Մանրամասներ Ղարաբաղում տեղի ունեցած երկրաշարժից

Քարվաճառում այսօր՝ մարտի 6-ին գրանցված երկրաշարժի հետևանքով մարդկային կորուստներ և ավերածություններ չկան, ճանապարհները նույնպես չեն վնասվել: Այս մասին ֆեյսբուքյան իր էջում գրել է Արցախի Հանրապետության վարչապետի մամուլի քարտուղար Արտակ Բեգլարյանը:

«Միայն էպիկենտրոնին մոտիկ մի քանի գյուղում գրանցվել են որոշ փոքր վնասներ, մասնավորապես՝ պատերի ճեղքերի առաջացում կամ խորացում:

Իրավիճակը հանգիստ է, խուճապային տրամադրություններ չկան բնակչության մոտ»,-գրել է նա:

Հիշեցնենք, որ այսօր, տեղական ժամանակով ժամը 10:24-ին, Քարվաճառ քաղաքից 28 կմ դեպի հյուսիս-արևելք հատվածում, 10 կմ խորությամբ տեղի է ունեցել երկրաշարժ՝ 3.4 մագնիտուդ հզորությամբ: Ստորգետնյա ցնցման ուժգնությունը էպիկենտրոնում կազմել է 4-5 բալ:

Երկրաշարժը զգացվել է ԼՂՀ հյուսիային բնակավայրերում՝ Դադիվանք գյուղում՝ 3-4 բալ եւ Քարվաճառ քաղաքում՝ 2-3 բալ ուժգնությամբ: Տեղական ժանմանակով 10:29-ին երկրաշարժին հաջորդել է 2.0 մագնիտուդով հետցնցում: