Նոր գալակտիկաներ թռչելու վերաբերյալ չէ «Ծառուկյան» դաշինքի տնտեսական ծրագիրը. «Փաստ»

«Փաստ» օրաթերթը գրում է.

Մեր հյուրն է «Ծառուկյան» դաշինքի անդամ, տնտեսագետ Վարդան Բոստանջյանը

– Պարոն Բոստանջյան, այդքան անխոցելի՞ է Ձեր դաշինքի տնտեսական ծրագիրը, որ այդպես բուռն արձագանքեց քննադատությանը: Ես նկատի ունեմ Աշոտ Եղիազարյան և Միքայել Մելքումյան բանավեճը: Վատ առումով որն ավելին էր, քան բանավեճը:

– Խոշոր խնդիրների լուծման պարագայում, այո, միշտ այլընտրանքններ գոյություն ունեն: Բայց բոլոր դեպքերում մեր 15 կետին եթե ծանոթանում եք, ի՞նչ եք տեսնում. մասնավորապես` կենսաթոշակների բարձրացում, նվազագույն աշխատավարձի բարձրացում և լուծման առաջնահերթություն պահանջող նման այլ խնդիրների կարգավորում:
Լուծման կարոտ այդ խնդիրների առկայությունն այնքան ակնառու է, որ կարող ենք և ասել` մեր քաղաքացիների մտահոգությունների հիմնական առարկան են ըստ էության: Կամ` մյուս հարցերը` գազի սպառումը, էլեկտրաէներգիայի սպառումը, Փոքր և միջին բիզնեսի ոչ արդյունավետ աշխատանքը, որոնց լուծման ուղիներին անդրադառնում է մեր դաշինքի ծրագիրը, արդեն դարձել են մեր հասարակության համար առօրյա հոգսեր:
Եվ այս խնդիրները օր առաջ պահանջում են շուտափույտ լուծումներ:

– Իսկ այդ խնդիրները լուծելու համար տնտեսական զարգացման նոր ելակետ ընտրե՞լ եք: Ասել է թե` տնտեսական զարգացման նոր քաղաքականություն առաջարկո՞ւմ եք Ձեր ծրագրում:

– Հնարավոր չէ խնդիրների լուծում` առանց նման քաղաքականության: Այսօր մեր իրականության մեջ առկա այդ խնդիրները, որոնք այնքան ցցուն են, որ անգամ ոչ մասնագետն է նկատում, խոսում են այն մասին, որ գոյություն ունեցող տնտեսական քաղաքականությունը չի նպաստում դրանց լուծմանը:
Պարզ է, որ եթե քաղաքական տարբեր ուժեր բարձրաձայնում են այս մասին, այդ թվում և Ազատ դեմոկրատներ կուսակցությունը, ինչո՞ւ չէ նրանք ևս բազմաթիվ նմանատիպ խնդիրների մասին խոսում են, ապա այդ ուժերի նպատակները չեն կարող էականորեն տարբեր լինել: Քանզի ցանկացած պետություն նախ լուծում է իր հասարակությանը, իր քաղաքացիներին առաջնահերթորեն հուզող խնդիրները:
Իսկ այսօր օրակարգում դրված են ամենահասարակ, ամենատրիվիալ հարցերը, որոնց լուծման հարցում բոլորս, առանց բացառության, ունենք դժվարություններ:
Օրինակ, մեր ծրագրում չեք հանդիպի կետի, որ ասենք հեռավոր գալակտիկաներ ենք թռչելու: Որովհետև կհետևի հարցը` այդ ո՞նց եք թռչում…
Եվ ես այժմ չէի ցանկանա, որ քաղաքական ուժերը, ելնելով տարրական ողորմելի շարժառիթներից` նախանձից, թուլությունից, իրենց նպատակների վերաբերյալ հասարակության հետ խոսելու փոխարեն, զբաղվեն այլ քաղաքական ուժերի փնովելով: Որպեսզի այդ ֆոնին բարձր երևան:

– Իսկ ովքե՞ր են մշակել ձեր դաշինքի տնտեսական ծրագիրը:

– Մենք ենք մշակել` Գագիկ Ծառուկյանի գլխավորությամբ:

– Այդ գումարները դուք բերելու եք ստվերի կրճատման, կոռուպցիայի դեմ պայքարի արդյունքո՞ւմ, թե տնտեսության զարգացման նոր ռազմավարություն եք որդեգրելու:

– Համալիր մոտեցում է ընտրված: նախատեսված է և տնտեսական մրցակցության խթանում, և միջոցների արդյունավետ օգտագործում, և ներդրումային ծրագրերի իրականացում: Մեկ կետ չէ, որ ասենք` մենք առաջնորդվում ենք այսինչ կետով:
Մենք անդրադառնում ենք բոլոր այն խնդիրներին, որոնք կան այսօր մեր երկրում, և այն հարցերին, որոնք հասարակության համար դարձել են բողոքի առարկա: Հենց իշխանություններն են ևս այդ մասին շեշտում. մատնանշում են մեր տնտեսության խոցելի կողմերը: Վարչապետն ինքն է ասում, որ մեր տնտեսությունը գտնվում է շատ ծանր վիճակում:
Հարց տանք` իսկ ինչո՞ւ է այդպես: Պատասխանը մեկն է ` նշանակում է ինչ‑որ բան այնպես չենք անում:
Ուրեմն` քաղաքական ուժերը հայտ են ներկայացնում այս պահին, որ պատրաստ են անելու այն, ինչ անհրաժեշտ է անել: Եվ սա շատ բնական է, բնավ զարմանալու բան չէ:
Պետք է այստեղից մի բան եզրակացնել` գոյություն ունեն մարդ–կուսակցություններ, որոնք հասկանում են, որ ընտրվելու հարցում հեռանկար չունեն: Եվ որդեգրում են հետևյալ կեցվածքը` փնովեն այլ ուժերի:

– Է, թող փնովեն Հանրապետական կուսակցությանը:

– Վախենում են:

– Կամ էլ համարում են, որ Հանրապետականը մրցակցությունից դուրս է:

– Եթե մեր պատկերացումներում, մեր ուղեղների մեջ ֆիքսված է դա, ուրեմն արժանի ենք նրան, ինչ ունենք այսօր, այն վիճակին, ինչի մեջ գտնվում ենք:

Շարունակությունը` «Փաստ» օրաթերթի այսօրվա համարում: