Հարցազրույցում հնչեցվեցին ԶՈՒ հեղինակության դեմ ուղղված հայտարարություններ, բայց ամենավտանգավորը ժամկետային զինծառայության հետ կապված ձևակերպումներն էին․ Աբրահամյանը՝ Ա․ Քոչարյանի հարցազրույցի մասին

ԱԺ պաշտպանության և անվտանգության հարցերով մշտական հանձնաժողովի նախագահը՝ Հ1-ի տված հայտնի հարցազրույցում ակնհայտորեն կասկածի տակ է դնում նաև պարտադիր ժամկետային զինծառայողների՝ անհրաժեշտության դեպքում հակառակորդին հետ մղելու և Հայաստանի ու Արցախի անվտանգությունն ապահովելու հնարավորությունը։ Այս մասին ֆեյսբուքյան իր էջում գրել է «Հենակետ» վերլուծական կենտրոն ՀԿ ղեկավար, Արցախի նախագահի անվտանգության հարցերով նախկին խորհրդական Տիգրան Աբրահամյանը։

«Ուղղակի, թե անուղղակի կերպով սա հնչեցվեց հարցազրույցում։

Այս ամենն ասվեց պայմանագրային և պարտադիր ժամկետային զինծառայության համեմատության համատեքստում։ Թե սա իր մեջ ինչ սպառնալիքներ է պարունակում վստահ եմ, որ տիրապետում են պաշտպանության նախարարությունում, զինված ուժերի գլխավոր շտաբում։

Ճիշտ է՝ վերոնշյալ հարցազրույցում մեծ թվով խնդրահարույց և մեր զինված ուժերի հեղինակության դեմ ուղղված այլ հայտարարություններ ևս հնչեցվեց, սակայն պարտադիր ժամկետային զինծառայության հետ կապված ձևակերպումներն այս պարագայում ամենավտանգավորն էին»,- գրել է նա։

Նշենք, որ ԱԺ պաշտպանության և անվտանգության հարցերով մշտական հանձնաժողովի նախագահը «Իմ քայլը» խմբակցության պատգամավոր Անդրանիկ Քոչարյանն է։