Ադրբեջանը պետք է դադարեցնի հայկական ատոմակայանի ռմբակոծման հետ կապված սադրիչ և վտանգավոր հայտարարությունները. Լոս Անջելեսի քաղաքապետ

Կոչ ենք անում Ադրբեջանին դադարեցնել սադրիչ հայտարարությունները հայկական ատոմակայանի ռմբակոծման հետ կապված։ Թվիթերյան իր էջում նման հայտարարություն է արել Լոս Անջելեսի քաղաքապետ Էրիկ Գարեթսին:

«Մենք հայ համայնքի կողքին ենք ընդդեմ բռնության: Ադրբեջանը պետք է դադարեցնի հայկական ատոմակայանի ռմբակոծման հետ կապված սադրիչ և վտանգավոր հայտարարությունները և ընդունի միջազգային դիտորդներին: Երկխոսությունն ու դիվանագիտությունը տարածաշրջանում խաղաղության և անվտանգության միակ ճանապարհն են»,- նշված է հայտարարությունում:

Ինչպես արդեն հայտնել էինք, այսօր ԱՄՆ-ի Լոս Անջելես քաղաքում հայ համայնքի ներկայացուցիչները բողոքի ակցիա են իրականացրում Ադրբեջանի հյուպատոսարանի առջև՝ ընդդեմ ադրբեջանական ագրեսիայի:

Բանախոսները շնորհակալություն են հայտնել հայերի ցույցին միացած օտարազգիներին, որոնք եկել են սատարելու իրենց հայ բարեկամներին եւ նրանց արդար դատը։

Նշվել է նաեւ, որ հայ համայնքը, որն իրեն անվանում է «Փոքրիկ Հայաստան», ամբողջապես զորակցում է հայրենիքին ու Հայոց բանակին եւ պաշտպանում է «Նոր պատերազմ՝ նոր տարածքներ» կարգախոսը, որ տարածաշրջանի անվտանգության միակ երաշխավորը Հայկական Բանակն է։