Սպորտային տարվա լավագույն ամփոփումը․ ՀԱՕԿ նախագահն արժանագույնս պարգևատրեց լավագույն մարզիկներին

Արման Հարոյանը ֆեյսբուքյան իր էջում գրում է.

«Լինել լավագույնը», ահա հաջողության հասնելու բանալին։ Յուրաքանչյուր ոք, յուրաքանչյուր մասնագիտություն ուսումնասիրող մարդ հստակ գիտակցում է, որ այս ժամանակաշրջանում պետք է լինել լավագույնը, ոչ ոքի չեն հետաքրքրում միջակությունները, վատագույնների մասին խոսելն ավելորդ է։ Նույնն էլ սպորտում է՝ մարզիկը գիտակցում է, որ պետք է լինի լավագույնը, և իրեն կգնահատեն, և ինքը կվայելի համաժողովրդական սերն ու հարգանքը։
2018 թվականի դեկտեմբերի 25-ը առանձնացավ մյուս օրերից Հայաստանի տարվա լավագույն մարզիկների համար։ Տեղի ունեցավ արդեն ավանդույթ դարձած մարզիկների պարգևատրման արարողությունը։ Չնայած որ նախատեսված էր պարգևատրել օլիմպիական մարզաձևերում արդյունքի հասած մարզիկներին, այնուամենայնիվ պարգևատրվեցին նաև լավագույն տասնյակի ցանկում ընդգրկված մյուս մարզիկները ևս: Պարգևատրման արարողությունը տեղի ունեցավ Օլիմպավանում։ Ոչ ոքի համար գաղտնիք չէ, որ այն մարզիկները, ովքեր հաջողություններ են գրանցել ծանրամարտում իրենց մարզումների մեծ մասն անցկացրել են Օլիմպավանի մարզասրահում, այդ մարզիկներից կարելի է առանձնացնել Սիմոն Մարտիրոսյանին, ով ծանրամարտի աշխարհի չեմպիոնի տիտղոսը բերեց Հայաստան, ու հայերին տվեց հպարտանալու առիթ։ 
Հիմա անդրադառնանք այս միջոցառման կազմակերպիչներին։ Ինչպես ամեն տարի, այս տարի ևս այն կազմակերպվել էր ՀԱՕԿ նախագահ Գագիկ Ծառուկյանի ջանքերով։ Հայաստանը միջազգային հարթակներում լավագույնս ներկայացրած մարզիկները պարգևատրվեցին Ծառուկյանի կողմից։ 
Անխոս այս պարգևատրումները ուղղված են հայկական սպորտի զարգացմանը, ու դրանք կարելի է համարել լավագույն մոտիվացիան, իսկ այն մարզիկների համար, ովքեր նոր են հարթում իրենց ուղին դեպի մեծ սպորտ, կձգտեն լինել լավագույնը։
Այն ներդրումը, որ Ծառուկյանն ունի հայկական սպորտաձևի զարգացման գործում՝ անգնահատելի է։ Սա սպորտային տարվա համար լավագույն ավարտն էր։