Ցմահ ազատազրկման դատապարտված մեքսիկացի նարկոբարոն «Էլ Չապոն» բողոքարկել է իր դատավճիռը

Ցմահ ազատազրկման դատապարտված մեքսիկացի նարկոբարոն Խոակին Գուսմանը, որն ավելի շատ հայտնի է «Էլ Չապո» («Գաճաճ») մականվամբ, բողոքարկել է անցած տարի ամերիկյան դատարանի կայացրած վճիռը, գրում է english.alarabiya.net-ը։

Նշվում է, որ Գուսմանի փաստաբանը դատավճռի բողոքարկման մասին փաստաթուղթը նախօրեին ներկայացվել է Նյու Յորքի երկրորդ շրջանային վերաքննիչ դատարան:

Մեքսիկայի հզոր թմրակարտելի 62-ամյա նախկին առաջնորդն անցյալ տարի ցմահ ազատազրկման է դատապարտվել ավելի քան քառորդ դար ընդգրկող հանցագործությունների համար, ներառյալ՝ հարյուրավոր տոննա կոկաինի, հերոինի, մետամֆետամինների և մարիխուանայի անօրինական շրջանառությունը:

Գուսմանի օրոք նրա կարտելի սահմանները տարածվում էին ամբողջ երկրագնդով մեկ՝ Ամերիկայից մինչև Եվրոպա և Ասիա։

Նրան երկու անգամ հաջողվել է փախչել բանտից։ Երկրորդ անգամ՝ 2015 թվականին՝ մոտ 1,5 կիլոմետր երկարությամբ թունելի միջոցով:

Գուսմանին, ի վերջո, հայտնաբերել և ձերբակալել են 2016 թվականի սկզբին՝ Մեքսիկայում, իսկ մեկ տարի անց արտահանձնել ԱՄՆ-ին, որտեղ միանգամից մի քանի նահանգ նրան կոկաինի մատակարարման, զենքի ապօրինի պահման և սպանությունների կազմակերպման համար մեղադրանքներ է առաջադրել:

Այժմ Էլ Չապոն պահվում է մեկուսարանում՝ ԱՄՆ-ի ամենախիստ բանտերից մեկում: