Ինչպես են Մարտի 8–ը տոնում պաշտոնյա կանայք. «Փաստ»

«Փաստ» օրաթերթը գրում է.

Ինչպե՞ս են պաշտոնյա կանայք տոնում Կանանց միջազգային տոնը: Հարցի պատասխանը գտնելու համար «Փաստը» զրուցել է պաշտոնյա մի քանի կանանց հետ՝ պարզելով, որ ոմանք նախըտրական այս լարված շրջանում տոն–մոն երկրորդ պլան են դրել՝ առաջնահերթությունը տալով քարոզարշավին:

Մասնավորապես նման ոգևորությամբ Մարտի 8–ն է նշելու արդարադատության նախարար, ՀՀԿ պատգամավորների թեկնածուների համապետական ցուցակի 3–րդ համարը զբաղեցնող Արփինե Հովհաննիսյանը: Արփինե Հովհաննիսյանը «Փաստի» հարցին, թե ինչպե՞ս է նշելու Մարտի 8–ը, բավական ուրախ տրամադրությամբ լակոնիկ պատասխան տվեց, այն է՝ քարոզարշավով:

Սոցիալ–դեմոկրատ հնչակյան կուսակցության առաջնորդ, ՀԱԿ պատգամավոր Լյուդմիլա Սարգսյանն էլ նշեց, որ այդ օրն իր դուստրերի և ընկերուհիների շրջապատում կանցկացնի: «Աղջիկներիս և մի քանի ընկերուհիների հետ կփորձեմ այդ օրն ավելի գեղեցիկ և բովանդակալից դարձնել: Հնարավոր է տանը նշենք, քանի որ սովորաբար ինձ հյուր են գալիս»,– նշեց նա: Պատգամավորի խոսքով` ինքը երբեք չի կարևորել նվերի արժեքը, կարևորը բովանդակությունն է: Վերջինս նվերի ընտրության հարցում բավական երկար է մտածում և փորձում ամեն մեկին ըստ իր նախասիրությունների և անհրաժեշտության նվերներ գնել. «Կարծում եմ, որ բոլոր նրանք, ովքեր ինձնից նվերներ կստանան շատ ուրախալի անակնկալ կունենան»: Մեր այն հարցին էլ, թե արդյոք կա մի այնպիսի նվեր, որ հիշվել է իր ամբողջ կյանքում, պատասխանեց, որ դա շատ երիտասարդ տարիքում է եղել: «Շատ անսպասելի անակնկալ էր ինձ համար, առ այսօր ես այդ գաղտնիքը որևէ մեկի չեմ բացել և երևի թե այդ մասին չխոսեմ: Բայց կարող եմ մի բան փաստել՝ այդ անակնկալն ինձ այնքան ուրախացրեց և այնքան բովանդակալից ու խոստումնալից էր, որ ես առ այսօր այդ մասին հիշում եմ»,– խոստովանեց պատգամավորը:

ԱԺ պատգամավոր, «Բարգավաճ Հայաստան» խմբակցության ղեկավար Նաիրա Զոհրաբյանն էլ, ով զրույցի պահին քարոզարշավի շրջանակներում գտնվում էր Արմավիրում, նշեց, որ որևէ կերպ չի պատրաստվում նշել այդ տոնը: «Ես Մարտի 8–ը` հեղափոխական Կլառա Ցետկինի օրը, չեմ նշում: Ես ընդհանրապես տոնամոլ չեմ: Շատ տոներ և հատկապես մարտի 8–ը ինձ համար պայմանական օրեր են: Կանանց պետք է գնահատել ոչ միայն այդ մեկ օրը: Ես դա համարում եմ ինչ–որ հատուկ նվաստացուցիչ օր: Հատուկ այդ օրը պիտի՞ հիշեն ու շնորհավորեն կանանց: Դրա համար էլ Մարտի 8 օրն ինձ համար ընդհանրապես գոյություն չունի: Գիտեմ, որ պատասխանս կտարբերվի մնացած բոլոր հերթապահ պատասխաններից, բայց բոլոր դեպքերում դա այդպես է՝ կանանց պետք է գնահատել տարվա բոլոր օրերին և ոչ թե առանձնացնել հատուկ օր և դրանով ընդամենը նվաստացնել կնոջը. այդ հատուկ օրը հատուկ վերաբերմունք ցուցաբերել: Դրա համար էլ Մարտի 8–ն ինձ համար սովորական շարքային օր է, ինչպես մարտի 3–ը, 4–ը կամ փետրվարի 11–ը»,– ասաց նա:

Մեկ այլ կին–պատգամավոր, Հանրապետական խմբակցության անդամ Նաիրա Կարապետյանն էլ, ով խոսելու պահին Փարիզում էր և պատրաստվում էր ինքնաթիռ բարձրանալ, ասաց, որ գործուղումից Հայաստան վերադառնալուն պես տոնը կնշի իր ընտանիքի հետ:

Պատգամավոր Զարուհի Փոստանջյանն էլ նշելով, որ հարցերին հեռախոսով չի պատասխանում, ավելացրեց միայն, որ վաղը մամուլի ասուլիս ունի:

Հավելենք միայն, որ կանանց միջազգային օրն ի սկզբանե անվանում էին Աշխատավոր կանանց միջազգային օր: Տոնի նախապատմությունն էլ հետևյալն է. Սոցիալ–դեմոկրատական կուսակցության կանանց կոչով Նյու Յորքում 1908 թ. մարտի 8–ին կայացավ ցույց կանանց իրավահավասարության համար։ Այդ օրն ավելի քան 15 հազար կանայք շրջեցին ողջ քաղաքով՝ պահանջելով կրճատել աշխատանքային օրը և տղամարդկանց հետ հավասարաչափ աշխատավարձ ստանալ և ընտրություններին մասնակցելու իրավունք ունենալ։

1910 թ. ԱՄՆ–ի պատգամավորուհիները ժամանելով Կոպենհագեն՝ այնտեղ հանդիպեցին կոմունիստ Կլարա Ցետկինի հետ, ով և սահմանեց կանանց միջազգային օրը։ Ենթադրվում էր, որ կանայք այդ օրը ցույցեր և երթեր էին կազմակերպելու՝ դրանով հասարակության ուշադրությունն իրենց խնդիրների վրա կենտրոնացնելու համար։

 Շարունակությունը` «Փաստ» օրաթերթի այսօրվա համարում: