրետ փաստրեով, հիմա ըստ էության...

Ինչ է անում հիմա Նիկոլ Փաշինյանը. իրեն հատուկ պոպուլիզմի, սրա-նրա վրա մեղքը բարդելու արդեն իսկ հայտնի մեթոդներով, փորձում է մեղավորներ փնտրել, որպեսզի արդարացի իր դավաճանական քայլը: Մինչդեռ կրկնում ենք, ինչպես հայտարարեց Գագիկ Ծառուկյանը, պատերազմի հենց հաջորդ օրը՝ սեպտեմբերի 28-ին, ՌԴ-ից առաջարկ էր ստացվել՝ խաղաղապահների տեղակայմամբ պատերազմը կանգնացնելու պայմանով, ինչը Նիկոլ Փաշինյանը կտրուկ մերժել է: Դե պարզ պատճառներով, Նիկոլ Փաշինյանն այսպես ասած սիրախաղի մեջ էր նաև արևմուտքի՝ մեր պետության համար խորթ ուժերի հետ և միանշանակ չէր ցանկանում մեր դարավոր ռազմաքաղաքական գործընկեր ՌԴ-ի հետ խորացնել կապերն ու փրկել զինվորների կյանքներն ու Արցախի հողերը: Նրա համար իր անձնական ամբիցիաներն ավելի կարևոր էին, քան զինվորի և պետության անվտանգության հարցերը:

Հիմա այսքանից հետո, անկախ ամեն ինչից, պարտված, դավաճան Նիկոլ Փաշինյանը չպետք է լինի Հայաստանի ղեկավար: կառավարումը տապալած թիմը, պետք է հեռանա, կարող և առողջ ուժեր են պետք, որպեսզի կարողանանք դիմագրավել արդեն իսկ ծանր կացության մեջ լինելով հանդերձ, նոր մարտահրավերներին: Անկասկած Նիկոլ Փաշինյանի և իր ապաշնորհ թիմի հետ այդ ամենը իրականացնելը ֆանտազիայի ժանրից է և եթե չենք ուզում էլ ավելի ծանր ու անդառնալի հետևանքների ականտես դառնալ, ապա րոպե առաջ պետք է պահանջել «վարչապետ» Նիկոլ Փաշինյանի և իր կառավարության հրաժարականը: