«Եկավ, հաղթեց, գնաց». Հաց Բերողի մահվան գույժի ֆեյսբուքյան արձագանքները

Այսօր «Արմենիա» բժշկական կենտրոնում մահացավ «Հաց բերող» Արթուր Սարգսյանը: Վերջինս օրեր առաջ էր դուրս գրվել «Արմենիա» բժշկական կենտրոնից, որտեղ նրան տեղափոխել էին դատապարտյալների հիվանդանոցից՝ 25-օրյա հացադուլից հետո: Սակայն նրա առողջական վիճակը նորից բարդացավ, հիվանդանոցում երեկ գիշերը վիրահատության ենթարկվեց, սակայն` ցավոք սրտի, նրա կյանքը փրկել չհաջողվեց:

«Հաց բերողի» մահվան գույժը անմիջապես տարածվեց համացանցում: Հազարավոր քաղաքացիներ արձագանքել են այս ցավալի լուրին: Ներկայացնում ենք ֆեյսբուքյան օգտատերերի արձագանքները: 

***

Կարպիս Փաշոյան.

«Քիչ առաջ «Արմենիա» բժշկական կենտրոնում մահացավ հաց բերող Արթուր Սարգսյանը: Իշխանությունները դանդաղ սպանեցին այդ մարդուն: Ննջես խաղաղությամբ, «Հաց բերող» ջան»:

Խաչիկ Աբրահամյան.

«Բարի անուն, բարոյական խրատ թողեց ու գնաց»։

Սամվել Արամի Հայրապետյան.

«Արթուր Սարգսյան «Հաց Բերող»... Մարդ, ով չպետք է ծնվեր մեր օրերում, քանի որ 21-րդ դարում չեն ընդունում այդպիսի մարդկանց: 21-րդ դարը կեղծիքի, ստի, թալանի դար է։ Հաց Բերողը ծնվել և ապրել է սխալ ժամանակներում, սխալ երկրում... Հաց Բերողը մահացավ հանուն իր պատկերացրած Հայաստանի, հանուն ազատության, հանուն ճշմարտության, հանուն իր անկոտրուն տեսակի... Հաց Բերողին պետք է դասել բոլոր ժամանակների ամենամեծ մարդկանց կողքին, որոնք կռվել, պայքարել և մահացել են հանուն նույն գաղափարների։ Հաց Բերողը իր մահով ավելի ու էլ ավելի սերմանեց մեր մեջ հայրենասիրություն։

21-րդ դարում շատ քիչ կհանդիպենք քայլող լեգենդների, Արթուրը նրանցից մեկն էր։ Մեկ մեկ Արթուրի մասին մտածելուց ինձ թվում էր մտածում եմ ինչ որ նախնադարյան ասպետի մասին, ախր շատ պարզ էր, շատ մաքուր, շատ անկեղծ, շատ ժպիտով.... Հաց Բերողը մահացավ, քանի որ նրան սպանեցին դանդաղ... շատ դանդաղ...
Հաց Բերողը պետք է ապրեր այն ժամանակներում, երբ դեռ կար մարդկություն, երբ դեռ գնահատվում էր գաղափար ասվածը։ Գնաս խաղաղությամբ Հաց Ախպեր, եկար, հաղթեցիր, գնացիր»:

Արմինե Մարտիրոսյան.

«Մենք բոլորս ՀԱՑ ԲԵՐՈՂ պետք է լինեինք. ուշացանք»:

Հարություն Մնացականյան.

«Հաց բերողը մահացավ, ափսոս էր շատ, ինձ թվում է նա մեր պատմության մեջ կմնա որպես բարության, մարդասիրության և կարեկցող ընկերոջ սիմվոլ»։

Գրիշա Վիրաբյան.

«Լավագույն ու ազնիվ տղան հեռացավ»:

Արփենիկ Մարության.

«Մարդասպաններ, ուրիշ ոչինչ»:

Արուս Հարությունյան.

«Դանդաղ ու աստիճանաբար իշխանությունը մահվան հասցրեց հաց բերողին: Հանգչես խաղաղությամբ, հաց բերող»:

Ալբերտ Նաջարյան.

«Հաց Բերողը մահացավ... շատ ցավալի է: Արթուրի մահը Սերժիկի ու էս կեղտոտ իշխանությունների խխճին է , դա տենց է: Իրոք, շատ ցավալի է... մի տեսակ ոնց որ ամեն մեկս մեզ հարազատ մարդ ու իդոլ կորցրեցինք էսօր»:

Լևոն Բարսեղյան.

«Եկավ, հաղթեց, գնաց»:

Անահիտ Գրիգորյան.

«ՆԵՐԻՐ մեզ, մենք դեռ շատ հաց պիտի ուտենք,որ հասկանանք, կամ էլ ոչ, ՔՈ տարած ՀԱՑԻ ԳԻՆԸ»:

Գոհար Գոգա.

«Արթուրը մարդու հերոս տեսակն էր, ազգային հերոս ազգի նվիրյալ. Հանգչիր խաղաղուրյամբ, որովհետև ազգդ մեծ ցավով սգում է կորուստդ. ԴՈՒ ԿՄՆԱՍ ՄԵՐ ՍՐՏԵՐՈՒՄ ՀԱՎԵՐԺ»:

Տիրայր Ղահրամանյան.

«Մեր Հաց բերողը մահացավ։ Նրա մահը այս իշխանության ղեկավարման հետևանք է։ Բայց դեռ այսքանից հետո բազմաթիվ 30 կոպեկով հոգի վաճառողները շարունակելու են սպասարկել սերժին ու իր հանրապետական կուսակցությանը»:

Կարինե Հարությունյան.

«Հաց եմ բերել տղերք, խղճիս վարձն եմ բերել»:

Գոհար Սիմոնյան.

«Հաց տանողը մահացավ: Մենք ողջ ըլնենք մեր էրեխեքի գլխին...
Հ.Գ. Ծռերին չեմ պաշտպանել, այո՛, որովհետև համարում եմ, որ վիշապին մորթողն ինքն է վիշապ դառնում, բայց նաև չեմ դադարի ասել, որ նրանց էնտեղ են դանդաղ սպանում, էս խեղճին էստեղ սպանեցին»:

Աննա Մնոյան.

«Բոլորս մահացանք Հաց Բերողի հետ: Սրանք սպանեցին նաև մեզ…»:

Հովիկ Չարխչյան.

«Հաց բերողը չմահացավ, հաց բերողին սպանեցին»:

Արմեն Գևորգյան.

«Հաց բերողին սպանեց Սերժը... Արթուր Սարգսյանի մահը քաղաքական սպանություն է»։

Եվա Ադամյան

«ՀԱՑ ԲԵՐՈՂԻ սպանությունը պետք է միավորի բոլոր նրանց, ովքեր իսկապես դեմ են իշխող մարդատյաց կլանին: ՀԱՑ ԲԵՐՈՂը պետք է սրանցից ազատվելու փարոս դառնա»:

Էդգար Գասպարյան.

«Ո՞վ ասաց՝ միայն հացիվ,
Ո՞վ ասաց՝ հացն է պակաս․․․
Նա փորձեց հացից բացի,
Հացի հետ կյանք տալ ու դաս,
Երբ չկար ապրելու ուժ
Մեռնելու համար անգամ,
Երբ կյանքը ուխտադրուժ,
Երբ կյանքը մուժ ու տարտամ,
Բառերից, խոսքերից զատ
Էլ ոչինչ չուներ տալու․
Նա փորձեց ապրել ազատ՝
Ապրելուն հավատալով։
Հաց Բերողին
Գարեգին Միսկարյան

Սեմ Իսրայելյան.

«Նա ամենավտանգավորն էր, նրա Մարդ կերպարը չէր կարող տեղ ունենալ այսօրվա Հայաստանում»:

Արմեն Մկրտչյան.

«Մեր գաղջ կյանքում եզակի լուսավոր կետեր են լինում, ու էդ կետերից մեկը՝ մեր հաց ախպերը մահացավ, սպանվեց արնախում ռեժիմի ձեռքով»:

Տաթև Խաչատրյան.

«Դատախազություն, հիշում ե՞ք ձեր հայտարարությունը՝ Սարգսյանին կրկին կալանավորելիս: Ստացված կրկնակի դատաբժշկական փորձաքննության եզրակացության համաձայն՝ Ա.Սարգսյանի մոտ առկա հիվանդությունները, այդ թվում նաև Բեխտերևի հիվանդությունը՝ առանց ներքին օրգանների ախտահարումների, չեն դասվում ՀՀ կառավարության 2006 թվականի մայիսի 26-ի N 825-Ն որոշման N 2 հավելվածով սահմանված պատիժը կրելուն խոչընդոտող ծանր հիվանդությունների շարքին, և վերջինս ստացիոնար բուժման կարիք չունի:

Փակեք դատախազությունը գնացեք տուն»: