Վարդան Հարությունյան. «Եթե Վիգեն Սարգսյանը ղեկավարում է ՀՀԿ ցուցակը, արդեն բանակը քաղաքականացվում է». «Փաստ»

«Փաստ» օրաթերթը գրում է.

«Իրականում Սերժ Սարգսյանը հայտարարում է, որ բանակը ընտրությունների ժամանակ պիտի ծառայի միայն իշխանությանը և աշխատի միայն իշխանության օգտին և ոչ որևէ մեկ ուրիշի օգտին, հակառակ դեպքում՝ պատժվելու է»,– այս մասին «Փաստի» հետ զրույցում տեսակետ հատնեց «Իրավունքի և ազատության կենտրոնի» նախագահ, իրավապաշտպան Վարդան Հարությունյանը՝ անդրադառնալով երեկ զինվորական ղեկավարության հետ Սերժ Սարգսյանի հանդիպմանը:
«Սերժ Սարգսյանը չէ այն մարդը, որը պետք է այդ մասին խոսի, որովհետև հիմնական դերակատարն ու մեղավորը նաև ինքն է եղել, որ բանակը ընտրությունների ժամանակ միշտ օգտագործվել է, բայց որ բանակը պետք է լինի ապաքաղաքական և չմիջամտի, դա աքսիոմաներից մեկն է»,– ասաց իրավապաշտպանը:
Նշենք, որ ԶՈՒ ղեկավարության հետ հանդիպման ժամանակ Սերժ Սարգսյանն ասել է. «Հատուկ շեշտում եմ, որ Հայաստանի Հանրապետության զինված ուժերն ապակուսակցական են և ապաքաղաքական: Այո՛, պաշտպանության նախարար Վիգեն Սարգսյանը գլխավորում է Հայաստանի հանրապետական կուսակցության ընտրական ցուցակը: Սակայն նախընտրական քարոզչության և իր պաշտոնական լիազորությունների իրականացման որևէ խաչաձևում չի լինելու:
Միջկուսակցական քննարկումներ բանակում չեն լինելու, և մենք էլ չենք մտցնելու: Ավելին, զգուշացնում եմ բոլորիդ, որ նման փորձերն ուղղակի պատժվելու են»:
Իրավապաշտպանի կարծիքով՝ այն, որ Վիգեն Սարգսյանը ղեկավարում է ՀՀԿ ցուցակը, արդեն խոսում է այն մասին, որ բանակը քաղաքականացվում է, որովհետև դա անթույլատրելի է: «Եթե Սերժ Սարգսյանը գնացել է և նման ելույթ է ունեցել, նշանակում է մտահոգվելու տեղ ունի, բայց ես կարծում եմ՝ մտահոգություններն այնքան էլ տեղին չեն»,– ասաց Հարությունյանը՝ հավելելով. «Չեմ կարծում, որ բանակը կարող է կանգնել Սեյրան Օհանյանի կողքին, քանի որ միշտ կանգնած է եղել իշխանության կողքին, այլընտրանք չունեն: Իսկ բանակի ղեկավարությունը իշխանության մի մասն է և լիովին օգտվում է իշխանական բոլոր «առավելություններից»»:
Ըստ Վարդան Հարությունյանի՝ բանակը երբևէ Հայաստանում չի եղել ապաքաղաքական, միշտ էլ ներգավվել է քաղաքական գործընթացներում՝ հատկապես Սերժ Սարգսյանի միջամտությամբ և հրահանգներով:
«Սերժ Սարգսյանը կանգնած է բանակի ակունքներոմ, և մշտապես է բանակն օգտագործվել ընտրական պրոցեսներում: Իսկ եթե Սեյրան Օհանյանը փորձի ներգրավվել բանակը ընտրական գործընթացներում, դրանով ոչնչով չի տարբերվելու իշխանություններից, որոնք հենց էդպես են վարվում»,– նշեց Հարությունյանը:
Իրավապաշտպանը չի բացառում, որ առաջիկայում քրեական գործեր բացվեն Սեյրան Օհանյանի ու նրա կողմնակիցների դեմ. «Ամեն ինչ հնարավոր է, վերջին տարիների իրականությունը ցույց է տալիս, որ յուրայիններին կարող են հետապնդել, բանտ նստեցնել: Եթե իրենց առաջ խնդիր դնեն պատժելու, անպայման կգտնեն ճանապարհը»:
Այլ հարց է, որ բանակում շատ վատ կարող են վերաբերվել Սեյրան Օհանյանի դեմ հնարավոր քրեական հետապնդմանը, և դա թերևս հասկանում է իշխանությունը:
Պաշտպանության նախկին փոխնախարար Անդրանիկ Քոչարյանը «Փաստի» հետ զրույցում ասաց, որ եթե Սերժ Սարգսյանն ուզում էր բանակը հեռու պահել կուսակցական խաղերից, Վիգեն Սարգսյանին չպետք է դարձներ կուսակցական: «Եթե դա էդպես է, ուրեմն պաշտպանության նախարարն արդեն ներքաշված է կուսակցական խաղերի մեջ, վերջ»,– ասաց Քոչարյանը՝ շարունակելով. «Եթե էդպես էին մտածում, թող բանակը հանեին ընտրություններից: Էդպիսի առաջարկներ ժամանակին կային, որ բանակը չմասնակցի ընտրություններին, որովհետև այն շատ հեշտ է օգտագործել իշխանության համար: Եթե էդպիսի բան կար, ի՞նչ իմաստ ուներ պաշտպանության նախարարին դարձնել կուսակցական: Կուսակցական նախարարի պարագայում խոսել այդ մասին, մի քիչ անիրատեսական է: Բանակը մասնակցում է ընտրություններին և քարոզարշավը, այսպես թե այնպես, բանակին առնչվելու է: Բանակի զինվորականները պետք հեռուստացույցը միացնեն և հետևեն քարոզչությանը: Եթե ուզում են բանակը որևէ բանի չմասնակի6, թող բանակին արգելեն ընտրություններին մասնակցել: Դա ամենաճիշտ ճանապարհը կլիներ: Հիմա պաշտպանության նախարարը կուսակցական է: Վերջ: Դրանով արդեն բանակը ներքաշված է կուսակցական խաղերի մեջ»:

Շարունակությունը` «Փաստ» օրաթերթի այսօրվա համարում: