Ավստրալական Westpac բանկն օրենքի 23 միլիոն խախտման համար ստիպված է 1,3 միլիարդ դոլար տուգանք վճարել

Ավսրտալիայում Westpac բանկը փողերի լվացման մասին օրենքների խախտման, մանկապղծության ու թրաֆիքինգի հետ կապված հանցագործություններին անուղղակի կերպով աջակցելու համար ստիպված է 1,3 միլիարդ դոլարի տուգանք վճարել, գրում է Daily Mail պարբերականը: 

Ավստրալիայում երկրորդ ամենախոշոր բանկը համարվող Westpac-ն ընդունել է, որ վեց տարի շարունակ մոտ 23 միլիոն խախտում է իրականացրել և հրաժարվել է ավելի քան 11 միլիարդ դոլարի անօրինական միջազգային փոխանցումներ մասին տեղյակ պահել համապատասխան մարմիններին: 

Բանկն ընդունել է նաև, որ 284 հաճախորդի թույլ է տվել փոխանցման միջոցով Հյուսիսարևելյան Ասիայում երեխաների սեռական շահագործման համար խոշոր վճարումներ կատարել: 

Նշվում է, որ բացվել են տասնյակ հաշիվներ, որոնք թույլ են տվել ավստրալացի մանկապիղծներին ճանապարհորդել, երեխաների շահագործել ու իրենց գործողությունները տեսանկարահանել: 

Դատապարտված ավստրալացի մանկապիղծ Փիթեր Սքուլին, որը մեղադրվում է Ֆիլիպիններում աղջիկների բռնաբարության ու թրաֆիքինգի համար, երեխաների տեսանյութերը վաճառել է Westpac հաշիվների միջոցով: 

Նշվում է, որ դեռևս 2016 թվականին այս բանկն իր նոր ներդրած վճարային մեթոդը երեխաների մանկապղծության համար օգտագործելու ռիսկի մասին զգուշացում էր ստացել: ASX կայքում բանկը ներկայացրել է 94 էջից բաղկացած փաստաթուղթ, որում պատմել է 2013-ից 2019 թվականներին փողերի լվացման և ահաբեկչական գործողությունների դեմ օրենքների իր խախտումների մասին: